حسّ الفكاهه و الشغف و التونّاس
( جميعهم ) .. ما عنهم الطير خبّر
احيان يكسرني من النود ، نسناس
و احيان لا همّلت كسري .. تجبّر
في المجتمع فيني من عناد جسّاس
و في عزلتي .. مثل الفجيع المصبّر
احتاج ..و اقفّي .. وانا رافع الراس
كنّ السحايب من جبيني ..! تزبّر
ما احدً لمح في عيني الضعف والياس
على كثر ما اقبل زماني .. و دبّر
ان زانت اوضاعي تواضعت لـ الناس
و ان شانت اوضاعي .. بديت اتكبّر !
النار ماتخر الا نـار
والكفو مايطرد المقفين
وضعيّف الراي و البوار
انحش عن مجادل الاثنين
ماودنا نكشف الاسـرار
لكن تفهم ودقق زين
ما اخس من خوة الشعار
الا علومك يا ابو وجهين
عبدالرحمن فضاء
من مجريات الوقت لادارت رحاه
صرنا نحسّ ان الطمأنينه كمين
حتى الحزن يبي من الواقع نجاه
ما يزبن الا ، في صدور الطيبين !
اللي عيونه ماتشوف الا .. عناه
ماعاد يثرّ في محانيه ' الحنين
من صدّ عن غاليه .. لا بيّن جفاه
يقدر يصدّ مْن الملذّات اجمعين
نتيجة الخذلان , يا ظبي الفلاّه
تلويحة كفوف و بقايا راحلين
اللي عطيناه الثقه .. ربي عطاه
فرصه وحيده ماتكررها السنين
حنّا ثقتنا غاليه .. مثل ( الحياه )
ماتنعطى للشخص نفسه مرتين !
يا ربّ في عاقبة دنياي .. زدني صمود
و ( توفّني مسلماً ) .. و الحقني الاتقيا
دون المشاهي ودون مبيّحات السدود
تفنىَ جميع النوازع .. و الضمير يحيا
اعيَش ما بيني وبين التواضع .. حدود
مع انه ( يليق بي ) .. شيً من الكبريا
جلّ الخصال الحميده تستحق الخلود
بالذات جود الكفوف الي تشعشع ضيا
مآل السخي مثل عمره يوم ينقص يزود
لين اهتنىَ بـ الغناه ..! اكثر من الاغنيآ
دايم ( بيوت الفقارى ) بالمكارم تجود
تلقى الكرم عند اهلها .. ما يشوُبه ريآ
ولاّ ( قصُور البخل ) .. مثل ديار اليهود
فيها حَيا .. بسّ ما فـ وجيه اهلها حيآ !
والله لو ان هموم صدري مساجين
لا اشرّع ضلوعي ، على مصرعيها
ما مرّ بي .. لو مرّ بـ المستريحين
راحت تشيل عقولها ..! في يديها
الوقت ساومني على راحتي .. لين
قررت اثمّن ( راحتي ) ، واشتريها
اثر الدقايق بعضها ، تاخذ سنين
لين نتجاوز ، كلّ ما صار .. فيها
اقسى شعور يراود القلب والعين
يـوم انتذكر حاجةً …! ما نبيها
المستريح اللي ، جمع بين ثنتين
صدرً وسيع ، و ذآكره لك عليها !
على كثر زيف الضماير والوجيه
ماعندنا الا مايعدينا الملام
حنا يدينا ماتجيب الي نبيه
من كثر ردات الجمايل والسلام
مانكتفي بالاحترام من النزيه
حتى الردي نفرض عليه الاحترام
الصمت في وجه الخطا ردً عليه
ماهوب لازم بالكلام الانتقام
صدك عن الزله وسفهان السفيه
يسوي اللي مايسويه الكلام !
الشدايد لعبة كبار الاشدّه
والزمن فتّاك .. والغافل يعاني
يوم يفتك بـ الشفوف وبالمودّه
كنه البرّاض بن قيس الكناني
لو تهادى بين لين وبين شدّه
مالراعي الوجه الابيض وجه ثاني
البشر يظهر مداها بعد مده
لاتغرك في الرخا روح التفاني
ماتخفيّه الصدور سنين عدّه
تكشفه بعض المواقف في ثواني !