قبل لا تروح لـ دربك الضايع وتمشيه
تجاهل هوى قلبك ونفسك وما تهوى
دعيت الله بـ دعوه تقيٍ بكى ماضيه
وجابك لي الله من دعائي وصرت اشوى
قبل لـ اعرفك ماطيق عمري ولا ادانيه
وبعد ما عرفتك صرت في عيني المأوى
اشوف العمر غالي ويسوى احبك فيه
مثل ما اشوف انه بلياك / ما يسوى .
غرك اني ما اتسمع فيك لايم
من مجاميع المؤنث والمذكر
تحسب ان قلبي ملكته ملك دايم
يوم شفته لا يخوون .. ولا تنكر
انتبه من سجة القلب المهايم
لا نسى ، ينسى ولا عاد يتذكر
تستغرب اني أعدّي لك ومتغاضي
انا من الوقت قبل اعرفك متعلم
أشياء واجد تضايقني وانا راضي
على رغم قوتي اسكت ولا أتكلم
ترى اكثر إنسان مايحكي عن الماضي
هو اكثر إنسان من ماضيه يتألم .
تذكرت وجهك يوم , بيّن شبيهك فوق
جمالك عظيم وحلم بـ اموت ما طلته
تعلقت فيك وصنت حبك ورا المعلوق
وعشانك سريت الليل , صحراه وزفلته
على شوفتك يهدا فؤاد , ومزاج يروق
وعلى غيبتك قلبي , علي تكثر اسئلته ؟!
في عيني تبين نظرة الحب وجد وشوق
وفي صدري كلامٍ , لا رجعتي علي قلته !!
اليا زعلت الباب ماهو بـ مقفول
والي يبي درب المفارق يدلّه
الي يعرف العلم ؟ يدري وش اقول
والي ماهو بيميّز العلم قلّه
"حنا "لاجينا الحبل مبرم ومفتول
اما نعقد الحبل ولانحله
اليا انجرحنا ؟ مازعلنا على طول
واليا زعلنا ؟ نزعل العُمر كله
وين بلقى عند ظلمك فـ المحبه قاضي ؟
يا حبيبٍ ما بقى , لي في ظلاله فيّه !
عن هواك العذب لا ناسي ولا متغاضي
وعن هوى غيرك عيوف ولا طرا لي نيه !
ما رضى قلبي المفارق ليه قلبك راضي ؟
وانت ما يصلح تعامل غير بـ الحنيه !
كيف بنسى الذكريات الماضيه والماضي
بعده ادور شعور الراحه النفسيه !!
مري على بال القصايد وأغنيك
بيتٍ على فارق قصيدي يبدّا
أنتي سحابة شعر محدٍ يجاريك
ما أنتي بـ شطرٍ في خيالي وعدا
إذا أنكشفتي فالسما عز واليك
الأرض تفرح بك وتطرب وتندّى
ما الله جعل لك فالبشر من يحاليك
وما غير حسنك بـ المنايا يفدّى
مستقيمه بس جسمك لا يمكن يستقيم
و المشاعر فـ التفاصيل صارت مدمنه !
يوم وادعتك فقدت , السعاده والنعيم
مثل من وادع دياره , وربعه وضعنه
اذكريني كل ما هب , ذعذاع النسيم
الغلا مهوب ينسى لو ان عمره سنه !!
يا نديمة ظلمة الليل , ما غيرك نديم
مستحيل القلب يسكن وطن غير وطنه
في غيابي لا غدا , قلبك الابيض يتيم ؟
معك امانه لا تخلين , غيري يسكنه !
عاشقك لا زال باقي على العهد القديم
في رضاك المستحيله , تعود ممكنه
ايه انا اللي في بحر , عينك النجلا يهيم
وايه انا اللي مارضى يعيش ذل ومسكنه