فــيصــل بـن طـارق الفـايـز

شريك وعضو مجلس إدارة مجموعة ماقنا للاستثمار | سفير عالمي لشركات استشارية عالمية | غواص معتمد من @PADI| طيار شراعي فارس قفز حواجز سعودي🇸🇦| شاعر إذا تطلّب الأمر

[فــيصــل بـن طـارق الفـايـز @fjrtk]

اولاً انا كنت سبب فقط وكان كل الاعتماد على الله ثم عليك
ثانياً هذا كان واجبي وما سويت اي شيء
وثالثاً الملهمين اللي مثلك هم اللي يجب انه نقدّرهم لان حققوا شيء غيرهم عجز عن تحقيقه
شرف لي معرفتك يا عبدالله
عقبال ما اشوفك منافس في ميادين الخيل وتتعداني وغيري ان شاء الله 🤍🙏🏻

[عبدالله بن ياسر @bdallhbnyasr1]

بِسم الله لنبدأ قصة إلهام بسيطة ،،،
بطلها الصديق @fjrtk

في ٢٠١٨ جتني إصابة بسيطة أعاقتني من المشي ، ونصح الدكتور بركوب الخيل والعلاج الطبيعي لعلاجها ، وانه فيه أمل الشفاء كبير وهو المتعارف عليه بمثل هذي الحالات ولكني كنت فاقد الامل .

حتى قابلت هذا الشاب الذي كان
يتبع ،،،

[فــيصــل بـن طـارق الفـايـز @fjrtk]

مدري .. اذا تقرا شعوري وتوحيه
وتسمع مابين ضلوعي صرت ينادي

قلبٍ يحبك يا عجب كيف تشقيه
وانا احسبنك بالمحبه ضمادي

سويت ما اقدر وش اللي تبغيه
متى على وصلي تمد الايادي

سرقت من عمري ولاقلتلك ليه
وخذيت قلبي والعيون ورقادي

ارحم حبيبك ياحبيبي وراعيه
دامك دوى جروحي وغاية مرادي

[فــيصــل بـن طـارق الفـايـز @fjrtk]

@faisalmishref الف مبروك يا والدي فخورين يشهد الله
والله يديم فرحتك وفخرك باخوي تركي 🤍

[فــيصــل بـن طـارق الفـايـز @fjrtk]

الف مبروك لاخواني الضباط
تركي بن فيصل بن مشرف
عبدالله بن محيسن العتيبي

تخرجهم من كلية الملك خالد العسكرية برتبة ملازم
اسال الله لهم التوفيق والسداد في خدمة دينهم ووطنهم ومليكهم

كم أنا فخور 🤍

[فــيصــل بـن طـارق الفـايـز @fjrtk]

تزاحمو ضدي ملاعين الارقاب
كلن يي حقه بضربة يمينه

وحولت محوالٍ على كل الاشناب
واخذتهم في مَلعبي حصه رهينه

وخليتهم طعمن من الناب للناب
ودعست فوق ارقابهم من غبينه

ماني ولد قومن تبهذل وتنساب
انا ولد قومن فعايلهم سمينه

[فــيصــل بـن طـارق الفـايـز @fjrtk]

يقولون مات وقلت في مله الاسلام
وقبل لا يموت بكم ساعه محاكيني

توفّى وخلاني لحالي ولا ينلام
لو الامر بيده خابره ما يخليني

أنا مانيب ناسيه لو مر عقبه اعوام
لو إني اللي مت ما هو بناسيني

[فــيصــل بـن طـارق الفـايـز @fjrtk]

