بعد ما دارت الدنيا علي وكثروا النقاد
تعمدت أبتعد وأريح أعصابي عن الضجه
مشيت وخطوتي يمكن تشكّل للغريب بلاد
ضجيج الأرض من خلفي وقدام عيوني السجه
ركنت الحلم في رف الأماني بعد كثر أجهاد
أنا اللي ماملك حاجه لو إنه يملك الحجه
شعور الخوف في قلبي نتيجة ظلم وأستبداد
من اللي مننا يرضى يعيش الذل والدجه
وأنا حرٍ خلقه اللّٰه ما يعرف كلمة إستعباد
مابيك تصدق ان قالوا مريض وصابته رجه
عزيزه شجرة الصحراء وهي مافوقها رعاد
لو ان الغيم مايمطر تحب تواجه العجه
قلبي أثقل من طويق ولا تحرك شوقه
صار طيرٍ في مهبّ الريح ينقض ريشه
ما يقند لهفته .. ولا يعانق ذوقه
غير محبوبٍ تمادى في جفاه وطيشه
واحدٍ من كثر ما الله مالحٍ منطوقه
ودك تْسولف معه ولا تذوق العيشه
الغلا اللي جابني له والغلا وداني
علموه اني مقدر موقفه وظروفه
..
ان ذكرني حال دون العلم علماً ثاني
وان نساني والله اني شايفٍ معروفه
..
وعلموه ان القصايد كلها من داني
ماتمثناها من الاوصاف غير وصوفه
..
زينه الرباني اللي فـ الهوى رباني
لين صرت اكتب قصيد وفالقصيد اشوفه
..
صحت ابياتي وتفكيري وصح لساني
مير ماصحت بقربه كبدي الملهوفه
..
كنت انا المجني على قلبه وصرت الجاني
من يهدي روحي و قلبي ويمن خوفه ؟
..
يعترينا ضعفنا والجانب الانساني
كل ماجينا نسوي للوداع بروفه
..
اعزم واجزم واقفي مير لاناداني
صرت انا وياه مثل حسين واهل الكوفه
وسيع الطرف من ساعة عرفتك ما هدى لي بال
عساني ما خلا من عودك و من وجهك البدري
لقيتك شفّ مكنون الشعور و غاية الترحال
و قال القلب وش يمنع هوانا و العمر بدري
ما كان لخطوتي عذر ولا كان لسلوتي مدخال
كثر ما شفتك بعيني حياة و شلتك بصدري
أعيشك حلم و أحيابك طواري عابرة و وصال
و أموت بكل كلمة من شفاهك ، و أنت ما تدري
أخذ وجهي مناديلٍ تْداري دمعك الهمال
وَلا تْكذب لسان الوقت لا علّمْك عن ندري
عليك الروح يشعفها مسيلٍ من سرابك سال
و يوقف دونها خوفي و مشروهي على قدري
تدانى لك معَ باب الولع و الشوق قلب و بال
و حنّت لك مواريف الشجر و الغصن و الكدري
لا تستسهل مطيحي لا تثنى عودك ولا مال
و أنا رجال ما فوقي حدٍ غيري ولا حدري
تزعجني الناس ، و السجات تطربني
ما ذقت طعم الحياه الا مع الخلوه
اتعبت محبوبي ، الله لايعاقبني
اللي محد فالمحبه يدلي بـ دلوه
انا سهل ياحبيبي لا تصعبني
اشوفك إنسان ، وانت تشوفني بلوه
عيونك الحلوه اكثر شي متعبني
لكن يا حلو التعب لعيونك الحلوه
سلام الله على اللي لو تركته ماقدرت أنساه
حبيبٍ كل ما هبّ الهوى حنّيت .. لـ دياره
ليَا هبَّت نسانيس الرِياح و جدَّدت ذكراه ؟
تربَّع في ضلوع الصدر كنَّه ماخذ بْـ ثاره
معي قلبٍ من صدوف الليالي جاه ما كفَّاه
تمثناه الرّهيْف اللي ترك قلبي على ناره
يقولون المخاوف تحكم العاشق يجرّ خْطاه
و أقول إنّي عشقته بس ، دربي كنت مختاره
كتبت الشعر فيه ولا كتبته غير لأجل رضاه
ماني بْـ محتاج لـ أنظار العرب لا لدَّت أنظاره
عليه الطَّله اللي تجبر الشاعر يجيب أقصاه
و عَليّ أسوق له غرٍّ .. " من الأبداع مِدراره "
يقول الله .. و أقول القصايد فيك ، يااااا الله
يمر البال طيفه ما يغيب إن غابت أخباره
حبيبي و أكثر العالم لهم بين العباد أشباه
شبيهك فـ السما لا طلّ كنّي مبشّر بشاره
رهين الشوق حتى لو تصنَّع ضحكة مْحيَّاه
ورى صدره هموم البُعد تلحِق غاره بـ غاره
يجفّ الحبر و تموت المشاعر ما شكى بلواه
يشوفك مرحلة .. فـ اوّل محطَّاته ، و مشواره