اخر ايام الغلا عند اول ايام التغلي
يرجع الغافل على وعيه ويسمع من ضميره
وانت يا نجماً هوى من بعد ما كان متعلي
سامح الله كثر ما تخطي علي و اقول خيره
مل قلبي من خطاك المعتمد وانا يا ملي
طال صبري لين شفت ان خطوة الفرقا قصيره
لا انسفّه صوت العتاب وسد غيري في محلي
لا ترجى رجعة اللي بدّل الديره بديره
كنت تقدر تعتذر بـ اطرف عذر و اجيك كلي
لكن اعماك الكبر مثل الوليد ابن المغيره
كم تبعت ارضاك لكن ماتبعني غير ظلي
ف الليال الي تنام بها وانا عيني سهيره
في رياض الحب و بعيرك من النعمه مفلي
وصاحبك حديته يْبرّك على الرمضا بعيره
ما بقالي يوم خاب الظن و اغضت عين خلي
غير تلويحه موادع ، و امر بيع ، و طي سيره
جف نهر الود ما باقي بعد فيضتْه ملي
خذ حصاد اللي زرعته واكفني شره وخيره
والوكاد ان السنين تروح و ابن ادم مولي
منت ناسي صاحبك لو عاضك الله بـ الف غيره
#عيسى_طلق
الليل هذا عرفته قبل ما أشوف فيه
مسالك التيه تمسكني من يدينها
لا لليلي بليل ولا عاد أنا اللي ابيه
حتى الاحاسيس مدري ويني و ينها
غسلت أيدي من الزُلفة و ما تحتويه
من يوم شفت الموادع في عناوينها
يا فاتنة قلبي القلب الهواوي خذيه
فكيه مـن فاتنات ، زايدٍ لينها
في كل يوم تعرض قدام عيني وجيه
ملاعبات الهوى تلعب فساتينها
لكن حشيمه لـ حبك يوم كنت أهتويه
هجرت غيـد البنات اللي كثر زينها
ما يسكن القلب غير انتي و لا يعتليه
غيرك من المترفات اللي تغيضينها
رعبوبةٍ تاخذ اللي نفسها تشتهيه
و مرضيني انها خذت قلبي بـ كفينها
ان طـلة بزينها حتى الدليله يتيه
و يمكن بعد فارعات الجيد تغوينها
مغيّر أغرّب و أشرّق في هواي النزيه
على لحون القصيد اللي تغنينها
جبت ألها طرقٍ تحبه و قافً تبيه
عشان تستوعبين ألها و تقرينها
الطرق هذا حزين و خاطري لك عليه
ياللي تعرف الطروق شلون تلحينها
جـرّه ليا مـرّ طاريها يالين أرتويه
بـ أعلاج طعون صدري من سكاكينها
مات الهوى بعد كنا بالوصل نحتويه
و ماتت طموحاتنا في سن عشرينها
تغافلتني على غرّه لكن صدق ليه
أنا ما ضريت سمعتها ولا دينها
خايف عليها من المنقود لا تقتفيه
حتى يديني ما شبكت يوم في يدينها
لكن خسارة غلاي اللي وقفت أحتريه
على دروب الرجا اللي ، ما تمرينها
خلتني أبكي ندم و اشوف نفسي سفيه
و خليتها تلعن الساعات في حينها
اللي مضى راح جعله فدوة اللي يليه
لكن ليالي هوانا كيف تنسينها ؟
لو يكذب لسانك تبث امرك مغاريف الكلام
النظرة اصدق من صدوق الغيث لا منه هما
وش خانة ديارك وبستانك وريفك والغمام
ان كان ساكنها يعاني من جفاف ومن ضما
اصدق مثل ماجيت لك صادق وخالفت النظام
واغضبت لرضاك الحليم وبعت زمره و لزما
الصدق ساس ، وبيت ماله ساس لو يبنى هدام
ريح الشكوك اتهد جدرانه ولو سقفه زما
ماودي اقفي عن موارديك وانا ذودي حيام
و تروح عشرتنا مراح الكحل فـ عيون العما
انا دخيلك دام باقي لك معي قدر و مقام
لا تترك صحيبك تحت رحمة لعل و ربما
و ان نام قلبك بـ التجي للي عيونه ما تنام
الي فلق بحر وعرج بـ محمد لسابع سما
#عيسى_طلق
يعيش البنادم في خياله طليق عنان
لا شاف الهموم قيود ولا ثقل حمله
يبيع الكلام ويشتري راحة الكتمان
اذا ازرا يعين فالعرب شخص يفهم له
وانا الي لي الله من دجى الليل والخذلان
معي هم دوم جيوشه تجدد الحمله
عجزت اشرح اوضاعي مع اني فصيح لسان
من الهم عاجز لا اعرب الحرف و الجمله
الا ليت لي قدرة ( نبي الله سليمان )
اكب البشر واشكي على الطير والنمله
#عيسى_طلق