مشكله من الخاص
عريس متقدم لي، وبعد أول مقابلة طلب إني أروح بيته عشان يشوفني زين.. ولما اقترحت نكرر الزيارة عندنا، انصدمت من رده!
أنا وحيدة أمي، وأبوي الله يرحمه متوفي. تقدم لي عريس، وأول مقابلة كانت عندنا بالبيت. الرجال جاء مع أهله، وكان محترم ومؤدب، والمقابلة عدّت بشكل كويس، وما حسّيت إن فيه أي مشكلة.
بعد ما مشوا، الحرمة اللي توسطت بيننا، وهي من قرايبه، دقت عليّ وقالت لي إن العريس حاس إنه ما قدر يشوفني زين وقت المقابلة، ويبي المرة الجاية نروح لهم البيت عشان ياخذ راحته ويقدر يتعرف عليّ أكثر.
أنا بصراحة ما عندي مانع نكرر المقابلة، لكن قلت لها: ليه ما يجون عندنا مرة ثانية؟ حياهم الله، ونرحب فيهم، وما عندنا أي مانع.
لكن الوسيطة قالت لي إنها كلمته، وقال لها إنه ما يبي يجي مرة ثانية؛ لأنه لازم يجيب معه شيء، والمرة الأولى يوم جاء جاب أغراض وتكلف، وما يبي يكرر هالموضوع.
أنا استغربت مرة، لأنهم أصلًا جابوا معهم علبة شوكولاتة، وإحنا فتحناها وقتها وعزمنا كل الموجودين من أهلنا وأهلهم، يعني ما كان فيه أي تكاليف كبيرة مثل ما هو متصور.
فقلت لها: خلاص، بلغيه يجي المرة الجاية بدون ما يجيب أي شيء أبد، إحنا مو منتظرين منه شيء، أهم شيء إن المقابلة تكون ببيتنا مثل أول مرة.
لكن تفاجأت إن الرد برضه لا، وإنه مصر إننا إحنا اللي نروح لهم البيت، عشان يكون على راحته ويقدر يشوفني ويتكلم معاي بشكل أفضل.
وقال لها يا إما أنا وأمي نروح لهم البيت، يا إما كل وحدة تروح لحالها، وما راح تكون فيه مقابلة ثانية غير كذا.
أنا بصراحة محتارة وما أدري وش أسوي، خصوصًا إن أبوي الله يرحمه متوفي، وموضوع الزيارات لازم يكون بترتيب واتفاق واضح بين الأهل، وما أبي أحس إننا مضطرين نوافق على شيء لمجرد إنه حطنا قدام خيارين.
هل تشوفون طلبه طبيعي ومن حقه يختار المكان اللي يرتاح فيه؟ ولا المفروض يراعي ظروفنا ويجي عندنا مثل أول مرة؟
أمي نفسها تفرح فيني وتشوفني عروس، وأنا ما أبي أزعلها ولا أبي أظلم نفسي بنفس الوقت. ��ش تنصحوني، نوافق ونروح لهم ولا نتمسك إن المقابلة الثانية تكون عندنا؟