تنفَّس الصبح والاشواق مجتمعه
انزاح عنها ظلام الليل ما زاحت
لا زال لجروحها وسط الحشا جمعه
لا مر طاريك يا عذب اللما صاحت
اللي فقد معك لذة شوفه وسمعه
ما عاد يركض ورى الفرصه ليا تاحت
يرقب مجيك من الجمعه ليا الجمعه
ويلاحي الورق في غيبتك لا ناحت
بدد ظلام الفراق وولع الشمعه
اللي تلاشت بعد فرقاك وانساحت
لا زال للدمع في عين الغلا لمعه
لو طاح من موقها ثلثينه ارتاحت
لكن مشاعر غلاك اغلى من الدمعه
خايف تطيح المشاعر كل ما طاحت
مشاعر الحب مثل العمر والسمعه
ماهيب ترجع لراعيها ليا راحت
مـحـمـد خـالـد