粉紅色小屋

大郎頭（Da Lang）x 禾日香（Phang Phang）

台語圖文創作《台語原來是這樣》《台語原來是這樣2：台南生活的台語日常》
台語實驗小說《鯤島計畫》

以台灣為出發點，所作的創作。

[粉紅色小屋 @thauphang]

最近講著一个詞「傷重」，雄雄感覺著，這个詞足趣味。
意思是「所費不貲」。若照字面，應該是某某人著傷、傷蓋大，按呢想起來嘛有影呢～ 所費傷重，有影是有傷著、傷蓋大，華語講「荷包大失血」，「傷重」就明明明。

[粉紅色小屋 @thauphang]

較早布袋戲有一个角色號做「哈買二齒」，所以細漢有時陣就會聽人講「哈買寒」「哈買枵」，將「哈買」當成一句話母開頭。
今年是馬年，春仔就來一張「哈馬好」。祝逐家新年快樂！事事very good（bé lí good）

[粉紅色小屋 @thauphang]

「闢謠」凡勢台語會使講「喝明 huah-bîng」哦！
台語「喝 huah」和華語「喝」無仝，譬如華語「喝飲料」个台語是「啉飲料」，用「啉 lim」來表示，台語、華語漢字「喝」有無仝意思。台語「喝 huah」是大聲將話講出喙，譬如講「喝出喙」、「大聲喝」，所以「喝明」就是將代誌講予清楚，嘛有澄清个意思。

[粉紅色小屋 @thauphang]

「 優越感 」个台語，會使講「風神氣 hong-sîn-khuì」哦！
台語講「風神」、「展風神」有足愛展、臭屁个意思，講著「氣」，有表現外在行事个意思，譬如「激一个氣」就是「激派頭」个意思。「風神氣」就袂輸激一个比別人較贏个派頭，譬如講：「伊个風神氣哪會遐重，實在予人接載袂牢。」

[粉紅色小屋 @thauphang]

「 造謠 」个台語，除了講 「抹烏 」，嘛會使講「皂烏漆白」。
這句話和「指皂為白」欲仝，其實「皂 」是烏色个，若將烏色講成白，意思就是非不明。 其他講法有 「畫烏漆白」 「抹烏漆白」，嚴格講起來是 「抹白」，是按怎會講 「抹烏」？
凡勢「抹烏」是對「白白布染甲烏」來个哦～

[粉紅色小屋 @thauphang]

「邊緣人」个台語，台語會講「孤鳥 koo-tsiáu」。
台語原本就有「孤鳥」个講法，譬如講「孤鳥插人群」，意思就是無人通鬥相共、孤身一人，「邊緣人性格」，凡勢就會使講是「孤鳥个個性」。
凡勢「邊緣人」，嘛會使講「坐壁角个」，譬如講：「我佇阮班算講是坐壁角个，一寡活動我攏無啥想欲參加。」

[粉紅色小屋 @thauphang]

「好為人師」、「說教」个台語，應該愛按怎講？凡勢會使講—「無牌先生」唷！
台語原本講法是：「足愛甲人教。」、「出一支喙」，彼工雄雄想著一个新講法，感覺閣誠趣味，就是「無牌先生」，「先生」愛發音Sensei，就是老師个意思。譬如講：「伊閣來矣，人只有講一句，伊就欲開始做無牌先生甲人教矣。」

[粉紅色小屋 @thauphang]

植物愛不時修剪，按呢會較健康、較旺，毋知有啥物專有名詞會使表示這種行為？煞想著台語這句話：「葉仔無挽毋成欉。」
意思就是字面上，樹仔植物枝葉，若無照起工修剪，就會發了䆀去、走精去，若經過挽葉修剪，顛倒會發穎、愈來愈旺。嘛會使用佇生活層面，譬喻講將欠點修剪掉，代誌才會有好个轉變。

[粉紅色小屋 @thauphang]

https://t.co/G7Ef0Wjhkw

[粉紅色小屋 @thauphang]

「事半功倍、對症下藥」原本个講法，是「食著藥，青草一葉」。
但是有一工，無意間看著一个影片（下底補充），原來有一款斧頭，頭前設計破爿構造，省力省時間。阮感覺若用佇新詞，除了會使號做「破爿斧」之外，嘛會使用來形容做代誌「事半功倍」，譬如講：「代誌處理了真上手，親像用著破爿斧。」

[粉紅色小屋 @thauphang]

