غديت ادورني بزحمة افكاري
كني سؤالٍ عجزت القى له إجابه
يا غربة الروح طال الدرب بمساري
و العمر يجري ولا ادري وش غدا به؟
متى على اللّٰه تضوى لي انواري
و القى الطريق اللي انكتب لي بابه؟
و اشوفني بحلم الهنا و اجمل اقداري
اقطف زهور الحظ عقب الخوف و انيابه
مرّ في بالي شريطٍ فيه من عمري مواري
يشبه السنين وعثرة اليأس الأخيرة
مو غريب إن السكون يجول في سكّة نهاري
الغريب إن الصخب في ليلي أحداثه كثيرة
بين صدفة جابها العمر ووداعٍ بأختياري
ما عرف قلبي يطيع الواقع أو يرضي ضميره
ودي أقسى ودي أنسى ودي أرسى في مساري
وأمسك يدين اليقين اللي تخافه كل حيره
لليال الذكريات ولصباحات الطواري
وللعبور التضحيات ولسنين البعد خيرة
العمر ما هو مشاورني ولا هو رهن لقراري
العمر يمضي وسيف الوقت ما يحضن جفيره
شعار 2026 :
ولا لي بالبشر غايه ولا لي بالثرى أوتاد
خفوقي حُر و أتبع ما يعزّ النفس و أرضيها
وأعرف إن العمر مرّة وأعرف إن السنين شداد
ونذر إني لأعزف أيّامي السود و أغنيها