ٰ

لم يسألني احد ماذا حدث ، لهذا كتبت !

[ٰ @whm_7o]

أجاهد الشوق بعد غيابك أعظم جهاد
أي والله أبيك .. لكن المراجل تبي !

[ٰ @whm_7o]

مهما حصل لي في حياتي من اشياء
و عاشت معي من مولدي لي وفاتي

تبقى تفاصيلك : من الالف لـ الياء
و محبتك ، اجمل حدث في حياتي

[ٰ @whm_7o]

من يوم قال الوداع وقلت له طيّب
ما كنه الا سلب من قلبي انفاسه

خوفي تقافى سنيني لين ما اشيّب
ولازال بين الجفن والعين مجلاسه

عليه روحي شتات وعقلي مغيّب
عساه ما يشتكي من حزنه وياسه

يفدونه الطيّب مْن القوم والخيّب
احدٍ فدا سيرته و احدٍ فدا راسه !

[ٰ @whm_7o]

الرقاب منكسه واللحى تقطر دموع
والحزن خيّم على صدورنا واحتلها

يوم صلينا الصلاة اللي مافيها ركوع
كني مصلي على أمة محمد كلها

[ٰ @whm_7o]

طرّف الليل واللي طرّف دموع عيني
موقفٍ كل دمعة فيه جملة مفيده

فيني احزان مدري وش وراها وفيني
غصةٍ ودي اكبتها وتطلع قصيده

يبدو ان الليال الهاديه ما تبيني
مقفيه مثلها مثل الليال السعيده

ضايع تقول شايل روحي براحتيني
منصدم من خدينة روح راحت فقيده

كذّبتني خلاص وصدقّت عاذليني
وانا مدري من العاذل عسى الله يبيده

بكره اتوقع يصحّ الصحيح وتجيني
واتّعذر لي اعذار البنات الجديده

وانا لا شفتها من شوقي ومن حنيني
يمكن ارضى بعد بالظلم ماهي بعيده

ياغناتي مدام ابغاك وانتي تبيني
لازم أعيد معك الماضي الله يعيده

التفّت ليساري والتفّت ليميني
يوم ماشفت مثلك مثل كملت سيده

بايعٍ كل عشّاقي على معجبيني
كلبوهم فدا عينك بديده بديده

انتي اخطاك واجد بس لا تحرميني
كل غلطة تجيني منك درة فريده

من خطاياك صرت اشكي على متابعيني
وصارت الساحة الشعرية المستفيده

قرّبي وابتديني عشق ما ينتهيني
عشقٍ يكون اشد مْن الرياح الشديده

مقدر اعيش من بعدك عمر صدقيني
انتي امنيتي المستعصيه والوحيده

معك قلبي تقول مجّوده في يديني
عقب ماكان طيرٍ صيدة اللي يصيده

حكمة الله هي الإعجاز بينك وبيني
انا كنت اتدفا فيك وانتي جليده

لو تغيبين ما خلا قرينك قريني
مرتبط معك حال وبال واشياءٍ عديده

عقب فرقاك كني فاقدٍ والديني
حالتي حالة اللي شاف موتة عضيده

لا يسرّك بكاي ولا يسرّك ونيني
منهدم كل شيٍ فيني الا العقيده

خايف يضيع ديني كملي نص ديني
نصي الاول تْعرفين ماهوب بـ سيده

[ٰ @whm_7o]

