k

شرح المعروف إهانة للسامع .

[k @8sccc]

يالله استرني بلطفك دام سترك ثوبي
واغفر لعبدٍ كساه الذنب واصفح عنه

ما لنفسي غير نورك في ضلال دروبي
والمنى عفوّك وحسن الخاتمه والجنه

مذنب ولاجيت اقارن رحمتك بذنوبي
اذكر ان ذنبي عظيم وعفوك اعظم منه

[k @8sccc]

منطقية حياتي ما تعرف الحياد
غصب عني أكابد بالعمر و أجتهد

والمفارق ما يعني بأن قلبي جماد
العلاقات رزق إن ما صلحت أبتعد

الحشيمه بتبقى لو يروح الوداد
بحفظ العشره بقلبي و أصون العهد

[منادي @s11i77]

لا جيت اعاتب بالهوى واتشرّه
و لارحت اباخذ بالغيابات ثاري

لله .. درّ الصمت .. لله .. درّه
مابه حسايف لو جروحه ضواري

لاضيقةٍ تكسف عيون المسرّة
ولاعتيمٍ تقتفيه المساري

قلبي لا هو بارد ولا فيه حرّة
وبالي خليّ من العَسس والطواري

هذي سواحل راكد الدمع مُرّه
يوم اجحفت في حقّ اهلها العباري

تسري رجاوينا على حين غرّة
والحرّ مايبلش بصيد الحباري

[وهّاج @_3jim]

إن تكلم ودك .. تقابله و تلد فيه
و إن سكت ودك تجيه و تحبه مع فمه

_ بندر الدويش

[حاف @lastiidea]

في حال كنت تبحث عن قصيدة "تقوطر" عذوبة.

[عجّاب؟ @w4iie_]

لا طاح عزم الضعيف و شان وجه الحياه
مثلي و شرواي ما يرضى يعود ورا
- فهد بن خشمان

[بسطام @______H55]

راحت / و ضاقت بأثرها واسعات الديار
من بعدها ما لقيت بوسعها " ما يسر " )؛

[سِيـن @lsriill]

- أعمق ما قيل في الأم :
«ظنّي لو أترك فرضٍ صلّت بدالي
تخاف ربي لا يعذب ضنّاها»

[فراج بن عبيد الغصن @fraj2253]

اللي عن الناس كافي خيره وشره
ماهوب سالم من الناس وبلاويها

مابين كل الجراير عان لي جره
ما يقدر الوقت لامن غبت يمحيها

ما غرني واحدً يطرد ورا الغره
ولا خبولً عسى ربي يعافيها

مره اغوص البحر واستخرج الدره
ومره بحور القصيد اعيف طاريها

لا عاد تشره علي يا صاحبي مره
ما كل حاجه تسويها بسويها

انا من الظغط والقليون والحره
تجيني اشياء ما اعرف ويش اسميها

ماضقت من صدري اللي كاتمً سره
ضايق من اعيوني اللي واضحً فيها

داري على خاطري يا الدره الحره
والنفس عقب الخطاء اللي صار داريها

وجهك محلي ظروف ايامي المره
وصوتك لاجفت عروق القلب يسقيها

فراج بن عبيد

[تركي العطاوي @turkioll]

ترا المراجل قلب ، وذراع ، وعزوم
نستثني ( اشباه الرياجيل ) منها

تباّعة المقفي ، وكرارّة النوم
ذي تسقط فروض الرياجيل عنها

[مزيد الوسمي @mzed_9]

عليك من النواظر بردها ومن الكتاب الوِرد
ومن عذب الوصوف اللي ترد الحبر للأقلام

وش الحظ السعيد اللي رماك بدون سابق طرد
أثر مانيب عايش لذة الدنيا قبل ذا العام

خذيت اقسى مشاوير الطروق المجدبات الجرد
وتركت عدودها اللي ما تعوّد بالركاب حيام

هجرتك كن ما صوتك ربيع ولا كلامك ورد
ولا لك في سموعي سالفه يومٍ من الأيام

اخاف اذكرك حتى بيني وبيني لاطال السرد
ويلقونك رهين الذاكره والحلم والأوهام

ولكن من تمام حظوظ شعار الدفا والبرد
معاذيري عن بيوت الغزل ومداعب الأنسام

انا لو ما اختصار الكون كله في سعادة فرد
لقيت ايديّ وحده في اليمن والثانيه في الشام

