مشكلتي

الحساب الأول لعَرض المشاكل والإستفسارات اللتي تُواجهكك في حياتكك

[مشكلتي @my_problem1]

سوف يتم عرض الحساب للبيع في الأيام القادمة، ولن يؤثر ذلك على نزول المشاكل والاستفسارات. هدف الحساب منذ البداية كان إفادة الناس بشكل مجاني، وقد ساعد بفضل الله ثم بفضل تفاعلكم في حل العديد من المشاكل. لضمان استمرار هذه الفائدة، سيتم طرح الحساب أولًا على المراكز الأسرية المهتمة!

[مشكلتي @my_problem1]

متأخره بالحمل وزوجي كل ماجتني الدوره يدخل في حاله حزين وضيقه ويكرهني كره غريب لدرجه يفكر بالطلاق ولما اجي بناقشه في موضوع الحمل ونعمل بالاسباب يرد انه مانصلح لبعض علشان كذا ربي ماكتب يسكتني في هالعبره أنا ماهمني كلامه كثر مايهمني ليه ما يعمل بالاسباب معي ونسعى في موضوع الانجاب وليه الحزن والضيقه والكلام الجارح

[مشكلتي @my_problem1]

لو سمحتوا انا عندي بنت وولد الحين هم مراهقين وادري غلطانه وخلاص لافات الفوت ماينفع الصوت من كثر حبي لهم كنت احل واجباتهم اغيبهم كثير ماشد عل��هم ا��ل مشاكلهم ماخليهم يفكرون او يعتمدون على نفسهم وابوهم لاذاكر لهم يصارخ ويعصب فماخليه يساعدهم طبعا ماتكلموا الا على سن 6 سنوات وأثر عليهم بالدراسه والصداقه طبعا ماعالجناهم الا عااربع سنوات المهم للحين مايعرفون يسولفون عندهم صعوبه بالفهم صداقاتهم ركيكه شخصياتهم ضعيفه ماعندهم مواهب وانا يشهد الله حاولت اعالج بعض الامور بس ماعندي فلوس واخذهم ووديهم نوادي اخصائيين وابوهم كل ماقوله شي وش عندها الدكتوره مافيه مو لازم المهم طمنوني واسوني الله لا يسامح الي بيقول انتي السبب ومدري وشو ادري خلاص استغفرالله واتوب اليه

[مشكلتي @my_problem1]

السلام عليكم
انا تزوجت بعمر 20 وتطلقت بعد سنه وعمري 21 والان 25 وداخله على 26 ودي اتزوج ومقهوره انه طلقني بسبب تافه جدا�� ندمت ا��ي تزوجت بدري احيانا يجيني وسواوس وندم 💔💔وش اسوي

[مشكلتي @my_problem1]

السلام عليكم انا متعود على الراحه وعمري الان ٢٦ ولا توظفت ولقيت لي وظيفه قطاع خاص في شركة ولا عندي صبر اني اداوم واقول الوقت طويل ماعندي صبر واوسوس بالراتب اقول مايكفي ولا يستاهل اني اجلس وودي اكمل تقنيه اقول ماقدر اجمع بين وظيفي والتقنيه نصياحكم ومن وش تجي هاذي كليوم اقول بكره تزين ماحب اجلس بال��وام اكثر ��ن ساعتين

[مشكلتي @my_problem1]

مشكلتي ابي انفصل بس ماعندي مكان اروح له اهلي لو اجيهم انا وعيالي ساعتين يعصبون ويتوترون ويطلعونهم من الغرف ننحشر بالصاله مادري وين اروح ولازم الانفصال

[مشكلتي @my_problem1]

السلام عليكم انا امي كانت تعبانه كانسر سنوات وكان هي ابوي مشاكل ومبتعدين عن بعض بنفس البيت بس مايتواجهون وكنت اعاني خوف وقلق لمشاكلهم من صغري امي كانت صبوره عشانا وتتحمل تعبت دخلت المستشفى مازرها ولا مره باخر مراحلها ماساعدنا احنا حتى كنفسيه واحتواء الحين بعد وفاتها فيني غصه كل ماشوفه واتذكر كل شيء كيف الواحد يتخطى ؟الحين يعاملني برسمية من صغري كان دايم ودي نفس البنات تسولف مع ابوها وتضحك انا اخاف اتكلم معاه بس احترمه انا دائما اسال شقصرنا فيه انا وامي

