قصيد

[فيصل القاضي @Faisalqadi]

ترى اللي يرتجي " رَدّ الزياره "
مثل من يحتري لحظة ذبوله

[فيصل القاضي @Faisalqadi]

يا صاحبي والوقت عجله ثوانيه
حرام اعيشه بين ليت و لعلّه

العذر ما ينفع سوا قلب راعيه
لا تعتذر لي من بعد كلّ زلّه

ماني رفيقٍ لـ العتب والمشاريه
معذور من قبل إعتذارك تسلّه

العمر واحد ليه اضيّع مساريه
بمخاصمة خلقٍ يحاسبهم الله

كلّ الطويل مْن السواليف ما آبيه
بعض التفاصيل المُملّه ، مُملّه

لو عين كل شخصٍ تبيّن خوافيه
ما كان دوّرنا الحجج والأدلّه

يا خافقي واللي رحل لا تناديه
اللي يجافي درب لقياك خلّه

واللي لقينا في شتانا الدفا فيه
حنّا ظلالٍ في هجيره تظلّه

يا هاجس المشتاق لا مرّ ماضيه
ما يرجع اللي راح بالعمر قل له

اليأس ما آحبّه ولا آحبّ طاريه
كنّ الأمل قلبٍ وصدري محلّه

والشكّ لو مدّ العمر بين اياديه
عندي يقينٍ يكفي الكون كلّه

خلّ الحياة تداري اللي تداريه
محدٍ عرف سرّ الحياة و وصل له

هذا الطريق يضيّع اللي يعاديه
واللي يجاري مجرياته يدلّه

يا ربّ انا لي قلب وجله خطاويه
ما عاد يبغى غير ظلّك يظلّه

[عبدالمجيد الذيابي @Sh96F]

القلب مال بخيل ماهوب مضمون
يدراه واللي يحرقه شخص ثاني

اثر المحبه جملت احزان وطعون
والله مايفرحبها غير اناني

ضحكت يوم ان اكثر الناس يبكون
وبكيت يوم انه ضحك لي زماني

والناس ونجوم المجرات والكون
تروح وتعوّد وانا في . . مكاني !

[عبدالله السراهيد @Alsraheed]

أما الكلام اللي من الروح للروح
ولا السكوت اللي يكون بـ محله

ما فالجهات الاربعة باب مفتوح
أكرم ولا آوسع باب من رحمة الله

العزلة اللي كانت : اتعالج جروح
مع الاسف صارت سبب كل علة

والضيقة اللي كانت تْمرّ وتروح
صارت تمرّ .. وتاخذ اليوم كله

[𝗔𝗹𝗶 𝗯𝗶𝗻 𝗛𝗮𝗺𝗱 @6oqll]

ياشين الشعور اللي مايشرحه وزن وقاف
ماتشرحه غير الدمعه اللي من أعماقي

أنا أعاني من الوحده وقلة الإنصاف
و أعاني من أشياء فاتت تضيق أخلاقي

وزهرة شبابي ذابله والعمر طواف
لا ماتت ماهيب تبيح من حضرة الساقي

يمر الكلام اللي من الشامت الجحاف
مرور الخريف اللي معه تسقط أوراقي

يبي يكسر المجداف من قال لي مجداف
انا لي سنه يا دوبه يْشيلني ساقي

بديت ازهد بدنياي واللي يضاف يضاف
ولا ظنّتي بـ اشقى كثر مانيب شاقي

تعدّيت مرحلة التحسّف على اللي طاف
انا هالسنه صرت آتحسّف على الباقي

ما غير ارجع لطاري و ذكرىٍ تركت خلاف
ولو خوّة الذكرى مهي خوّة شلاقي

هنا اخر لقاء و اوّل محطّات الاستنزاف
مكانٍ كراسيّه تسولف عن اشواقي

عطيته سنين و قلب و ابيات ما تنعاف
و رجّع لي ابياتي ولا رجّع الباقي

انا بآخر ايامه سمعت الكلام الجاف
وكذبت سمعي لو تشهد له احداقي

وبعد ما نطق في تالي الليله اسمي حاف
" عرفت انه العربون في ليلة فراقي "

[مُلهِم @7ilbin]

يابو قلبً اطهر من ثيابك ليا صليت
ويابو ضحكةٍ من تبتسم يبتسم كوني

ويابو وجهٍ يغار القمر منك لا طليت
وش العمر من دونك ودنياك من دوني ؟

دخيلك ليا من جابني طاري وحنيت
لا تذخر من احساس الوله شي لعيوني

معاك المشاعر طبقت خطة التكويت
تمنّيتك انت و واجد اللي تمنوني

[عويد النجود @owaid_123]

وش اللي سرق من صوتك الحب يا مملوح ؟
لمحت الغلا مفقود من قسوة النبره

اسولف معك ما كن لي فـ السبب مصلوح
وانا والله انها خانقه حلقي العبره

دخيلك لا ترجع لهفتي رجعة المكسوح
ابي صوتك يعوّد علي مثل ما اخبره

ما دورت غيرك يوم غيرك تجي وتروح
على القلب ما تلقى لها دربٍ تعبره

مع الناس قلبي شايبٍ لا جلس مسموح
لكنك لا جيته فزّ لك جاحدٍ كبره

معك من تهاليل الغلا ما يرد الروح
مثل ما معك هجرٍ يحده على قبره

[حُب و قصيد @3nzi26]

