نـوره

[نـوره @nlj2ii]

راضي إن الشوق يبقى والحنين يواصل
بعد " حبل اللّٰه تعالى " ما لي إلا حبلك

رغم معرفتي بشكل المرتحل والواصل
والظروف اللي تمسك بك وتقطع سبلك

كنت أقول إن التعب مخلوف مير الحاصل
مالقيت اللي يشابهك بـ حلاك ونبلك

أنت في قصة حياتي كنت — مثل الفاصل
صرت أعاني من بعدك، وكنت أعاني قبلك

[نـوره @nlj2ii]

قطار الاحباب فوت فرصة العاشقين
والي بذلنا يانون العين روّح .. سدى

مع السلامه وروحي قد ما تقدرين
نبي المسافه تكون الين ابعد .. مدى

حتى لو البعد خلف دمعتين وحنين
للذكريات الجميله كل شيٍ .. فدى

وابيك بعد المفارق تدركين حاجتين
ما عاد حنا حبايب بس ماحنا عدى

[نـوره @nlj2ii]

ذكريات الوقت الاول ولذات العمار
في طوارف ديرة ،، ليتني ماجيتها

في مرابيها زرعنا المحبه والوقار
وساعة مايعرفون العرب توقيتها

دمعة الحرمان حولتها تال النهار
يوم مريت الحسى العصر مامريتها
ً
ماهقيت انه يجيني من الحب انهيار
لين شفت الشارع الي يودي بيتها )؛

[نـوره @nlj2ii]

يطول الوقت بـ غيابك بدون قياس
يا ليت الوقت يقصر مثل تقصيرك

على درب المحبه .. معلن الافلاس
و آخاف إن قل وصلك قل تقديرك

تركت القلب عايش بين هم وياس
ولا تقدر .. تبرّر لي معاذيرك ؟

لا تجبرني اشوفك مثل كل الناس
و أنا ماودي آشوفك .. مثل غيرك

[نـوره @nlj2ii]

وانت يامسك البدايه ويامسك الختام
ماطرى لك تسقي اللي من الصدّه ذبل؟

ليه تبخل بالمشاعر وتبخل بالكلام
وانت جدانك من الجود يعطون الابل

عطني من الحب بالصاع ولا بالجرام
واعتبر مكسبك مضمون لو قالو خبل

الربا فـ الحب ماهوب عيب ولا حرام
لاعطيتك حب واحساس..رجعها دبل

[نـوره @nlj2ii]

كل اصدقانا اللي مقابرهم ورى الصدر الكتوم
ما ماتو بـ حادث مروري ماتو بـ حادث ثقه

سقف الهقاوي وهّـق عيال الحراير والقروم
خلا النشاما بين سندان الردي والمطرقه

واللي ماهو بـ الله ترى مافيه خير وما يدوم
كم رغبة في عنقها علّقت حبل المشنقه

[نـوره @nlj2ii]

ياورد جوري ما تخاف من الذبول
ترى ليالي الود ماهي ثابته

كثر التغلي يغلق أبواب القبول
ويقطع عروق تو ما هي نابته

كانك عروب وفالهوى خيلك تجول
قل ما تبي و الحب حن عرابته

ترى العيون تقول غير اللي تقول
والقلب نظرات العيون إجابته

تقول ماحبك وقلبك في ذهول
من قو كذبك رافعٍ سبابته☝🏻

[نـوره @nlj2ii]

تذكر يوم اخليك اتباهى كبرياء وغرور
يوم اني اتحدى بك وآخيب هقوة الهاقي

وتذكر يوم اعذرك وانت لا صادق ولا معذور
أدورلك عذر وأصدقه وأكذب احداقي

وتذكر يوم جيت من الحزن متضايق ومكسور
فرشت لك الضلوع وقلت لك يا سيد عشاقي

- محمد جارالله السهلي

[نـوره @nlj2ii]

في هامش البال -والذكرى محطة عبور-
أنا أكثر الي عرفك وعايشك عن كثب

كنت الكلام الجلي ما كنت بين السطور
الي يحث السكون ويستثير الصخب

لك البقاء من مسيري بك ليوم النشور
قيفانك أركان .. وأوزانك عريبة نسب

ولي منك ما يستفز من الشعور:
«الشعور في كل لحظة تجلي وارتعاشة هدب»

