غادةٍ ،، من خيوط الشمس سربالها
في نحرها ، نحر قلبي ، قلادة عقيق
ما يحسد القلادة غير خلخالها
مثل ما يحسد المسجون حرٍ طليق
وسّدتني هبايب من عطر شالها
ليه يا ابن الغمام ! تحّب بنت الرحيق
لو عطتني حياتي حظ سلسالها
كان يمكن توسدّت الرقيق الدقيق
- سعود مهدي
زفّك النور في صبحٍ نسيمه خزامى
غرّتك من يصبّحها لقى ما تمنّى
عودك مْن الترف ياما تثنّى وياما
أهيف ٍما أستقام إلاّ عشان يتثنّى
جابك الله مثل غيث ٍمزونه تهاما
ترتوي من هماليله عروق المعنّى
جيتني كنك الماء لا تساقط على ماء
ديمتك ممطرة منّا ومنّا ومنّا
يكفيني اللي وصلني لا تناديني
بعَد تركتك دخيلك روح واتركني
إلى متى اخْفي همومي عن محبِّيني
يا فَرْحي الظاهر ويا جرحي المَكْني
خلاص ملِّيت واللي فات يكفيني
الدرب كايد وحمل أحلامي أنهكني
لا تَرْجي الشوق لديارك يودِّيني
هذاك قبل أعرك الدنيا وتعركني
كنت إن سمعت بهمومك دمَّعت عيني
واليوم صارت دموعك ما تحرِّكني
حتى الهوى اللي تسيَّد في شراييني
صرت أملك أمره بعد ما كان يملكني
لا احترت قمت أتشاور بيني وبيني
ما عاد أحد في قراراتي يشاركني
ولا ضاع لي حقّ قمت أشره على يْديني
ما عاد يربكني اللي كان يربكني
أجي لدوَّامة الذكرَى برجليني
بسّ أتحدَّى بقايا الشوق تدركني
من بعد حبك تغيَّر كل ما فيني
خالفت منهاجي اللي كاد يهلكني
وأضحكني اللي من أول كان يِبْكِيني
وأبْكاني اللي من أوَّل كان يِضْحِكني
خلاص واللي وصلني منك يكفيني
ما دام حبّك تركني روح واتركني