ياللي عليك من الرضا والمشاريه
ما يختلف في حكمها كل قاضي

مرّه زعول ادناة حاجه تبكّيه
ومرّه تقول إنه على طول راضي

ارتاح من صوبي وقل ماتخفّيه
عمر الغلا ماهوب عمر افتراضي

قلبي لغيرك شي ماهوب ف ايديه
وأبعد عليه من السما للأراضي

أبطى وهو قبلك يخمّه ويخطيه
وأقنعته إن ما كل لاعب .. رياضي

الناس من بعدك هلا وأنت لبّيه
الحاضر أنت وماضي الناس ماضي

لا تنشغل في غيرك الله يخليه
واليا انشغلت ابنشغل معك .. راضي

فاضي وابحاتي معك من تحاتيه
حتى لو إني كنت مانيب فاضي

[قصيد @p27na]

يقول وليد البحيح :

يا ليل قولي كم عدد ساهرينك
دام القمر نوره على الارض وضاح

ليتك رجل والله لا اقبل جبينك
لانك سترت الدمع يوم الدمع طاح

[محمد مناور النفيعي @mhmd_mnawr]

يوم السماء تعزف مقامات الهزيم
جتني من المنشا تسوق نصوبها

غرّاً يدثر ثوبها الماء والنسيم
اخلت سبيل الشمس قبل غروبها

دعوة يتيمٍ بين زمزم والحطيم
لا صافحت يمنىً تغَسل ذنوبها

تعوّذ شفاها من ابليس الرجيم
وغواية ابليس الرجيم دروبها

غيداً بعدها سموا النسوه حريم
كسرة خواطرها و طرّ جيوبها

لعيونها العشاق فالوادي تهيم
والنار ترتع في خضار قلوبها

ناسٍ تزعّلها ب ضربٍ فالصميم
وناسٍ تواسيها على مكتوبها

حِفّت مفاتنها بثغرٍ كسر تيم
كنّ العسل مستخلصٍ لاسلوبها

ووجهٍ يبدد ظلمة الليل العتيم
اليا انكشف يجهر نظر محبوبها

وقدٍّ لاهو مايل ولا هو مستقيم
الله يعين اللي يفصل ثوبها

[قصيد @p27na]

أسوء الناس ترى فيهم العداوة ولا ترى اسبابها
يقول سعد علوش :

ترى العدو المبين يستحق الاحترام
العلة اللي عداوتهم .. يخشونها.

[عبدالمجيد الذيابي @Sh96F]

أيدّيننا اللي تجود وروسنا اللي تشوش
من الظروف الصعيبه ماهي بحايره

مدربتنا الليالي لين صرنا وحوش
دمينّا من خلقنا الله وهي فايره

انصادم ضروفنا كنّا نصادم جيوش
ياما ضحكنا من الدنيا وهي جايره

ان جاتنا بالمعزّه جيّت اغلى الطروش
وان غيّرت ماقبلنا العمله البايره

لو شفت ناس تذل نفوسهم للقروش
بعض المواقف علينا ماهي بصايره

حتى لو ان الزمن يبغا يسوي رتوش
ماعاد يقدر يغيّر حاجةً سايره

نمشي ورا احلامنا هدّه وردّه وهوش
ونزبن على الله اليا دارت بنا الدايره

لانلتفت فالخدوش ولاعيال الخدوش
والكلمه الثابته والكلمه العايره

بعض السواليف تمشي عرض تدور بوش
وبعض السواليف نلقطها وهي طايره

مانحتزم بالضعيف اللي يكت الفروش
لو نايحات الليالي خيلها غايره

ترا الضعيّف سواة البندق ام النقوش
معلّقه مير مافيها ولا ثايره

[الكوتش - MSH مِشْ @m10_sh10]

المقطع اللي احب اسمعه كل يوم الصبح لانه يرتبني ويقوين

[محسن بن مترك @aprvip]

انا شاعر ٍ لا يمكن يقيّمه شعار
الا يرجع العود بن جدلان لـ الساحه ):

[علي الغامدي @alghamdi_ia]

اللهم صل وسلم على نبينا محمد

[قصيد @p27na]

سُبحان الله
- الحَمد لله
- لا إله إلا الله
- الله أكبر
- أستغفِرُ الله
- لا حَول ولا قوة إلا بالله
- سُبحان الله وبحمده
- سُبحان الله العظيم
- اللهم صلّ على نبينا محمد
- لا إله إلا أنت سبحانك إني كنت من الظالمين

[فهد معيّان @fmq333]

سيذكرني قومي إذا جدّ جدهم
وفي الليلةِ الظلماءِ يُفتقد البدرُ

[قرآن| Quran @4vl_p]

{قَالَ رَبِّ بِمَا أَغْوَيْتَنِي لَأُزَيِّنَنَّ لَهُمْ فِي الْأَرْضِ وَلَأُغْوِيَنَّهُمْ أَجْمَعِين}