الضيقه اللي دونها رابط الجاش
ما تنزل إلا بالصدور الرحيبه

حاولت امشيها وانا خاطري ماش
غصبتها وانا ما احب الغصيبه

اعوذ بالله كلّ ماطيشها طاش
وألوذ به عن طيشها والتجي به

لولاي صابر رحت في غرفة إنعاش
الصبر مفتاح القفول الصعيبه

أدوّر العزله عن الناس وانحاش
كني مسوي في حياتي مصيبه

والسيره الذاتيّه ابيض من الشاش
وجهي محشات القفا ما تعيبه

المجتمع نصّه .. منافق وغشاش
واللي توديه المصالح تجيبه

والنص الآخر ماعرف كيف يعتاش
ماهو ردي ... لكن تردى نصيبه

والشعر له ساحه وللساحه احواش
ومنابر ما زادته غير ريبه

ما يرفع الرجال تصفيق وفلاش
لو عنده الجمهور صفوا كتيبه

ما قلت يا سيلفي مثل طاش ما طاش
اقول من يظهر بطيبه يا طيبه

كم شاعر طيب وكم شاعر لاش
مع كل عشرة انعام تسعين خيبه

[فــيصــل بـن طـارق الفـايـز @fjrtk]

ما يقتل الرجال غير الحسوفه
لا جاء يقلب في قديم الحسابات

وانا على الدنيا عزومي عيوفه
اموت فالليله تسع ، عشر مرات

ما هي بموته كنها إلا بروفه
ليومي اللي فيه طوي السجلات

ارثيك يا قلب من الناس خوفه
يموت ما قد ذاق طعم الملذات

اللّه يعين اللي بعيده شوفه
يموت من غبنه وهي ما بعد جات

حلمه كبير وعاصياتٍ ظروفه
عيت عليه يجيب ذا الحلم بالذات

وانا ادعي اللي مدته من كفوفه
اللي رفع سبع بعمدان واثبات

يرزقني الجنه برحمه وروفه
لا قالو العالم ترى فلان قد مات

[فــيصــل بـن طـارق الفـايـز @fjrtk]

ما عاد تنشد عن تفاصيل يومي
ولا عاد تنشد عني اليوم لاغبت

كنت القريب وكنت دايم قدومي
ولاغبت ضقت ولاتلاقيت بك طبت

جعلك فمان اللّه ما هي سلومي
في طردة المقفين مايوم حاربت

عز اللّٰه ان الناس ماهي تدومي
وعزالله اني ف هقوتي يمك اذنبت

[فــيصــل بـن طـارق الفـايـز @fjrtk]

يهمّني همّك وأحاتي محاتاك
أنا معك في كل فرحك وهمّك

لا خان وقتك وأقرب الناس خلاك
تلقاني أقرب من وريدك لدمك

[فــيصــل بـن طـارق الفـايـز @fjrtk]

خوينا نقلط على الموت لعيونه
مثل ما يقلط ضيفنا في مجالسنا

وان صاح فينا نعرض وجيهنا دونه
ونطلب له اللي ماطلبناه لانفسنا

عبد الهادي ابوديه

[فــيصــل بـن طـارق الفـايـز @fjrtk]

يقول الشاعر محمد بن حمود

ما يجعل يدين البنادم مكاتيف
الا الجمايل لا عجز عن ثمنها

انشهد ان القيد قيد المعاريف
تفنى العظام ولا فنى القيد منها

[فــيصــل بـن طـارق الفـايـز @fjrtk]

مرحوم ياللي حال من دونه الطين
صاحبك جاك ودمع عينه يهله

جيتك على عهد الوفا والوفا دين
والصدر عقبك فاقد اليوم خله

باريحة الشيح وعطر البساتين
يا غايب وقلبي غيابه يتله

وقفت عند القبر واصفق بكفين
يا عونة اللّٰه كيف ذا الموت شله

دنيا تفرق شمل ناس محبين
والصبر مر ولا قوينا نمله

[فــيصــل بـن طـارق الفـايـز @fjrtk]

العلاقات الذهبية تقوم على ما يلي :

لا احتجتنا طنش جميع الخلافات
وقفاتنا ما ترتبط مع ... زعلنا

القدر يبقى لو تزول العلاقات
ما ننكر العشرة على سلم اهلنا

[فــيصــل بـن طـارق الفـايـز @fjrtk]

