Ayman Alnoaamany

[Martina Magued @martina_magued]

اس اس السلام عليكم، النادي الأهلي جامد عليكم 🤫😜😎🦅
ألف مبرووك يا أهلاوية وعقبال ما نحتفل بالدوري إن شاء الله 🦅❤️

[Mohamed Fares Taman @mohamedfares07]

مصطفى شوبير حافظ على تقدم الأهلي في أهم لحظة في الماتش

عمل Against -the-Momentum Save تصدي عكس اتجاة حركة الجسم وده محتاج رد فعل عالي واستجابة ذهنية

مباراة مهمة لمصطفى شوبير كان محتاجها بعد الخطأ بتاع ماتش جنوب أفريقيا وهنا بتظهر شخصية الحارس .. مفيش لحظة واحدة حسيت فيها انهاردة إن مصطفى كان مهزوز

وأرجع وأقول الأهلي عنده أفضل 2 حراس في مصر ولازم دي تكون نقطة قوة

[Mohamed Fares Taman @mohamedfares07]

الحمدلله على ال 3 نقاط

الحمدلله على الفوز الرابع على التوالي للأهلي على الزمالك

الحمدلله في أخر 4 مواجهات بين الأهلي والزمالك . الأهلي سجل 9 أهداف والزمالك 1

الحمدلله الفوز على الفريق اللي كابتن أحمد سليمان عضو مجلس إدارة الزمالك قال إن هجومه أقوى من دفاعنا ، ودفاعه أقوي من هجومنا

الحمدلله فوز على الزمالك بحكم ألماني وحكم تركي وحكم إسباني وحكم سلوفيني

الأهلي الآن في المركز الأول 1️⃣ والزمالك في المركز التالت 3️⃣

ومفيش جملة أعظم من اللي رفعها جمهور الأهلي وهو بيوصف ناديه " بطل عبر التاريخ " .. لإن دي القاعدة والأصل اللي لا يمكن بلغيه موسم ولا حتى أتنين دي حكاية كتبها الأهلي على مدار سنين ومكلمة إن شاء الله

[Mohamed Fares Taman @mohamedfares07]

فيديو الصفحة الرسمية للنادي الأهلي لدعم الشناوي معمول حلو اوي 👏🏻. نوستالچيا سنين ولحظات مستحيل تتنسي بتعدي قدام عينيك وبتلاقي نفسك مبتسم بشكل تلقائي وحقيقي ❤️

[اكرامي الرديني @Ekramy_4]

#نص_تويته

الشناوي ضوفره برقبة معظم من ينتمي لكرة القدم خلقًا ولعبًا وقيادة والحملة اللي عليه لازم جمهور الاهلي يحميه من الآفاقين اللي حتى محسوبين على الأهلي

[Mohamed Fares Taman @mohamedfares07]

ممكن نقطة نظام ‼️

هو موقف الشناوي مع المنتخب في واقعة مباراة إيران يُحسب له ولا عليه؟

وموقف الشناوي دلوقتي من اختيارات المنتخب يُحسب له ولا عليه؟

بس هي دي الحدوتة!!

الموقفين يُحسبوا للشناوي مش عليه.

الشناوي لما منفعش يلعب ماتش إيران، بغض النظر ده حصل ليه وإزاي، وكل ده مش قصتي… في النهاية كان موقفه إيه؟

قعد على الدكة لمصطفى شوبير.

لا، تعالى بقى لنقطة محدش تقريبًا هيقولها.

ماتش أستراليا كان قبل ماتش إيران ولا بعده؟

طبعًا بعده، في دور الـ32.

خد المفاجأة بقى: الشناوي نفسه كان بيسخن شوبير في تدريبات الإحماء قبل الماتش

وارجع شوف ردود أفعاله وقت ركلات الترجيح. مش كده وبس، ده في لقطة وهو بيصفر لشوبير من برا وبيديله نصايح.

طيب بعد البطولة، هل طلع تصريح سلبي واحد من الشناوي عن مشاركته؟ عن الجهاز الفني؟ عن أي حاجة؟

طيب ستوري؟ بوست؟ تلميح؟ أي حاجة؟

الإجابة: لا.