أنا أبحث عن شعور السعاده هنا وهناك
لو أشوف موتي دونها قلت يمديني

بعد ما فقدت الحلم ياقلبي الشكّاك
ماعاد الدروب اللي تودي .. توديني

مزاجيّتي في كل الأحوال ما تخفاك
هي اللي تضيّع كل حاجة من يديني

ما ألومك ليا شفت الهبايب تجيب أقصاك
أنا مثلك أشوف الموسيقى تبكّيني

يامحبوبتي : عمري على طلّة محيّاك
لو يطيح دمعك طاح عمرٍ من سنيني

يا لولا لياليك القديمه ويا لولاك
تركت الحياه بدون أودّع محبيني

من المستحيل أنسى حياتي معك وأنساك
وأنا أشوف وجهك وين ماتلتفت عيني

لا زالت تسرّيني دروبي على مرباك
ولا زال صوتك رغم فقدك يناديني

أدورك في كل الأماكن عشان ألقاك
وأضيييع وتمر أيام ما يندرا ويني

قتلني رحيلك وأنقضى العمر مع فرقاك
تعالي وردّيني من الموت وأحييني

على سور دارك صرت أشوف الورود أشواك
ولا عاد جيّاتي عليها .. تسلّيني

بكى كل طيرٍ كان يضحك على الشباك
يغرّد وكنّه في وداعك يواسيني

أنا منصدم وأعيش يومي بدون إدراك
ماباقي معي من عقلي اللي يقدّيني

أسولف على طيفك وأغني على ذكراك
عسى الله يضمّد جرح قلبي ويهديني

مع إني ماعاد اعرف وين الزمن ودّاك
إلى الآن أقدّس ماحصل بينك وبيني

لو إني خسرتك عمر قلت : السنين فداك
لكن الخسارة .. في حياتي وفي ديني !

[ٰ @whm_7o]

نصيبي من الحب الحقيقي قصيد وطيف
الأول بـ يبقى لي .. و الآخر بـ يتركني

ثقيل الحزن لا صار في كل ليله ضيف
ليا رحت ادور لـ الفرح درب يمسكني

ومن كثر ماني فاقد الضحكه .. مدري كيف
تمنيت لو ( شر البليّه ) يضحكني !

تحلويت طعم العزله الي ماهي بالكيف
مشاعر قديمه .. بالمحبه تشككني

جديد الغلا ياليت لو تمسح الارشيف
الارشيف كذبه بأسم الاشواق تنهكني

الأحباب قبلك في حياتي سحابة صيف
تبريت من ماضي مع الغير يشبكني

تغانم وعطني من شعورك بكم وكيف
و فالقلب ثبتني و فالبال حركني

و لا توقف العاقل على حفة التخريف
عيونك تطمني و ضحكتك تربكني

إذا كنت تجهلني فأخذ مني التعريف
انا درب ماتقدر بوجهين تسلكني

بعيداً عن التشبيه و الكبر والتصنيف
يحق لك بأنك تفتخر يوم تملكني

انا لك حقيقة ماهي بشك ولا زيف
ولغيرك سرابٍ يبطي فـ يوم يدركني

و لو غرتك نفسك و زينك ورحت معيف
و في حرب جس النبض حاولت تشركني

احط لغرورك حد .. وأقول لك يا حيف
هقيتك بتنجيني و أشوفك بتهلكني

تراني عزيز النفس ماني حلال ضعيف
ما ياقف عليك العمر كأنك بتتركني !

[ٰ @whm_7o]

والله إني ما قدرت أنساك بالمرة مع إني
كل يوم أحاول أشغل نفسي بحاجة جديدة

لكن النسيان .. شي أكبر من عزومي ومنّي
يا شريط بذاكرة راسي وراسي يستعيده

وش اقول ووش تقول ليا سألو عنك وعني
مابقى لي لأجل اجاوبهم ولا جمله مفيده

اتمنى رجعتك .. ولا معاي إلا التمنّي
والتمنى للفقير الي جلس على الحديده

وابتسم لا مر طاريّك على بالي وأغنّي
إبتسامة طفل جنب أمه يصلّي صبح عيده

أنت يا اللي منك دموعي ومنك ضحك سنّي
ماقدرت أذوق بعدك طعم الأيام السعيده

ويوم حاولت أمسكك بيدي فشلت وخاب ظنّي
آدمي ، والآدمي ما هو بماخذ شي بيده

كل هذا ما هو بمعناه مابيك امتهنّي
دايم أدعي لك لو يديني عن ايدينك بعيده

حبي اكبر من طمع نفسي بدنيا في تدنّي
الطمع ما زوُد ابنادم ولا نقّص رصيده

والا انا قررت اسكن بريدك بعد ماحبك سكنّي
كل يوم بحط صفحه ، يارساله يا قصيده

مابقى لي من حبيبي شي يرضيني لكنّي
بتشرف وأعتبر نفسي رساله في بريده

وأنت حاول ما تواخذني على إزعاجي لأنّي
كل ماقفّلت موضوعك بدا قلبي يعيده

اعرف إني متّ فيك ليا دفنّي من دفنّي
والحقيقة يفعل الله مايشاء وما يريده

[ٰ @whm_7o]

