يا مدوّر المخرج..ترى الدرب الطويل
ما يقطعه من كان بظنونه حذر
أنهيتِ”فصل الوصل”والنيّه رحيل
وأنا أحسب إنك لي سند..وقت الذخر
وقفتني في”نصّة الدرب”الطويل
لا ليلٍ أسري به..ولا شمس و قمر
عزّاه يا صدري من همٍ ثقيل
اللي نحت في محجر عيوني سهر
لا تعتذر بالوقت..وعذرك ما يشيل
ذنب الشعور اللي من الفرقا كفر
أنا بطل طعنتك..ولو جرحي يسيل
ماني سوات اللي..من الصدمة انكسر
راح الشعور اللي جعل قدرك”جليل”
كفّي جفت كفّك.. و ودعها القدر
وراح القصيد اللي بأوصافك يخيل
لين انتهى بي السرد في”آخر سطر”
ودّعتك الله..والعوض وجهٍ جميل
بانت ملامح كذبته..عقب الستر
كنت أحسبك نادر.. ولا لك أي مثيل
وأثرك تشابه "عابرٍ" مرّ وهجر
سلّم على نفسك.. وتلقى لك بديل
لكن تذكر اني فرصة مره بالعمر
عبدالله بن محمد بن ثويني✍🏻
عيدك مبارك يا داري واغترابي
لا حياة إلا معك .. لو هي بدونك
كانك من إخطائي .. أجمل من صوابي
الخطأ محبتي ولا جنونك؟
راضي أعيشك أمل واطرد سرابي
لو دياري مجدبة برقب مزونك
زهرةٍ أرق ؛ من زهرة شبابي
ولا أرق من الزهور : إلا جفونك