طيب لما بعد رد الفعل المحترم والمثالي ده تنزل قائمة المنتخب على صفحة اتحاد الكرة، واسم الشناوي ميبقاش موجود ضمن المستبعدين للإصابة، ويتفتح الباب لتفسير إن الاستبعاد فني…

رد فعله إيه؟

برضه مفيش رد، ولا كلمة، ولا تعليق، ولا مداخلة.

وفي الناحية التانية، عندنا مصطفى شوبير نفسه بيقول في كل فرصة إن الشناوي كان له دور مهم في مسيرته، وإنه اتعلم منه كتير، وإن الشناوي مُلهم له في مشواره.

حارس زي الشناوي، تختبر ردود أفعاله وهو بيخسر فرصة لعب حتى ولو دقيقة، كانت هتخليه الحارس المصري الوحيد اللي شارك في بطولتين كأس عالم.

ودي الصورة اللي لازم تتشاف.

ومفيهاش تجميل، ولا مكياج، ولا محتاجة حد يدافع عنها.

دي مواقف حصلت بالصوت والصورة… والدليل فيها هو الشناوي نفسه.

[Dr.Mohamed Khawassek @DKhawassek]

نحن مشغولين بالرد علي كل كذبة كبيرة و صغيرة يقولها الزمالكاوية و لم ننتبه أن الزمالك بدأ العمل في أرض أكتوبر لإنشاء نادي جديد و السؤال هنا…
من أين يأتي الزمالك بهذه الأموال…؟
كفاية كدة يا دولة مال الشعب يهدر علي نادي مفلس….

[Wael Al-Emam / وائل الإمام @wael_alemam]

تخيلوا مصطفى يونس وصل به الحال إن يقول إن لو رمضان صبحي في النادي الأهلي مكانش أتوقف بسبب المنشطات .. الناس دي وصلت لمرحلة من الشخصنة مع ناديهم يخليك تكره اليوم اللي دخلوا فيه النادي

[Peter @PeterMegally]

ايقاف اتحاد السلة لعمرو زهران ٣ شهور عليه مليون علامة استفهام بالنسبة لي. أنا بكره اللاعب الغبي او قليل الادب وطالبت الاهلي بعقابه، لكن لما عمرو مصيلحي واتحاد اللعبة يستغل غضبي ويوقع عليه عقوبه اكبر بكتير من اللي اتوقعت على لاعب الاتحاد اللي عمل نفس الحركة وماتوقفش ماتش واحد حتى، تفهم ان مافيش قرار بقانون وان كلها قرارات سياسية.

[Ahmed Osama @ebnosamaaa]

هو لو لسه فى ناس معرفتش ولا فهمت إن فى أوقات كتير كان فى محاولات لإسقاط الشناوى تبقي مشكلة الحقيقة ..

الشناوى راجع الموسم ده بتركيز كبير وواضح انه ناوى يقدم موسم متميز إن شاء الله .. من مصلحة كل أهلاوى انه يشوف حارس مرماه مميز ، والطبيعي يكون فى دعم لحارس له تاريخ كبير زى الشناوى طول ما هو مركز فى الملعب زى الفترة الحالية .. الشناوى له رصيد

مش بقول يلعب بالرصيد .. لكن بقول ان الرصيد يسمح له إننا نقدم له دعم يستحقه ، وربنا يهدي الجميع يارب.

[Martina Magued @martina_magued]

نفسي اسأل الهبيدة، هو لما الشناوي يعتزل، هتجيبوا محتوي منين؟!
في ناس عايشة علشان تطلع الشناوي وحش، وبتاع مشاكل وبيمشي كلامه علي الأهلي والمنتخب!
طلعوا الشناوي من دماغكم شوية، علشان كلنا عارفين اللي بتعملوه ده لصالح مين!
والمفروض الشخص ده نال مراده، فا يسيب الشناوي في حاله بقي😏

[Mohamed Fares Taman @mohamedfares07]

الواحد لما بيشوف عبقرية اللغة العربية، بيفهم ليه ربنا قال عن القرآن: «بِلِسَانٍ عَرَبِيٍّ مُبِينٍ».

