جميل أوي حوار إنك قاعد تتفرج من الإنترنت المحدود في العالم التالت، على نتاج الديمقراطية اللي بتنعم بيها أوسخ بلد في العالم بعد ما دمرت نص الكوكب وسرقت النص التاني، والمواطن بتاعها بيتعامل كبني آدم وبيختار ناس منك وشبهك أنت عشان يمثلهم هما هناك. حاجات عمرنا ما هنجربها
بصراحة كلام سليم ١٠٠٪ من مستر أيمن، الوظيفة الثابتة مؤذية للبيزنيس، ومعدلات القلق العالية هي اللي بتزق الواحد لقدام.. عمري ما شوفت حد عنده مشروع نجح غير لما استقال من شغله، مضى على نفسه كمبيالات، إدى عياله للبقال رهن لغاية ما يدفع اللي عليه، دخل في تقسيط طيارة خاصة ويخت في الجونة، هاجر هجرة غير شرعية، نزل في المطرة يدرمغ نفسه في الطينة، بياكل ويمسح في راس أخوه، وأخيرًا أخد قرض المشروعات الصغيرة من بنك التعمير والإسكان وماسددش الأقساط.. ودلوقتي كلهم ما شاء الله بقوا في حتة تانية.. بيتابعوا مشروعاتهم من عنبر ٨ في ليمان طرة.