عبدالرحمن بن فضاء

شـاعر / ما اكتبه في المفضله .

[عبدالرحمن بن فضاء @vnnv911]

@faisalnmaas الله عليييك يا ابو نماس انت مببببدددع

[فيصل بن نمّاس @faisalnmaas]

حسّ الفكاهه و الشغف و التونّاس
( جميعهم ) .. ما عنهم الطير خبّر

احيان يكسرني من النود ، نسناس
و احيان لا همّلت كسري .. تجبّر

في المجتمع فيني من عناد جسّاس
و في عزلتي .. مثل الفجيع المصبّر

احتاج ..و اقفّي .. وانا رافع الراس
كنّ السحايب من جبيني ..! تزبّر

ما احدً لمح في عيني الضعف والياس
على كثر ما اقبل زماني .. و دبّر

ان زانت اوضاعي تواضعت لـ الناس
و ان شانت اوضاعي .. بديت اتكبّر !

[عبدالرحمن بن فضاء @vnnv911]

" ما جهلت إلَّا الظروف و لا عرفت إلَّا الظرافه
لو تقول اليأس وش هو قلت نصف الياسمينه

فيصل بن نماس
@faisalnmaas

[عبدالرحمن بن فضاء @vnnv911]

فيصل نماس موهبه شعريه فارقه عن الجميع و المرشح الاول للقب شاعر المعلقة
ويسلب منه اللقب بهذي الطريقه كارثه كارثه كارثه 🙂

#المعلقة

[عبدالرحمن بن فضاء @vnnv911]

@khalid_oun كل من يعرف الشعر يدري ان فيصل نماس فارق جدا جدا عن منافسينه ونستغرب عدم الانصاف وتغيير الية التصويت علامات استفهام كثيره اليوم

[عبدالرحمن بن فضاء @vnnv911]

النار ماتخر الا نـار
والكفو مايطرد المقفين

وضعيّف الراي و البوار
انحش عن مجادل الاثنين

ماودنا نكشف الاسـرار
لكن تفهم ودقق زين

ما اخس من خوة الشعار
الا علومك يا ابو وجهين

عبدالرحمن فضاء

[الثقافية - أدب @tha_adab]

من هو الشاعر الذي ستُعلَّق قصيدته في مسار القصيدة النبطيّة ببرنامج #المعلقة ؟

[عبدالرحمن بن فضاء @vnnv911]

@tha_adab المبدع شاعرنا فيصل بن نماس المرشح الاول لشاعر المعلقه👏🏻 @faisalnmaas

[فيصل بن نمّاس @faisalnmaas]

من مجريات الوقت لادارت رحاه
صرنا نحسّ ان الطمأنينه كمين

حتى الحزن يبي من الواقع نجاه
ما يزبن الا ، في صدور الطيبين !

اللي عيونه ماتشوف الا .. عناه
ماعاد يثرّ في محانيه ' الحنين

من صدّ عن غاليه .. لا بيّن جفاه
يقدر يصدّ مْن الملذّات اجمعين

نتيجة الخذلان , يا ظبي الفلاّه
تلويحة كفوف و بقايا راحلين

اللي عطيناه الثقه .. ربي عطاه
فرصه وحيده ماتكررها السنين

حنّا ثقتنا غاليه .. مثل ( الحياه )
ماتنعطى للشخص نفسه مرتين !

[فيصل بن نمّاس @faisalnmaas]

يا ربّ في عاقبة دنياي .. زدني صمود
و ( توفّني مسلماً ) .. و الحقني الاتقيا

دون المشاهي ودون مبيّحات السدود
تفنىَ جميع النوازع .. و الضمير يحيا

اعيَش ما بيني وبين التواضع .. حدود
مع انه ( يليق بي ) .. شيً من الكبريا

جلّ الخصال الحميده تستحق الخلود
بالذات جود الكفوف الي تشعشع ضيا

مآل السخي مثل عمره يوم ينقص يزود
لين اهتنىَ بـ الغناه ..! اكثر من الاغنيآ

دايم ( بيوت الفقارى ) بالمكارم تجود
تلقى الكرم عند اهلها .. ما يشوُبه ريآ

ولاّ ( قصُور البخل ) .. مثل ديار اليهود
فيها حَيا .. بسّ ما فـ وجيه اهلها حيآ !

[عبدالرحمن بن فضاء @vnnv911]

@faisalnmaas الله الله الله يابو نماس مبدع وكل بيت اجمل من البيت اللي قبله👏🏻👏🏻

[فيصل بن نمّاس @faisalnmaas]

والله لو ان هموم صدري مساجين
لا اشرّع ضلوعي ، على مصرعيها

ما مرّ بي .. لو مرّ بـ المستريحين
راحت تشيل عقولها ..! في يديها

الوقت ساومني على راحتي .. لين
قررت اثمّن ( راحتي ) ، واشتريها

اثر الدقايق بعضها ، تاخذ سنين
لين نتجاوز ، كلّ ما صار .. فيها

اقسى شعور يراود القلب والعين
يـوم انتذكر حاجةً …! ما نبيها

المستريح اللي ، جمع بين ثنتين
صدرً وسيع ، و ذآكره لك عليها !

[منصور الميخار @almeekhar]

فخامة موطن ما شرّع الدستور والثوره
ثراه اطهر عبير وساسته من خيرة ال سعود
.
نحب اخوان نوره والملك سلمان اخو نوره
مثل حب المفاخر للمروه والكرم والجود
.
من التشبيه بمعزي نعاهد بالولا صوره
يصورها وينشرها المؤثر [ بندر الجلعود ]

[عبدالرحمن بن فضاء @vnnv911]

@faisalnmaas ياسلام يامبدع الله يصح لسانك 👏🏻

[عبدالرحمن بن فضاء @vnnv911]

@faisalnmaas صدك عن الزله وسفهان السفيه
يسوي اللي مايسويه الكلام !

لله درك يابطل 👏🏻

[فيصل بن نمّاس @faisalnmaas]

على كثر زيف الضماير والوجيه
ماعندنا الا مايعدينا الملام

حنا يدينا ماتجيب الي نبيه
من كثر ردات الجمايل والسلام

مانكتفي بالاحترام من النزيه
حتى الردي نفرض عليه الاحترام

الصمت في وجه الخطا ردً عليه
ماهوب لازم بالكلام الانتقام

صدك عن الزله وسفهان السفيه
يسوي اللي مايسويه الكلام !

[عبدالرحمن بن فضاء @vnnv911]

@faisalnmaas صح الله ابداعك يابو نماس👏🏻

[فيصل بن نمّاس @faisalnmaas]

الشدايد لعبة كبار الاشدّه
والزمن فتّاك .. والغافل يعاني

يوم يفتك بـ الشفوف وبالمودّه
كنه البرّاض بن قيس الكناني

لو تهادى بين لين وبين شدّه
مالراعي الوجه الابيض وجه ثاني

البشر يظهر مداها بعد مده
لاتغرك في الرخا روح التفاني

ماتخفيّه الصدور سنين عدّه
تكشفه بعض المواقف في ثواني !

[عبدالرحمن بن فضاء @vnnv911]

@faisalnmaas اذكر شطر لك تقول فيه / الطيب والشعر مني كيف تستغربه 👍 اي والله مهب غريب عليك الابداع يابو نماس👏🏻

[عبدالرحمن بن فضاء @vnnv911]

@faisalnmaas الف الف مبروك يابو نماس ولاهي غريبه مجملنا دايم ومعودنا على المركز الاول