اللي درس أي لغة أجنبية، لما يقارنها باللغة العربية، لازم يطلع بقناعة لا تقبل الشك إن بلاغة وعمق اللغة العربية يصعب على أي لغة أخرى إنها تقارن بيهم.

تخيل إن كلمة «وراء» وردت في القرآن بأربعة معانٍ مختلفة:

📌 وراء بمعنى خلف:
﴿فَنَبَذُوهُ وَرَاءَ ظُهُورِهِمْ﴾

📌 وراء بمعنى أمام:
﴿وَكَانَ وَرَاءَهُمْ مَلِكٌ يَأْخُذُ كُلَّ سَفِينَةٍ غَصْبًا﴾

📌 وراء بمعنى غير:
﴿فَمَنِ ابْتَغَى وَرَاءَ ذَلِكَ فَأُولَئِكَ هُمُ الْعَادُونَ﴾

📌 وراء بمعنى بعد:
﴿وَمِنْ وَرَاءِ إِسْحَاقَ يَعْقُوبَ﴾

لغة غنية بمفرداتها ومعانيها وتراكيبها اللغوية، تخليك في كل مرة بتسمعها في القرآن تحديدًا تحس إنك مندهش قد إيه اللغة دي عظيمة.

جمعتكم مباركة

[Mohamed Fares Taman @mohamedfares07]

أنا قلت مع إبراهيم فايق إن في Game إعلامي واضح بيتعمل مع الأهلي

أنا مقدرش أقول إن الأهلي فنيا مميز لا في سلبيات لازم تتعالج وفي شغل لازم يتعمل وقلق جمهور الأهلي مبرر إنما مش دي المعادلة اللي الإعلام بيعملها مع باقي الفرق

الإعلام لما بيتكلم عن سلبيات فرق الدوري والمدربين بيتكلم عن الأهلي وبس

محدش بيتكلم إن الزمالك في كل ماتش المهدي سليمان رجل المباراة وإن ده مؤشر سلبي

محدش ضغط مكوينا وقاله كسبت المصري 1 / 0 وكان المصري أفضل ولا ان بيراميدز كسب الجونة 1 / 0 بهدف ذاتي من مدافع الجونة

لا السلبيات بتتقال عند الأهلي وبس والضغط على الأهلي وبس وباقي الفرق الكل عامل مش واخد باله

[Mohamed Fares Taman @mohamedfares07]

في قهوة 🪑 فايق قلت إن ملخص أداء الزمالك في الدوري في جملة واحدة ( المهدي سليمان رجل كل المباريات )

في فارق بين فريق محتاج يطور الأداء عشان يوصل لحتة أفضل وفريق بيقدم الولا حاجة كروياً

ماتش الزمالك في الدوري صعب لأنك فعلا هتقابل فريق محظوظ وده محتاج انك تدخل الماتش مركز وتخلص بدري ومتديش فرصة للزمالك انه يحس جوا ال ٩٠ دقيقة إن الكورة ماشية معاه

[Martina Magued @martina_magued]

أتمني أن الأهلي يعمل ماتش جامد جدًا قدام أبو قير للأسمدة، علشان أنا مش هستحمل أن ال25 يوم توقف دولي يبقوا كلهم كلام من الإعلام، علي عموتة ومصير عموتة مع الأهلي.
عايزين نعدي التوقف الدولي من غير صداع، ونستعد لماتش القمة من غير هبد كتير 🤷‍♀️

[Mohamed Fares Taman @mohamedfares07]

براحة بس كده وواحدة واحدة، هو جمهور الأهلي مش حزبين: حزب طيب وحزب شرير!

الناس هتفضل تتكلم في الكورة وتنتقد لعيبة من أول ميسي ورونالدو لأصغر لاعب، ومن أول فليك ومورينيو لأصغر مدرب.

