البارحه شبيت روس الزقاير
واحرقت جرحٍ داخل الصدر مدفون
قصدي اخفف من كنين الضماير
واليا الجروح تزود والقلب مغبون
وقامت هواجيسي ردود وصداير
وأصبحت أنا والوقت داين ومديون
ومن العنا والجور ذقت العزاير
والوقت الاقشر صار من دون في دون
لولا الحيا هليت صاف العباير
لاشك ماودي هل الحسد يدرون
اللي على النمه تسوق البشاير
وأشكالهم مابين صاحي ومجنون
وسجيت مع فكرن مع الناس حاير
يلعب بي الهوجاس والصدر مشحون
يوم أنتبهت اليا الزقاير نثاير
واليا الجماعه فالمساجد يصلون
وحثيت رجلي صوب صوت المناير
وصليت فرض الفجر وإبليس ملعون