حياة اللا شيء هذي ممتعة كم يوم بس مردك راح تتعب وتعاني منها، فيه حاجة اسمها نشوة ولذة انجاز المطلوب- أيًا كان هذا المطلوب- دوام، مشروع، رياضة، جلوس مع الأهل.. شكل الصح ✔️ لما يجي في يومك لا يعادله شعور.
أحد أسباب محبتي للشتاء، النوم بدون مكيف. يصفي الراس بشكل كبير وتصحى نشيط وكمية هدووء حتى جسمك تحس انه يتفكك، عندي قناعة أن هواء المكيف مضر بالعظام، والجسم بشكل عام. طبعاً كلامي من منطلق شعوري ليس من منطلق علمي.
حنيني للأماكن وحنيني للزمان يفوق حنيني للأشخاص. يعني أحن جدياً لمرحلة الثانوي.. للمدرسة ولاهتماماتي وقتها، نسق الحياة ومراهقتي..الخ
بعض أصدقاء هالمرحلة عندي الان في السناب لكن العلاقة تحولت بمرور الوقت الى رسمية ولا عندي فضول ولا رغبة في التواصل معهم، لأني أدرك أننا تغيرنا كلنا
@ecxiei صعب أحدد انطباعي تجاهه، بس كان فيه تساؤل بداخلي: الاجتماع ماهو عيد أو عزيمة عائلية واجباري تحضر. بمعنى لو أعتذر عادي.. ليش جاي؟
كل الخمسة الموجودين كانوا على طبيعتهم ومنطلقين ويضحكون الا هو كان متحفظ.
.
عموما الكلام من عدمه حرية شخصية للجميع، والقبول والراحة هي كذلك حرية للجميع
@TheeSaleh مهما كانت يا صالح بالتأكيد فيه سالفة أو سالفتين تقدر تقولها، في رأي تقدر تطرحه، فيه موقف صار لك، فيه قصة سمعتها.. الشخص لما يتكلم هو يمرر رسالة للآخرين انه حابهم وانه مرتاح معهم وانه مبسوط بالجلسة معهم
ما أعرف أصور، بس تبهرني الناس اللي تعرف تصور أشياء عادية أو لحظات يومية لكن بشكل يخليك تحس أن ملتقط الصورة يعرف يشوف الجمال في المكان اللي حوله مهما كان بسيط، التصوير موهبة وهواية صعبة و رائعة.
وحنا صغار كانت أمي محددة ايام معينة للطلب من المطعم، وفي يوم أمي وأبوي كانوا طالعين مشوار وطلبنا واتفقنا حنا واخواني محد يتكلم.. أول ما رجعوا قالت أختي الصغيرة لهم: ترانا ما طلبنا من المطعم
عندي نظرية تقول أن الشخص لازم يستقطع جانب من الجمالية في حياته، ومؤمن أن الجمال متوزع بين عدة جوانب سواءً صوت أو رسمة أو عمل ابداعي من ناحية نص أو قصيدة، أو مشاهدة مباراة أو مسلسل..الخ
وكل شخص لازم يُشبع جوانب الجمال في يومه عشان يعيش مبسوط.
لا تبالغ في الحاجات اللي أصلها جيد وتجعل منها مثالي مثالي فتتحول نتائجها عكسية، ثمانية أو تسعة من عشرة بشكل مستمر أفضل من طموح الكمال اللي ينهكك وممكن يرجعك لنقطة الصفر.
الموازنة حلوة والاستمرارية مهمة ورحم الله امرئ عرف نفسه.