[نـوره @nlj2ii]

لا تحقرين القليل اللي يجي ب الغرام
انا لو اقنع بصوتك .. طالع ب فايده

عمري فدا نبرتك ( 20 ) عام
النبره اللي تجيب الفكره السايده

قلبي عليك انتي لحالك .. يرد السلام
ويعس جول الظبا ويشوفك القايده

إن مت فيك اشكرك على بلوغ المرام
حتى لو اموت فيك بجرعةٍ .. زايده

[نـوره @nlj2ii]

طويت الرشا عن ماردٍ ما بهج ظاميه
وصدّرت يوم النفس من مشربه طابت

هقينا وخاب الظن في من هقينا فيه
ولا فيه اغث من الهقاوي ليا خابت

[نـوره @nlj2ii]

صباح الخير اما بعد
«مثل يوم أبيك ولا لقيتك - تراني ذال
يجي يوم تبغاني ولا عاد تلقاني »

- ياخوفي ما عاد يسعفك تحسّافك، يامال الغناه (:

[نـوره @nlj2ii]

تثيقل وانا اثقل من هويته ومن هاواك
وتمننّ وانا اكثر واحدٍ يكره المنه

على كثر ماسريت مدري وش اللي جاك
علومي عفاك وجعل من جابك الجنه

على مواصلك يازين ولا على فرقاك
جبرت الخفوق اللي جبرته على الونه

[نـوره @nlj2ii]

انا وانت عشنا في خلافات تحت وفوق
وتعاطيت جرعة الزعل لين ما ادمنته

وحاولت ما نترك بعض والقلوب تروق
وبغيتك تزين شي لكنك شينته

لما قلت لك سر هبيته بخور السوق
و انا سرك اودعته ضميري وامنته

انا صدمتي في عشرتك وجهها مصفوق
مثل فجعة الرجال في اخته وفي بنته

[نـوره @nlj2ii]

لدّ النظر يابو العيون اللي نهايتها احتلال
ملامحك لا شافها المخطي يبادر بالعذر

انت اليقين الراسخ اللي ما يشوبه احتمال
وانت الثواب اللي تجلّى لي بعد شدّة صبر

من حقّق اللّٰه حلمه ونالك رغم أنف المُحال
يستاهل يعيش الحياه وبداخله نشوة نصر

[نـوره @nlj2ii]

ياكثر ماكنت أزيح الناس ما أزيحك
طرقت بابك، وأنا الأبواب ما أطرقها

قدام وجه اللقى، صادفت تلويحك
حاولت الاقي بوجهك بسمة أسرقها

لعبَت الأحلام في كرسي مراجيحك
"وكفنتها وأنت تضحك يامفارقها"

اشعلت من جمرة الفرقا مصابيحك
واقفيت والجمرة بيمناي تحرقها.

[نـوره @nlj2ii]

تكيدين كيدي جعلني ما اعدم ذا الكيد
ترا العاشق اللي ما تكيدين له مقرود

يجي عندك الصيّاد ويروح منك صيد
ابا أعرف وشلون الغزاله تصيد فهود؟!

[نـوره @nlj2ii]

خل الي بيني وبينك مثل خط الطبيب
ما يعرف قراية حروفه الا الصيدلي

[نـوره @nlj2ii]

وش تبي آمر ولبيك يا الوجه الضحوك
أنت ما تستاهل تحس ب إحساس العنا

لك بقلبي عرش الآسياد وأحكام الملوك
شيل من ودك تشيل عساهم للفنا

ماينافسني بمحبتك بعد أمك وأبوك
غير أنا وأعوذ بالله — من كلمة أنا

[نـوره @nlj2ii]

الوجه هاذا صدق ولا منتحل ؟
و الواسعه ذي عين ولا آنيه ؟

والواضح ان الحور ف الجنه تحل
وشلون جيتي ف الحياه الفانيه ؟

يدور حولك نحل .. قولي للنحل
ماني رحيق ولا قطوف دانيه !

ويدور حولك كوكب ، الظاهر زحل
قولي له ان الشمس وحده ثانيه .