يانون وش لي بعد ظلمه تبقى؟
الا الجوى والياس والهم والضيق
عقب الوفا والصدق قلبي تشقى
اهيم في بحر النوى ناشف الريق
متكدر هيمان صب مشقى
وحملت من جور العنا فوق مااطيق
شريان قلبي في غرامك تسقى
والظلم حت غصون قلب مواريق
ترا الجفا عقب الغلا مايحقا!!
ودنيا الهوى يانون حظ وتوافيق ..
بين اللقى والبعد كم خطوة مواريها سراب
مدري بقربك مرتوي مدري ذبح قلبي الظما
كنت الوطن لا مال وقتك ليه أحس بـ إغتراب
كنت أنتمي لك ليه مالك لا ولاء ولا أنتما
كنت أنتقي بين الخطايا لحظة بروز الصواب
كنت الوضوح اللي تشوفه ليه يغريك العمى
كنت السؤال المنطقي لا صارت الراحة جواب
وكنت الرضا قبل الزعل يطلب من الجرح الدما
كنت البراهين لـ سكون الوقت وأنت الإرتياب
وكنت اليقين بعز شكك ليه أشوفك ربما
كنت الشتا يوم المقيظ يمر تلقاني سحاب
وكنت الغيوم اللي تغيثك يوم وبلك ما هما
على رصيف الأمنيات لـ خطوتي ما فيه باب
الا وتقفل يا رفيق أشتد ساعده ورمى
صار الرحيل أكثر هدوء بدون عثرات العذاب
ضاعت عناوين الأمان وخطوة أمجاد الحمى
ذاك الشروق اللي تخبره ما بقى بـ نوره عتاب
طاح الشفق غرب الأماني وأنطفى ضي السما
أما بعد هذا الشطر في داخله آخر خطاب
« فمان الله يا طموحٍ في سنيني ما نمى »