[مشكلتي @my_problem1]

زوجة اخوي هي واخوي قرروا الانفصال وخيرت اخوي خيارين كلها صعبه قالت له اذا بطلع من البيت فالعيال عندك وانا بجيهم زياره واذا ببقى في البيت فالعيال معي وتزورهم متى شئت ، واخوي ما عنده القدرة انه يبني او حتى ��ستأجر وهي عذ��ها ان الاطفال يبقون في بيتهم رغم ان بيت اهلها كبير وماعندهم مانع تجيهم بنتهم بالاطفال ، شوركم وش الحل

[مشكلتي @my_problem1]

السلام عليكم ، انا مشكلتي مع زوجي انه طيب وكويس لكن يعطي اخوانه كل شهر كنه يصرف عليهم وهم كبار ومتزوجين وموظفين وعندهم بيوت وسيارات ، واحنا ماعندنا لا بيت ولا سياره جديده ، سؤال وش الشيء اللي يخليه يحول لهم دايم وكنهم محتاجي�� وهو اللي م سوى اي شيء يذكر كنه يدفع عنهم بيوتهم ومشاكلهم … ولو طلبته انا ياجل دايم احتياجاتي علشان يحولهم انا كيف اقدر اخذ ابسط حقوقي 💔

[مشكلتي @my_problem1]

متزوجه من فتره وكل مره احمل فيها زوجي يكرهني ويتعمد يهاوشني على اتفه الاسباب يعني زياده على تعب الحمل هو يتسلط علي مع اني الحمدلله ما ناقصني شي اب��

[مشكلتي @my_problem1]

كيف تتعاملون مع الندم مع اشياء تدرون انها غلط وانكم منذلين بس تقولون الحياه بتزيين بتتغير الحمدلله مؤمنه وادري انها دنيا فانيه بس احنا بشر ادعولي ان الله يفرج همي ويسعدني انا وعيالي ويرزقنا مانتمنى استغفر الله واتوب اليك
لاحول ولا قوة الا بالله العلي العظيم

[مشكلتي @my_problem1]

كيف تشوفون الرجال الي في فترة الملكه تمر ٣ شهور ما يزور زوجته بس يتواصل معها كأنهم اصحاب نكت و سواليف عن الدوام و بعض الاحيان نصايح للزواج وكذا و الزواج ما حدده بعد و يطلع و يسافر؟

[مشكلتي @my_problem1]

انا متزوجه من شخص كذب عليا وعلى اهلي وقال انو وظيفته ��ي وطلعت شي تاني طبعا مستمر عليا ��ي الكذبه وانا مابينت له انى عرفت ايش وظيفته الحقيقيه ،،،احس انه يخفي عليا امور تانيه ،،،، ايش اسوى اصارحه واخرج من بيته ؟ ولا اروح عند اهلي مااحب الرجال الكذاب
حتى اهله مايجو عند الا هوا يكون جالسه ماعندى رقم اخواته ولا يتواصلو معايا ،امه وابوه متوفيين .منى طايقته

[مشكلتي @my_problem1]

السلام عليكم انا توني متملكه ، بس اني تحت ضغط اهلي والمجتمع
نصايح تضغطني زي خ��يه يسويلك يجيبلك يعطيك ، افرضي شخصيتك لا تقولين له اي على كل شي
كنهم يوصلون لي رسايل ان شخصيتك ضعيفه وبيدوس عليك ولا راح تدبرين عمرك..
كلامهم يخليني انشحن عليه ويجيني شعور ودي اتهاوش عشان يسوي اللي يبونه وارتاح
لا تقولون اهم شي انتي وسعادتك انا كنت اقول كذا والحين صرت اعرف الناس مالها الا الظاهر والماديات ولابيشوفونك بشكل ينرحم وفلانه وعلانه احسن منك ��والها عطاها سكنها سفرها💔💔💔

[مشكلتي @my_problem1]

السلام عليكم
مشكلتي عائلية بسبب ان اخوي يدرس برا المنطقه الي احنا فيها وصار ياخذ سياره ابوي ومافيه غير سيارتي فالبيت فصارت مع ابوي واهلي حتى فيه وظايف جات ما رحت لها وجمعات كنسلتها مع ان امي تقدر تشري سياره للبيت او لأخوي بس رافضه الموضوع بتاتاً ايش الحل تعبت نفسياً !