لا تسأل عن ضيقة أيَّامي وقلبي لا تمره
ضاعت دروبك على آخر ليل وجروحي عطايب

وإن لمحت أسمي ترفَّق به وبادله المبرَّه !
كثر ما بادلك شوق وكثر ما ودّعك هايب

لك على يمة عروق القلب يالمغرور جرَّه
ما تواريها السنين ولا تغيرها النوايب

والله أن قربك يسر الروح وفراقك مضرَّه
وأنت علّة خافقي وأنت القريب من القرايب

هاك ميزان الجروح وقيسها ذرة بذرَّه
ماوزنت الا غلاك ولا طعنت الا الحبايب

كل ما يطري علي ظلمك تشب الكبد حرَّه
كن في صدري رماح القوم وسيوف وحرايب

كيف أبنسى ليلةٍ زعزعت قلبي من مقرَّه ؟
أنفرت كبدي وخفّاقي غدا قبر ونصايب

هلت دموعي وحلفتك بربك الف مره
يابن آدم خاف من اللّٰه ماورا ذبحي كسايب

أنت شخص ماقدرت استوعبه خيره وشره
من عرفتك والدموع دموع والخفَّاق ذايب

لا تصدق كذبة الايام في وجه المسرّه
بسمة في عين طفل ودمعةٍ في عين شايب

أنكسر حلم الليال وطاحت نجوم المجرّه
أبتدت شمس وتوارت شمس وجروحي عطايب

أنت ماتدري ولا عندك من الأحساس ذرّه
أشهد أن مصيبتي بك من عظيمات المصايب

[ٰ @whm_7o]

ماكنت اخاف البعد والبعد راحه
لو كنت اخاف البعد ماكان فارقت

لاكن عشان انسى عطوني مساحه
محتاج لي عزله ، ومحتاج لي وقت

[ٰ @whm_7o]

علامك تجرح خافقي فالكلام الحاد
و أنا ما جرحتك في حياتي ولا مره

[ٰ @whm_7o]

ان ما تلاقينا بموجات الإرسال
لا بدّ نتلاقى .. بـ يوم القيامة !

[ٰ @whm_7o]

الجرح هذا لا يمكن انه يجي منك
شكلك موصّى علي من كل عدواني

[ٰ @whm_7o]

حبيبتي بهجة الدنيا ومحفلها
قلب ٍ خذيتيه مني تستحقينه

الحب رتب تفاصيلي وجمّلها
واضفى عليها السكينه والطمأنينه

خلاني اعمل عمايل ما اتخيلها
واكبر دليل الهيام اللي تشوفينه

من خاف لا يقطف الزهره و يقتلها
هو نفسه اللي قطف لك زهرة سنينه

[ٰ @whm_7o]

رفيقي عن اللي حسّك أرهقني التفكير
أعرف الجزع من وقع الأقدار وش وقعه
ٰ
عسى الله يعوضك في مصابك وصبرك خير
لو إن الليالي شقّها أكبر من الرقعه

[ٰ @whm_7o]

أبد مريت بيتك مالقيتك فالمكان هناك
وتركت دموع عيني في طرف بيتك وداعية

تعال أوادعك وأعطيك قلبٍ ماقوى فرقاك
دخيلك لارجعت من السفر رده لـ راعية

[ٰ @whm_7o]

مايذبح العاشق ويسترجع الذكريات
الا مكان اللقى .. والاغنية .. والعطر

[ٰ @whm_7o]

عادك ليا الحين وأنت الطاري السامي
ياحلو الأيام ، لو كانت معك .. مرة !

[ٰ @whm_7o]

لك في خيالي صورةٍ تبكي العين
ياليتها طاحت .. على جال بابك

ياقاسيه والي خلقني من الطين
اني قوي ، لاكن كسرني غيابك !

[ٰ @whm_7o]

مطرةٍ فاضت على الدنيا شذاها
كني الي قبلها ماني بـ عايش

روحي الي مدري مني من خذاها
يردها طق المطر على الدرايش