「逐擺」，可能逐家攏較清楚，譬如：「你逐擺攏按呢講。」其實「見擺」嘛差不多，譬如：「你見擺攏按呢講。」「見擺攏聽你按呢講」這个「見 kiàn」字，有「每一擺」个意思，有一句話講：「烏鴉喙，見講見著！」抑是講：「你喔...見講見著！」若只要開喙就無好代誌，就是用彼字「見擺」个「見」字。

[粉紅色小屋 @thauphang]

「陌生」个台語會講「生份 senn-hūn」。
譬如講生份人，就是無熟似个人，若是關係閣無遐呢親，嘛會講兩人之間个關係閣誠生份。
若放假放一段時間，收假了後去上班上課搪著同事同學，會淡薄仔有一種生份个感覺。生份另外一種講法就是生疏，一段時間無見面，對一寡人來講，愛閣重新習慣才袂遐呢疏遠。

[粉紅色小屋 @thauphang]

有一工和人開講，對方講著：「彼間店開誠久矣，『原仔』袂歹食呢...」想講是咧講「丸仔」，是啥物丸仔有偌好食？繼續問落去，伊笑講：「無啦！我是講仝款好食啦！」
原來是講「原仔 uân-á」，嘛有人講guân-á、ûn-á、gûn-á，和「猶原」有仝款意思。只是有影足誠咧講「丸仔 uân-á」，感覺誠古錐呢～

[粉紅色小屋 @thauphang]

最近天氣「無啥會寒」，奇怪？明明天氣大寒，哪會「無啥會寒」？其實是「無衫會寒」，所以開始穿厚衫準備過年，序大看著煞講一句：「哦！你穿這領môo-hài个呢！足燒乎？」
聽序大解釋，是形容高級毛料个講法，經過瞭解，原來就是Mohair，日語是モヘア，嘛有人講「毛海」，語源意思就是「上好个毛」。

[粉紅色小屋 @thauphang]

今年是蛇年，蛇个文讀音是siâ，所以春仔就來一張「蛇天蛇地」，拄好和「謝天謝地」欲仝。祝逐家新年快樂！

[粉紅色小屋 @thauphang]

「對某事上癮」，會用「癮仙哥」來形容。若是講足興咖啡、足興野球... 譬如講「咖啡成癮」，凡勢會使講是「咖啡癮 ka-pi-giàn」，這个「癮」，會使講是「癮仙哥」，嘛是「癮頭」。親像日語形容足興野球个人，會講「野球バカ」，按呢講「野球癮」嘛誠合。
嘛會使用「咖啡仙」形容，就親像「鴉片仙」按呢

[粉紅色小屋 @thauphang]

若聽故事，講著「過了午夜十二點之後...」內底个「過午夜十二點」台語會講「翻點 huan-tiám」喔！
「翻點」表示時鐘箍一輾，除了表示「過暝時十二點」以外，嘛會形容做代誌做規暝「拚暝工」、「做暗光鳥」，譬如講：「昨暝寫報告寫到翻點。」用佇故事，就是「已經翻點，馬車變倒轉來金瓜模樣矣。」

[粉紅色小屋 @thauphang]

「抽籤」个台語其實會使講是「抽鬮 thiu-khau」喔！
若是台語直接講「抽籤 thiu-tshiam」，會想著是佇廟裡拜拜拈香、抽籤解籤詩，彼款「抽籤」。若是欲表示佇紙做記號、抽一張來決定代誌，按呢台語會講「抽鬮」、「抽鬮仔」抑是「拈鬮 liam-khau」。

[粉紅色小屋 @thauphang]

「被點到笑穴」台語按怎講？
這款情形，笑甲腹肚疼，叫做「著笑脾」。最近攏咧興一齣台語練喙花節目，號做《Talk Talk秀台語》，佇youtube嘛揣會著，看了有影是「著笑脾」，嘛佇內底學著「著笑脾」其他講法，譬如講「抐著暢筋 lā tio̍h thiòng-kin」，足趣味呢！

[粉紅色小屋 @thauphang]

前一站仔看戲看規暝，雄雄想著這詞，華語會講「開夜車」，台語會用「拚暝工」來形容。若是「熬夜追劇」凡勢會使講「拚暝工看戲」，若單純只是講「最近我在追劇」會使講「最近我咧興佗一齣戲」。
若「拚暝工」予序大看著，通常攏會聽著：「閣咧做暗光鳥矣。」會用「暗光鳥」來形容做「夜貓子」个行為。