[مشكلتي @my_problem1]

انا متزوجه من ٩ شهور ما اتذكر اخر مره طلعنا فيها انا وزوجي نتعشى او نتقهوى او نتمشى مع بعض دايم اطلع مع اهلي او اهله او لحالي ماني حاسه اني متزوجه مليت وكم مره اطلب منه ويصرفني وبعدها يطلع مع اخوياه مع اني والله ماني نكديه بالطلعات ولا اصرف كثير صرت معد اطلبه نطلع وحتى لمن يقولي مقصر في طلعاتي معاك صرت اقوله عادي ولعد يهمني معد لي ��فس له مو عشان طلعات لا ا��س هو مايهتم بسعادتي حتى اذا شافني متضايقه مايقولي شي ولا نطلع نغير جوي تعبت منه

[مشكلتي @my_problem1]

السلام عليكم
بشكل مفاجئ اصبحت انسان اخر وليس نفس الشخص قبل شهرين وماقبل .. اشعر بضيقه شديدة بالصدر واكره دوامي ومنعزل وخايف من المسقبل ومتوتر وموب طايق زملاء العمل ومخي يفكر بسرعه شديدة بكل شيء واغلبها افكار سلبية.. الي عنده استشارة طب��ة بدون تجريح يتفضل رجاءً

[مشكلتي @my_problem1]

لو سمحت انشر تساؤلي

انا من قبل رمضان بشهر تجيني حساسية مفاجئه مراااا زهقتني في كل جسمي حتى بوجهي وفروة الراس والانف حكه حكه احيانا مع احمرار يبرز عن الجلد واحيانا احمرا فقط واغلب الوقت حكه مع زي الدبابيس بدون احمرار

انا في وجيهكم يامس��مين اللي صار له كذا وتعافى يفزع لي ويعلمني ماادري وش هالبلا

انا معي سكر من ١٤ سنه بس كل البنات اللي معهم سكر ماجاهم نفس ماجاني

الدكتور عطاني حبوب جابت لي الدوران وتركتها ورجعت لي الحساسية وقال الدكتور الحساسية بالدم ٣٥٠ والطبيعي ١٠٠

تكفون اللي يعرف دكتور ولا شيخ يفزع لي واللي صار له زي كذا او سمع احد وتعافى يعلمني ورب البيت لا ادعي له تحت الكعبه 💔😭

[مشكلتي @my_problem1]

ادعوا لي أنا وشخص نحب بعض وما نتواصل ابدًا عشان ما نقع في الحرام واهلنا تعرفوا على بعض و وقت خلاص بيتم كل شيء امي وأمه صارت بينهم مشكله وقالت ام الولد خلاص مافيه نصيب ادعوا تنحل وتفرج وتتسهل يارب لنا لعل احدهم إلى الله اقرب مني😔

[مشكلتي @my_problem1]

لقد تقدمت في العمر، وأنا الآن على أبو��ب الأربعين. انشغلت بوظيفتي وأكملت دراستي، لكن حلم تكوين أسرة وبناء بيت وإنجاب أطفال ظل الحلم الأساسي بالنسبة لي. للأسف، لم يوفقني الله بخاطب مناسب. إما أن يكون تعليمه محدودًا جدًا، أو مدخنًا، أو كبيرًا في السن، أو متزوجًا، أو بخيلًا. على الرغم من أنني لا ينقصني شيء - أنا ربة منزل ممتازة، وظيفتي مرموقة، حاصلة على تعليم عالٍ، جميلة، ومحافظة جدًا - إلا أن انشغالي بالتعليم جعل البعض يرونني غير مناسبة بسبب تقدمي في العمر.
والله، لقد تعبت. هل أتنازل عن أبسط حقوقي من أجل تكوين أسرة لا أرى فيها مقومات السعادة؟ وحتى لو لجأت إلى الخطابة، هل سأندم لاحقًا لأنني اخترت هذا الطريق؟ أخشى أن يستخدم الزوج ذلك ضدي في المستقبل. مما أراه وأسمعه، لا يبدو أن هناك من يستحق المجازفة من أجله. لكن حلم تربية طفل يظل حسرة في قلبي. لو فقط أتيحت فرصة التبني للعازبات :(

[مشكلتي @my_problem1]

للبنات ..

إذا تقدم لكم رجل وكان كويس بس
رفضتوه بعدين تبين لكم انه كويس
ترجعون تقولون له حن موافقين 😢