صباح الخير ياصوتٍ خذاني والهوى غلاب
يا وجهٍ فيه اشوف الخير كله وادرك الخيره
انا ليه اتعنى للسّعادة وابذل الاسباب؟
وانا اللي في ذرى قلبه لقيت الدار والديره
قدر يقنعني انه صفوة العشاق والاحباب
"وانا في قلبه اغلى الناس والأولى والاخيره"
قبل أعرفك أشوف أن الأماني بابها مسدود
إلين أني عرفتك وأبتدت رحلة ملذّاتي ،
معك ما أشتقت للماضي تقول أن العُمر مردود
لو أحلف حلفت أن عمري اللي فات ما فاتي🤍
مدامي في ذرىٰ قلبك عن الصّدمات والتّقصير
ماعاد أخاف من طول الطريق وضيقةْ المسرى
أحبك .. والهوىٰ فوق الكلام العذب والتفسير
ياوجهٍ فيه (مستقبل شعوري) ماغدا (ذكرى)
عرفت إنك فرح قلبي وضحكات الليال وخير
يا حلم العمر مابعدك غرام .. وفرصةٍ أُخرى