إنما الفكرة إن الواحد عنده معادلة بسيطة: أنا أشدت بعموتة في اللي كنت شايف من وجهة نظري إنه يستحق الإشادة، وانتقدت عموتة في اللي كنت شايف من وجهة نظري إنه يستحق النقد، وفي الحالتين رأيي مش مطلق، ده رأي نسبي، لإن يا باشا كرة القدم كلها لعبة نسبية، مفيهاش حاجة مطلقة ومش معادلات 1+1=2.

بس بالنسبالي النقد عشان يكون مفيد لأي حاجة بتحبها، لازم يبقى بعينيك الاتنين مش بعين واحدة، تشوف الإيجابي والسلبي سوا، مش حاجة واحدة منهم.

من الإيجابيات:

الراجل مسيطر على الفريق وأوضة اللبس، واللعيبة عاملة له حساب. إحنا مع ريبيرو وتوروب كان في مراحل كده كنا واصلين لمستوى إن المدير الفني فقد القدرة تمامًا على إدارة اللاعبين جوا أوضة اللبس قبل الملعب.

بدنيًا الفريق أفضل كتير، ودي كانت كارثة الموسم اللي فات بسبب فترة إعداد ريبيرو، الفريق طول الموسم تحت الصفر بدنيًا.

إنك تدي عمرو الجزار الثقة من ماتش برشلونة دي كانت مفاجأة بالنسبالي، وعموتة بيجني ثمار قراره دلوقتي، وده مش قرار عشوائي أكيد، دي رؤية مدرب.

الفوز في 3 مباريات بـ9 نقاط دي حاجة إيجابية حتى لو اختلفنا على الأداء.

طيب لو رحنا للسلبيات:

عموتة مدرب عنده التدريب، قوتك فيه بتساوي حظوظك في المشاركة، وده كتبته قبل ما يبدأ ماتش واحد مع الأهلي، دي فلسفة عنده طول الوقت. لكن محتاج يكون في مرونة في لعيبة زي حسين الشحات مثلًا، مش هيدي لك في التدريبات في السن ده اللي إنت متوقعه، بس خبراته وشخصيته مش هتلاقيهم في لاعب تاني، ده لاعب بيعرف يخلص بأقل مجهود، ودي المعادلة أصلًا: «أقل مجهود».

توظيف زيزو طبيعي يكون في تحفظ عليه، لإن الإنتاجية رقميًا في الحتة دي كمساهمات مش هتتحقق. ده زيزو لما البعض بيحاول يسخر منه بيتكلم عن إن مساهماته من عرضيات، فهو أصلًا قوته على الطرف. قلب الملعب في لعيبة كتير أوي في الأهلي إنتاجيتها فيه تقدر تكون أعلى.

لسه لحد دلوقتي مفيش فوارق فنية واضحة بين الأهلي والمنافسين. إنبي إنت عامل ريمونتادا في الـ+90، وامبارح فوز في الدقيقة 87، فبديهي يبقى في قلق، لإن دي كلها ورقة وقلم 📝 كانت مواقف صعبة ممكن تضيع ماتشين.

فأنا من أول يوم ولحد دلوقتي بقول عموتة محتاج يحافظ على الإيجابيات ويعالج السلبيات، ويستغل إن مثلًا ماتشين قبل التوقف مع المقاولين وسماد أبو قير، الفريقين نظريًا في المتناول، وكسبوا ماتش واحد من أول 3 جولات، وكل فريق خسر ماتشين.

فأنا مصمم على الجملة دي: دول ماتشين فرصة إنك تلحق تعالج الأخطاء فيهم، لإن عندك الرفاهية لده، عشان توصل لشكل أفضل وتخرج من أول 5 جولات بـ15 نقطة، وتدخل التوقف الدولي وإنت جايب 100% من النقاط، وده هيفرق جدًا جدًا مع الأهلي، لإن بعد التوقف عندك 4 جولات فيهم الزمالك وبيراميدز.

[Mohamed Fares Taman @mohamedfares07]

بمناسبة كلام إبراهيم فايق عن تريزيجيه.

