تباهي وغني واضحكي لايهمك شي
لامالت ظروفك فيك لك من يعدلها
.
بتلقين لك في جوف قلبي براد وفي
هنا منزلك .. والناس تعرف منازلها
.
ماتقدر تزعلك الليالي وراسي حي
لو تزعلك سود الليالي .. بزعلها
يا واحد جابك الله حلم و اعجوبة
الأرض ما تليق بك خذ موطنك صدري
قبلك حياتي ترى ما هي بـ مرغوبة
وشلون جدد وجودك رغبتي ؟ مدري
عن عيني الناس ملغية و محجوبة
ما اشوفك الا سماي . . وكلهم حدري
يانصف عمر الحياة ومبتغى نصف دين
من عاش بك حاضره ماخاف مستقبله
يادعوه مستجابه من حدا الوالدين
يافرحة اللي ضحك حظه وطاب عمله
مايكفي العمر لو عشته معك مرتين
العمر مرّه .. ولا يعتاض وانت أجمله
انتي بوجهي لاتخافين دنياك
عن كل ماضي خوّفك لا تخافين
لو الليالي والزمان يتحداك
لايضيق لك خاطر جعل ماتضيقين
كل الظروف اللي تشوفين تفداك
نامي على راحة يدي لا تبالين
لا يبين خافيك ولا يطلع اقصاك
وانا معك عمري اعيشه بعمرين
معك اغتنيت من الهوى والحب يا مال الغناه
وحبّبتني في ايامي اللي ما هقيت احبها
أنت الحياة اللي عطت للناس معنى للحياة
وانت النعيم اللي عليه الناس تشكر ربها
يا أوفى ويا أحب من بادر ومن واصل
وأعزّ من شيمتي وأطيّب من ظنوني
وجودك يداوي جروحي و يستاصل
الضيقه اللي تحجب النور من دوني
أحاول إنّه ما يفصل بينّنا فاصل
حتى لو إنّ ينفصل راسي عن متوني
أشر على ماتبي ، واللي تبي حاصل
حتى ولو تطلب عيوني .. من عيوني