يا سيد الناس لك وسط الحنايا مقر
يضيق لا غبت عنه ويفرح بجيّتك
مره والى جيت لا تجعل مجيك ممر
والله ما يبغا من الدنيا سوا جيّتك
ياعين حرٍ على روس المعالي شهر
ترا القسا ما يليق بلين شخصيتك
العمر من غير وصلك ما يسما عمر
واكبر ضحاياه قلبٍ عاش به ميّتك .
كانت افكاري تحب احلامي الورديه
و تالي اكثر لون افكّر فيه لون الشاهي
كل شي ابيه واجد صرت ابيه شويّه
النزول بـ سقف رغباتي جعلني راهي
اهتمامي قلّ في حاجاتي الشخصيّه
و اهتمامي زاد صوب الجانب الإلهي
السلام الداخلي و الراحه النفسيّه
من ملكها ما يهمّه فـ الحياه الا هي
اللي يدور ورا المقفين ضحك الحجاج
يعيش و يموت و اسم المجد ما يشمله
يسد .. عن كثرة التأييد .. و الاحتجاج
الفعل منْه اندّره .. و القول منه اجمله
عشان الإنسان يكسب له هداوة مزاج
لازم .. يوسّع نطاق .. ( السلّه المهمله )
سوالف الناس من عقبك حلاها قليل
تعال سولف علي حتى يبين الفجر
محتاج لـ الضحكه ولـ الهرجه السلسبيل
اللي تلين فواد اللي فواده .. حجر
سولف على الضايق اللي فيه تكسب جميل
جعلك بعد كل من واصل ومنهو هجر
وإن زعلتي مابقى للعمر والتاريخ قيمة
والأسف سكّة طويلة لين يركع بـ إتجاهك
اذكريني نار بدوٍ في لياليك العتيمة
وقبل أشد ركاب جرحي كنت أبشد إنتباهك
يا انتصاري في طريق الفقد، ودروب الهزيمة
حالف إني لا ارسم البسمة على طارف شفاهك
ظروف بقعا ما تكل ولا تلين
ووجيهنا ما هيب حصادة علف
نصافح كفوف النشامى باليمين
ولا لنا في معهد الحمقى ملف
الصدق ينجي صاحبه دنيا ودين
سترة نجاةٍ ما يجي فيها تلف
والكذب يطرح صاحبه لو هو فطين
يكشف خفايا حيلته فـ أول كلف
ترا الكذوب ألعن من إبليس اللعين
إليا درى إنك كاشفٍ وضعه حلف
أعوذ بك يا رب من خلْي النفوس من الأمل
و أعوذ بك من جهد لا يثمر ولا هو بـ مخلوف
يا الله لا تجعلنا ضعافا .. لا علوم ولا عمل
ولا اضعفا عند اقويا ولا اقويا على ضعوف .
يا شعاع الشمس في ظل الشعور اللِإرادي
الوهم لا طالت المدّه لبس ثوب الحقيقه
السواد يخلّي الابيض يجي لونه رمادي
والهموم تحط عمر الثانيه مثل الدقيقه
المشاعر نحتديها بالسلوم و بالمبادي
واللي افلتّها الضما من قبضته ماتت غريقة
الليل موحش و إبتساماتك النور
و وصلك هنا قلبي و عينك رحابه
منّك عرفت العمر بـ أحساس و شعور
و عرفت بـ إن الشعر فن الخِطابه
يا غايتي إن لَم تكوني من الحور
عندي يقين إنك سُلالة سحابه .
انا من بديت افقد من احساسك الانصاف
لقيت العمر باهت .. والاحلام منذبله
من اول كلامك كلّه من الالف للكاف
شهاليل نوٍ . . نافر النبت من وبله
من اللي معلّمك القسى والكلام الجاف؟
بعد كنت ارقَ من النسانيس من قبله .