آه، اللي عمله تريزيجيه تضحية، وتضحية مالية كبيرة كمان.

إنت رحت لتريزيجيه اللي كان مستقر في قطر ورايح بعقد كبير جدًا كإعارة من طرابزون التركي، وقلت له: إحنا عندنا مشروع والأهلي عايزك، الراجل قال: حاضر تمام، أنا معاك.

رجع براتب الناس بتقول إنه كبير، هو آه كبير، وكبير جدًا مقارنة بمستوى الرواتب في الأهلي، إنما بالنسبة للراتب اللي كان بياخده تريزيجيه في قطر أو العروض اللي كانت عنده وقتها، لا، ده معلومة مؤكدة، تريزيجيه جه الأهلي برقم هو نص راتب كان معروض عليه في السعودية في نفس الوقت.

جيت بعد أول موسم قلت له: يا عم تريزيجيه، عايزين نظبط الدنيا والراتب ده بالشكل ده مش هينفع؟

ومع إنه أكتر لاعب في الموسم اللي فات مساهمة في الأهداف، ومع إنك وقت ما خليته ييجي كان كلامك معاه مختلف، ومع ذلك قالك: تمام، أنا همشي وأحلها.

ومش بس مقالكش: لا، أنا قاعد وأديني عقدي، ده هو اللي جاب لنفسه الرياض السعودي كمان.

وبرجع أقولها، ده ساب لك فلوس من القديم اللي له عندك، وفلوس مش قليلة كمان.

وعشان كده، الشكر هنا مش مجاملة ولا كلمة بتتقال وخلاص.

شكرًا يا تريزيجيه، لأنك اخترت إنك تسهّل على الأهلي، ووقت ما كان قدامك أكتر من طريق، فضّلت إن علاقتك بالنادي تفضل أكبر من أي أرقام

[Mohamed Fares Taman @mohamedfares07]

نادي الزمالك بيشارك في دوري الأبطال بعد غياب 3 سنين كان بيلعب فيهم كونفدرالية لانه كان تالت الدوري ل 3 مواسم متتالية

وبدل ما يهتف لفريقه عشان ربنا ينفخ في صورته ويحقق دوري الأبطال البطولة اللي غايبة عن الزمالك من ربع قرن

لا ده بيهتف بحلم بيك أنا بحلم بيك البط الكيني مستنيك ! . بإسقاط على الأهلي اللي محقق البطولة 8 مرات في الربع قرن ده وعنده 12 لقب دوري أبطال يعني عم الشغلانة

وبعد كل ده تلاقي واحد يقولك عاش الملكي اللي مخليك شاغل بالك بهتافات جمهور الزمالك

لا بجد انت مش مكسوف والله أنا مكسوف لك

[shenawy @shno74]

مفيش مدرب في مصر كلها عنده الجرأة إنه يجيب لعيب بيلعب مساك بقاله ٣ سنين، ويلاعبه مهاجم. وحتى لو اللعيب مكنش موفق، بس عمل شوط كويس مقارنة بإمكانياته وإنه بعيد عن حساسية المركز. ولو كان سجل كورة العارضة، كان دخل هو وسيد عيد التاريخ.

سيد عيد خسر الماتش آه، بس لعب ماتش كورة يتحط في الـCV بتاعه.. ضغط ف كل حته فالملعب وأكتر من ٢٢ تسديدة على المرمى، و٣ كرات في القائم والعارضة، وكميات انفرادات ضايعة، بتروجيت مضيعهاش وهو بيلعب في الدرجة التانية قدام أشمون وبشتيل وشوط أول بالكامل One Side Game.

أرقام مرعبة في خلق الفرص، والمتسبب الأول فيها هو سيد عيد، اللي لو معاه ٥٪ بس من حظ معتمد جمال، كان خلّص الماتش من أول ربع ساعة.

