لا عاد تنشد عن علومي علومي عفاك
الوقت دوار .. و الدنيا سريعة خطا
من اول اثني واوقف لاجل احصل رضاك
و اليوم حطيت من بيني و بينك غطا
عيا جنابي لا يطلب حاجةً من وراك
المعطي الله " ومنك ما ندور عطا "
عرضت نفسي لاجل عينك دروب الهلاك
ومن السماء بـ الجفى حولتني لـ الوطا
العذر رده ورا و العلم مني و جاك
ما عاد ابي منك صح ولا تدور خطا
رَوح من اليوم ما عاد الدعاوي فداك
لا تحسب انها عفو مع كل شوق وبطا
مرواح من تدفعه صلف الهبايب هناك
ولا مراح الفرص مدري مراح القطا
الحمدلله تم قبولي في #شاعر_الراية
و اما بعد :
يا راية الشعار عشق الجماهير
يجون و يروحون ولا دريتي
بس السنه هذي مجي الشعر غير
جاك اسعدي روقي عتيبي كويتي
أقبلت برعودها اللي تصحي النايمين
وقام يمزع سترة الليل نوض بروقها
ليتها تمطر على نجد : نجد الطيبين
وكل شجرة في طرفها تبل عروقها
جعل يسقيها من الغيث همال الغشين
لين تظهر خزنة الارض من صندوقها
نجد : تاخذني عليها الصبابه والحنين
والجروح اللي مع الوقت زاد فتوقها
أخطر جروح المحبين .. جرحٍ مايبين
ينزع أسرار العلاقات من معلوقها
من فقدله وجهٍ أغلا من الناس أجمعين
سـّرته سود الليالي على طاروقها
ودي إني حول داره وأمره مرتين
قبل شمسه لاتوارى وقبل شروقها
مايحببك بديار العباد المسلمين
غير حب اللي سكنها ويمشي فوقها
وإلا أنا لو نجد تصبح ورود وياسمين
لامدّور عن كماها ولا رقروقها
ودي بشيٍ مايوصل لحلقي باليدين
شربةٍ ماودي أموت قبل أذوقها .!
طال الكلام القصير وشّلت ايادي
تغيرت ساعة .. الوقت وعقاربها
لولا الحيا من سلوم وسيرة اجدادي
لـ اسمي الناس بـ اسماها واخربها
انا ما بين البشر في موقف حيادي
اشوف لي ناس مدري وش مأربها !!
الناس جاها مرض معدي ومتمادي
تحارب !! اللي ما عمره يوم حاربها
اللي لسانه ما خلى سيرة الهادي
وشلون ما تشذب الناس وتجاربها
ان جاتك الكلمه اللي ضاربه وادي
( لا تعقل يدينها وتمس شاربها )
جنب وتلقى لها عشرين كدادي
ان ما سحبو راسها ركبو فـ غاربها