رحت معرض الكتاب وكنت ناوية أشتري روايتين وديوان شعر وأرجع.
عند البوابة وقّفني موظّف وسألني : قارئة ولا كاتبة ؟
قلت : الاثنين.
قال : للأسف ممنوع الجمع بين المهنتين عندنا تعارض مصالح.
قلت : سجّلني قارئة.
قال : وش آخر كتاب قرأتيه ؟
قلت له اسم رواية.
قال : وش استفدتي منها ؟
قلت : استمتعت.
قال : الاستمتاع مو من الأهداف المعتمدة للقراءة لازم تجيبين شهادة تثبت إن الرواية غيّرت حياتك.
دخلت المعرض بعد ما تعهدت إني أقرأ للفائدة فقط.
أول دار نشر لقيتها تعرض رواية من 800 صفحة.
سألت البائع : عن وش تتكلم ؟
قال : عن رجل يبحث عن نفسه.
قلت : ولقاها ؟
قال : لا بس لقينا له ناشر.
سألته عن السعر.
قال : مئتين وخمسين ريال.
قلت : غالية !
قال : يا أختي الرجال ضايع من ثمانمئة صفحة تبينه يضيع ببلاش ؟
انتقلت لجناح الشعر
لقيت شاعر يوقّع ديوانه وقدامه طابور طويل
أخذت نسخة وسألته : وش يميز شعرك ؟
قال : الغموض
فتحت الديوان ولقيت الصفحات كلها بيضاء
قلت : وين القصائد ؟
قال : بين السطور
قلت : ما فيه سطور !
قال : وهذا أعلى مستويات الغموض
اشتريت الديوان عشان ما أفضح جهلي بالحداثة.
بعدها شفت جناح مكتوب عليه (كتب تغيّر حياتك)
دخلت
قال البائع : عندنا كتاب يخليك مليونيرة خلال أسبوع.
قلت : أنت قريته ؟
قال : ثلاث مرات.
قلت : وصرت مليونير ؟
قال : لا بس صاحب دار النشر صار
طلعت وأنا شايلة أكياس كتب ولقيت ركن اسمه (الموت الأدبي)
سألت الموظف عنه
قال : هنا ندفن الكتب اللي ما أحد اشتراها.
لقيت روايات تبكي ودواوين تطلب الرحمة وكتب تنمية بشرية تحاول تقنع نفسها إن الفشل مجرد بداية النجاح
وفجأة سمعت صراخ
كان فيه كتاب فلسفة يضرب كتاب طبخ ويقول له : أنت تختزل الوجود في المعدة !
رد كتاب الطبخ : وأنت من ثلاثمئة سنة تسأل عن معنى الحياة وما عرفت حتى تسوي بيضة !
تدخل كتاب تاريخ ليفصل بينهم
لكن كتاب السياسة اتهمه بتزوير الواقعة
اشتعلت مشاجرة بين الأجنحة
هربت باتجاه المخرج
وقفني الحارس وسألني : هل قرأتي الكتب اللي اشتريتيها ؟
قلت : توّي شاريتها !
قال : ممنوع خروج الكتب قبل قراءتها هذا معرض كتاب مو مستودع تأنيب ضمير
جلست عند الباب أقرأ
كلما أنهيت كتاب اكتشفت إنه يوصيني بعشرة كتب ثانية
وبعد ثلاثة أيام قفل المعرض
خرج الزوار
وغادر الناشرون
وطفّوا الأنوار
وظليت أنا لحالي أقرأ
بعد سنة فتحوا المعرض من جديد
وجاني موظف يسألني : أنتِ عارضة ولا زائرة ؟
قلت : أنا القارئة اللي نسيتوها السنة الماضية.
قال : ممتاز عندنا فعالية جديدة بعنوان (القراءة حياة)
قلت : طيب خلّوني أعيش !
قال : للأسف لازم تخلصين قائمة المراجع أول.
ومن يومها وأنا مقتنعة إن أخطر كتاب ممكن تشتريه هو الكتاب اللي يقنعك إنك ما قرأته بما فيه الكفاية.
✍🏻☕️
Lately, there’s something so exhausting about attending a professional or academic session. Idk what to call it but everything feels so same now. PPTs used to reflect personality. People would actually put thought into the design, wording, little details. There was subjectivity.