Top Tweets for #SlowClapping

આપણી દુનિયામાં માણસ જાત 9 મહિનામાં સંતાન પેદા કરી શકે છે પણ સિસ્ટમમાં જાણે કશું ય ટસનું મસ નથી થતું. આજથી 9 મહિના પહેલા તથ્ય પટેલના અકસ્માત પછી આક્રોશ ફુટી નીકળેલો હતો, 9 મહિના પછી પુણેના અકસ્માત વિશે વાંચીએ તો લાગે કે શહેરના નામ અને મૃતકના સરનામાં બદલાયા છે બાકી બધુ ત્યાંનું ત્યાં જ છે. આશરે 2.5 કરોડની પોર્શ કાર લઈને 12માં ધોરણમાં પાસ થવાની ખુશીમાં 17 વર્ષ 8 મહિનાનો કથિત નાબાલીક છોકરો પબમાં પાર્ટી કરીને સંભવત દારૂ ઢીંચીને નીકળે છે, પ્રાથમીક દ્રષ્ટીએ જોનારા લોકો કહે છે કે 200કિમીની સ્પીડ પર ગાડી હશે, અકસ્માત કરે છે, બે લોકોનું મૃત્યું થાય છે, મૃતદેહ ચિતા પર પહોંચે એના પહેલા બિલ્ડર બાપના બેટાના જામીન મળી જાય છે, જજ જામીનની શરતમાં સજા આપે છે કે બેટા ઓવરસ્પીડીંગ પર નિબંધ લખી આપ, પોલીસ બ્લડ સેમ્પલ કલેક્ટ નથી કરતી, ટેસ્ટ નથી થતો, બધુ જ સેટ હતું... પણ અચાનક ઘટના વાઈરલ થાય, મીડિયા પ્રશ્નો કરે અને હવે કાર્યવાહી શરુ થાય. શું બદલાયુ આટલા સમયમાં? પૈસાના જોર પર બધુ ખરીદી લેવા માટે અને પૈસા માટે બધુ વેચી નાખવા માટે તૈયાર લોકોને આપણે ક્યારેય એ સંદેશ નથી આપી શક્યા કે અમીર બાપની બેફામ બનેલી ફરજંદો... આ દેશના રસ્તા તમારા બાપની પ્રોપર્ટી નથી કે તમે મનફાવે એમ ગાડી ચલાવો. તથ્ય હોય કે આ કથિત નાબાલીક... આ લોકોના બચાવમાં ઉતરીને એવુ કહેતા માણસો કે મોંઘી ગાડી સ્પીડમાં ચલાવવા માટે જ હોય છે એ લોકોને એક દિવસ એ પરિવારની વચ્ચે બેસાડો જે પોતાના 20-30 વર્ષના સંતાનોને મુખાગ્નિ આપે છે. એમની તો જિંદગી આ ઘટના પછી પુરી થઈ જાય છે.