سيد عيد لما جت العروض بتاعت حامد حمدان وأحمد رضا وهادي رياض وتوفيق محمد، قال للإدارة: «خليهم يطلعوا، وأنا هطلع لعيبة غيرهم».
ودخل للنادي فلوس من بيع ٤ لعيبة ما دخلتش نادي بتروجيت آخر ٢٠ سنة.

سيد عيد لسه بيجهز كمان أدهم حامد ومحمد دودو، اللي طلّعه من الناشئين، وبدر موسى، اللي هيبقى أهم جناح في مصر السنة دي، واللي طول الماتش النهارده بتحسر على إننا مخلصناش معاه، بعد ما كنا قريبين منه جدًا. بس إن شاء الله ربنا شايله وشايلنا الخير وهيبقي معانا قريب زي ما كان هيموت عشان يبقي معانا السنه اللي فاتت،
أدهم ودودو وبدر دول هيخرجوا السنة الجاية وهيجيبوا فلوس تصرف على بتروجيت سنين، وسيد عيد هيطلع غيرهم عادي.

سيد عيد مسك ٣ فرق، وصعد بيهم كلهم من الدرجة التانية للممتاز: النصر، والداخلية، وبتروجيت.
والـ٣ فرق عمل معاهم بصمة، مدربين في الممتاز تاريخهم ٢٥ سنة في التدريب معملوش زيها.

ماتش ممتاز من مدرب محترم وراجل عنده شجاعة مش عند حد غيره.. ماتش يتحسب مكسب والله لكابتن سيد، وياخد عليه عشرة من عشرة، لولا بس الغلطة الوحيدة في التأخير في خروج الباك اليمين، اللي واضح جدًا إن الماتش كان كبير عليه.

الكورة في مصر لو مش بالصيت، كان زمان سيد عيد ده مصنف من أحسن مدربين مصر في آخر ١٠ سنين.

هاردلك يا كابتن سيد يا مجتهد ماتش كبير ونتيجته ظلمتك.

[Ahmed Osama @ebnosamaaa]

أنا مش بحب الشناوى من فراغ ، الشناوى فى لحظة فى حياته كانت قاسية لما كان الاختيار بينه وبين أحمد عادل وتم إختيار أحمد عادل عبد المنعم .

الخروج من الأهلى مش سهل ، واللى بيعدى منه ويكمل لازم يكون شخصية قوية ، الشناوى عدي وكمل ولعب فى فريق وسط الدورى لحد ما رجع للأهلى ، كانت البداية فيها هزة طبيعي لكن مطولتش كتير وربنا كرمه خلال موسمين أصبح حارس مرمى منتخب مصر فى كأس العالم .

تألق الشناوى دفع نادي بيراميدز يعرض على الاهلى 4 مليون دولار إعارة فقط موسمين ، وراتب سنوى للشناوى 800 ألف دولار وده كان أضعاف ما يتقاضاه الشناوى مع الأهلى ، عمل ايه الشناوى ؟ اللي يشوفه الأهلى .

يزيد التألق تاني ويجي عقد جبار من النصر السعودى ، عمل ايه الشناوى ؟ اللي يشوفه الأهلى ، يا جدع ده انت هتاخد فى 3 سنين 400 مليون ؟ مش بتكلم فى فلوس .

طيب مراسل ينجح يعمل لقاء مع والده فى الحامول ، الله يرحمه يقوله إحنا الإنتماء يا ولدي ، انت مفكر ده اول عرض يجي للشناوى ؟ ده كل سنه يجي عرض ، بس احنا مش عاوزين غير الأهلى ، بيته والخطيب زى والده ، وإحنا يا ولدى الاحتراف بالنسبة لنا خيانة .

آخر موسمين وأنا بقول انتقد زى مانت عاوز ، بس بلاش تطاول على المخلصين ، ده ليهم حق التقدير ، الأمور الفنية نتفق نختلف عليها مش قصة ، لكن اللى اشتري الأهلى رغم ان الاهلى استغنى عنه ، ده يتقدر ونحترم عطائه واختياره الاهلى فى كل الاوقات ، وقتها كان الشناوى مش بس فى حته تانيه ، مكنش عندنا ثقة غير فى وجوده