تضحك ورودك على خدودك
من حسنها يخضع القاسي
ان مضى لي يوم ما رودك
تنكسر في الخاطر احواسي
ولا أنا غصبن على حسودك
بوصلك لو ينقطع راسي
الحمايم باضن نهودك
والشباب الغض مياسي
تطري عليه كل ساعه
وطيوفك لعيني مسايير
لا غبت لك عندي وداعه
تطري ولك في القلب تذكير
حبك فرّد فيني شراعه
وأرسابيه مرسى البواخير
مامل صوتك وأستماعه
كل حرف له في القلب تأثير
مالي على بعدك شجاعه
ولا لي هدف في مواصل الغير
محمد الدحبه بن لويع العامري 🖊️
في العرب من يعرف الصافي
تاخذ الكلمه وتعطيها
ما تشله قولك أخلافي
هذر والشامت يباريها
العرب تفرق بالأصنافي
التميز في معانيها
حد عدل وفي العرب وافي
وحد للداني مساعيها
ولا تناحي قول الاخفافي
كان نفسك تعترف فيها
المعزه ساس وأكلافي
درب والنادر يقاويها
أفتهم قولي والأوصافي
وعز نفسك لي تقديها
عزها في روس الاشرافي
تنتصر من عز واليها
محمد الدحبه بن لويع العامري 🖊️
لي ماينول العز بقو شبابه
يشكي غبينه لا الدهر قفابه
العز له رجلٍ قوي أصلابه
مالف من دون العزوم أحيابه
اللي يراعي خاطره ماثابه
والرجل يمحن علته فأنكابه
يالين توفى غايته وأطلابه
محمد الدحبه بن لويع العامري
ونيت وتزايد امابي
حب اليديد اييب ليعات
أرمانيّه ترف الشبابي
راعي العيون اللي مثلات
الغض مهضوم الحيابي
خلا عروق الكبد رثات
مخطر وخايف من الغيابي
لا تزل روحي بين مويات
لو هو رماهم ما رمابي
حرام ما يقيّل ولا يبات
وشو مريحك من عذابي
حرمت عيني كل لذات
#محمد_بن_ثاني_بن_قطامي_السويدي
بالكيفيه
يوم اذكر اللي فات ونيت
يا حسرتي من الموت ندمان
ياما عفدت الهون واقفيت
من واحدن غالي وله شان
على التسول ماتثنيت
وأنا ثقيل العقل بأوزان
#محمد_بن_ثاني_بن_قطامي_السويدي
بن احمرن دم الغزاله
أيفك صوعي من عقب حيف
ويطيب لي مشغول باله
لي مونس الخاطر على كيف
بأسباب لي فايق دلاله
لي شط قلبي بالتكليف
يزيد شوقي بالعماله
ولي ييت صوبه أحتسب ضيف
ما دري عمد ولا يهاله
ولا تنشز في التصريف
ما فيه ظلم ولا عداله
أن أدبروا ولا مناكيف
والرب لي عالم بحاله
عساه يبرالي بتلطيف
محمد بن الدحبه العامري
اليوم اول ليله من العشر الأواخر ، اللهم بلغنا ليلة القدر ولا تحرمنا أجره ، اللهم إنك عفو تحب العفو فاعف عنا ، اللهم اكتب لنا دعوة لا ترد وحقق لنا ما نتمنى.