الخوّة عند البدو يعني الصديق حسبة الأخو ماهي عشرة قد ماهي موقف ونخوة ، يفتخرون في خويهم مثل ما يفتخر الواحد بأخوه من الدم

قال سلطان الحويقل :

رفيقي اللي معنزها على القوه
مايختلف لو يجيه الهرج من يمي

ولا ينكر الوقفه ولا يجحد الخوه
لو يفجعه في ولد عمه ولد عمي

[فــيصــل بـن طـارق الفـايـز @fjrtk]

صاحبي غلطتي ماهي نهاية مصير
اعتذر منك واتأسف على مابدر

خل عندك على قدر العلاقه ضمير
صاحبك من ثلاث ايام ضايق صدر

من يواخذ خويّه ف الزمان الاخير
راحت ايام عمره في حياته هدر

لاتكبر عيونك في خطاي الصغير
وانت عندي كبير ولك مكان وقدر

حافظك مثل ما يحفظ عصاه الضرير
وحاشمك حشمة الي مجلسه ف الصدر

شرهتك غاليه عندي وقدرك كبير
وشيمة العفو ترفع ما تنزل حدر

لاقبلت اعتذاري جعل خيرك كثير
وان تجاهلت تبقى في عيوني بدر

الزعل طال ولا صار عمره قصير
والله اني لا اموت ولا طعنتك غدر

[فــيصــل بـن طـارق الفـايـز @fjrtk]

شلتك بصدري يوم ضاقت لياليك
واشعلت لك نار كوتها ضلوعي

اخطيت في حقي ولازلت اناديك
عندي امل بكره تحن لرجوعي

انا الامان اللي قتلته باياديك
وانا ضياك شلون تطفي شموعي

بالامس توعدني وعد ما أخليك
واليوم احارب بالمفارق دموعي

[فــيصــل بـن طـارق الفـايـز @fjrtk]

ماعلى الدنيا مقيم ولا على الدنيا مخلد
اغتنم فرصة حياتك بالصلاة والعبادة .

[فــيصــل بـن طـارق الفـايـز @fjrtk]

الحزن فاق وهلت العين عبرات
واستنزفت كل الجروح الركيدة

خذيت مع روس المراقيب سجات
وكتبت من بوح المشاعر قصيدة

على وليفن باع كل العلاقات
علاقتن كنت احسبنها مديدة

عزاه ي ايام الهوا والمسرات
والعشره اللي تنكتب بالجريدة

حبن نبع بالقلب ماهي لغايات
ما حده العذال واهل المكيدة

مع السلامة يا غرام البدايات
يا حبي الأول وآخر جديدة

هقيت ما تمحيه بعض الخلافات
ثابت ولا الايام تفني رصيدة

مع الأسف خابت جميع الطموحات
الحلم ضاع ومات نبض القصيدة

[فــيصــل بـن طـارق الفـايـز @fjrtk]

ظروف بقعا ما تكل ولا تلين
ووجيهنا ما هي بحصادة علف

نصافح كفوف النشامى باليمين
ولا لنا في معهد الحمقا ملف

الصدق ينجي صاحبه دنيا ودين
سترة نجاةٍ ما يجي فيها تلف

والكذب يطرح صاحبه لو هو فطين
يكشف خفايا حيلته ف أول ملف

ترى الكذوب ألعن من إبليس اللعين
إليا درى إنك كاشف وضعه حلف

[فــيصــل بـن طـارق الفـايـز @fjrtk]

يانفسي اللي ضايعه بين رايين
ماودي اظهر للعرب كل خافي

أنا الغريب اللي غريب من سنين
وانا القديم الي قديم اختلافي

تلعبّي الدنيا من يسار ويمين
وامشي على رمضا المقادير حافي

إنسان وإنساني ضمير وحمر عين
غامض مع العالم ولي قلب صافي

طبيعي اني فيني الزين والشين
لكن يكفي إني مع الناس وافي

وجدي على الاحلام قبل الثلاثين
كم فرصةٍ عدت وماتت خلافي