قصيدة المشاركة في موضوع التكاتف "
يوم اقول انّ الجماعة عز .. ياخي لا تغارب
الكلام يزيد ثقل ان ضفت له واو الجماعه
لو ندقق نكتشف وش سر لـ الساعه عقارب
الثواني و الدقايق تتحد !.. و تصير ساعه
من يوم مرّت فتنة الجيل المعاصر ما غفيت
كن السـهـر ماسك جفن عيني بروس اصابعه
مزيونةٍ مـن حطها الله مـن نصيبه ما هقيت
تـطـري عليه .. الـثـانية والـثـالـثـة والـرابعة
فـ عيونها النعّس تضيع الناس .. لكني لقيت
"اجمل شعور" يمر في قلبي .. ويترك طابعه
انا اشـهد انّي مـن لقاها لا شبعت ولا رويت
مـع انـها اكـثـر بنت رويـانة جـمـال وشابعة
ان سلـمـتني قلبها والله لـ اصـونه ما احييت
لو الـزمـان .. يـزود فـي صـكـاته الـمتتابعة
اللي علي ، ما اخونها لو كان مع بنت السبيت
واللي عليها ، الكـلـمة اللي مـن غـلاها نابعة
"
طاري الحب وش دور الجفى و التشفّي
والأمل كل ليل ارجع .. و اراجع شريطه
ف اتجاهي لـ رغباتي .. و تحقيق شفّي
راسمً لي طموح .. و راسمً لي خريطه
قبل اعيش العنا .. و يودع الحلم كفّي
و الحزن يغرق قلوب الحبايب محيطه
في سبيل الغلا ماعشت عيشت تخفّي
المحبه ما تحتاج لـ وسيط : و وسيطه
الحبيب : اللي من اول يوقف فـ صفّي
قبل لا يندرج : تحت الظروف السليطه
راح .. بس الشعور اللي ماهوب مْتوفي
ما تركني اعيش ( المغريات المحيطه )
الا لحظه !.. على طاري " علوم المقفّي "
عادي اطرد ورا المقفي بـ نسبه بسيطه ؟
ذعاذيع المسا هفّي على الوادي رويد رويد
عنود الصيد مـا تمرح وريح النمر فالوادي
غزالٍ كـل مـا حسّت بقرب مدورين الصيد
على الما لو تبي تمشي من الخفّة مشت عادي
اداريها مثل مـا اداري بيوتي .. من التعقيد
واعيّن راحتي فـ قبالها وبـ صـوتها الشادي
على كثر البشر ما مثلها في نجد تلعى جيد
محبتها بـ قلبي مثل قصر الحكم فـ بلادي
اوقـف قـدم قـوة جـاذبـيتها وقـوف الحيد
ما كني في تفاصيل الجمال اليوسفي غادي
كثر ما اسرح بضحكتها واروح مع الخيال بعيد
تطـوّل جـلستي مـعـها .. وكنّي تـوّني بادي
عظيمة كلها .. ماهي عظيمة كيد بالتحديد
من اخمصها لقذلة راسها المكدود بالكادي
لو تمر المحيط الهادي بكشخة صباح العيد
علا موجه على روس الجـبال ولا بقا هادي
أنا من البارح وانا خاطري شين
وحيد والعرق المطرف صحيبي
آحيان احصل برج وآحيان برجين
وآحيان تسري كلها وتغديبي
متشهلُ في خبتنُ بين عرقين
ذي جرة ركابي وذا خط جيبي
ياليل ياجامع على الود قلبين
وصل مراسيلي وعلم حبيبي
حولت جوالي على زين آثر زين
متبقطن ماله من اسمه نصيبي '