[بوح غفراني @bo77_1]

تبور .. المعادن .. والذهب مستحيل يبور
ومن يضمن ان عنده ذهب يضمن ارباحه

لامات الغصن فـالواحه اّثر على العصفور
مع ان .. موتت .. العصفور ماضرت الواحه .. 🕊️

[- @Dll7n]

بين رحلة غرامك وأتخاذ القرار
كنت جالس معاك وداخلي معركه

الليال الأخيرة ما عليها غبار
عشت فيها معاك وشفت فيها بركه

لو تركت السنين اللي بدون أنبهار
قلبك اللي بهرني عشق كيف أتركه

من بداياتنا لين الزعل وأنت مار
كل ضحكة هنا ما كانت مفبركه

[مهّوس .. @c_2f]

يا صدري المكتوم والدنيا رحاها يستدير
وانا تعبت من الحياه بـ عرضها و بـ طولها

مدري تراكم من حزن ولا جروحٍ في الضمير
يا حظ ناسٍ " ما يدور الا الهوا في عقولها "

تلعب بي الدنيا وانا مالي جناحينٍ تطير
واقف لها .. لو كل يوم يكرني شهلولها

ما اخترت اكون ابخل غني اخترت اكون اكرم فقير
دام الاوادم " تكبر اسماها بكبر فعولها "

خذيت من ظهر البعير وجزت عن قلب البعير
ما شلت حقد الناس لو متني يشل حمولها

لو تسال شلونك بقول بخير لو ماني بخير
والله ما اقول الكلمه اللي مستحيل اقولها ..

[سِيـن @lsriill]

- -أما بعد -
من تذكرني على صفوة مزاجه
ينتظرني لين " يصفى له مزاجي'

وعلى ما قال :
لا تهملني بمزاجك وترجع لي بمزاج
أنا لا عفت وصلك ترا ما أعجبك

[k @8sccc]

َ مرحباً أما بعد:
مقوله عند البدو قديماً تُقال
لما يمر بيومٍ سيءٍ:
« ما كل يومٍ للنشّاما عيد »

لذلك لا بأس يا القلب الشجاع
وقيل في سياق ذلك:
ما بعد عسر الزمان إلا تيسيره
لو سود الأيام تغشينا حواقيها

[k @8sccc]

لطموح المرتفع والعزم والعنفـوان
ما بقى في اطلالها .. الا خلايا ميته

[عبدالعزيز العبلان @azizalablan]

طويت السنين وخاطري ذا السنه يادوب
وانا الشاطر اللي غلطته .. غلطة الشاطر

كثر ما سرح قلبي بحلمٍ ماهو مكتوب
كثر ما تعدته الليالي .. وهو ناطر

ماعاد احتمل زلة رفيق وخطا محبوب
ولا افرح لغيم .. ولا اتشفّق على ماطر

ماغير اتسلى بالهجيني ، وبالمسحوب
عسى فالقصايد ما يفرّج على الخاطر

[سِيـن @lsriill]

أجمل ما قيل عن ترك الحاجة وهي لا زالت بالخاطر

ويقول رشيد الزلامي :
عروق قلبي يا السديري معاطيش
أمشي وأنا مقفي وأعاين خلافي

رد السديري :
برقٍ يفوتك لو مزونه مراهِيش
لا تستخيل أمطار سحبٍ مقافي

[بسطام @______H55]

عموماً الإنسان يمر بضغوطات نفسيه
مما يؤدي للعزله وضيق الخاطر

وقيل على سياق ذلك :
ضايق وحالي ماش وعلومي علوم
ودي اهج من ضيقتي ومن هدومي

مرهق واعاني هم .. واطيح واقوم
يا ضيقة الخاطر عن الصدر قومي ):