Top Tweets for #Struggle_for_Knowledge_And_unity

بلوچ اسٹوڈنٹس ایکشن کمیٹی تونسہ ھنکین جوڈ کنگ بوتگ۔ مظہر بلوچ ھنکینی کارمستر ءُ سراج بلوچ ھنکینی کارگُشاد گچین کنگ بوتگ اَنت۔ بلوچ اسٹوڈنٹس ایکشن کمیٹی بلوچ اسٹوڈنٹس ایکشن کمیٹی تونسہ ھنکین ءِ لس دیوان گل ءِ مزن کار گشاد اظہر بلوچ ءِ سروکی ءَ برجم دارگ بیتگ۔ھنکینی لس دیوان ءِ ھاسیں مھمان بُنجاھی کُمک کارگُشاد مھمد بلوچ بیتگ۔ دیوان ءِ بُن گپ بُنجاھی سرکیولر، گوستگیں بنزہی اھوال، نگد کاری، گل کاری، ھندی ءُ میان استمانی سیاسی جاورھال ءُ آؤکیں گامگیج بوتگ اَنت۔ دیوان ءَ جتائیں بُنگپانی سرءَ تْران کنان ءَ بُنجاھی سنگتاں گوْشت کہ گل ءِ گل کاری(تنظیم سازی) شاھگان بوان اِنت ءُ گل ءَ مرچی بلوچستان ءِ گیشتر ھند ءُ دمگاں وتی اسٹریچکر فعال کتگ اَنت۔ چوشکہ گوستگیں باریگ ءَ ھاران ھنکین ءِ جوڈ دیگ ءُ نی تونسہ شریف ءِ نیام ءَ گل ءِ ھنکین ءِ جوڈ کنگ بلوچ نودربر سیاست ءِ تہ ءَ جوانیں گامگیجے۔ بلوچستان ءِ ھند ءُ دمگاں گل ءِ نوکیں ھنکینانی جوڈ بوگ ءَ چہ گل ءِ پروگرام بلوچستان ءِ کُنڈ کُنڈ ءَ سر بوت کنت۔ گل ءِ سرجمیں بلوچستان ءَ سر کنگ ءُ کُلیں بلوچ نودربراں یک پتّرے ءِ سرءَ یکجاہ کنگ ءِ پالیسی سرءَ دلجمی ءَ گوں جھد بیگ اِنت۔ بلوچ نودربراں یک پتّرے ءِ سر ءَ یکجاہ کنگ ءُ آھاں سیاسی ءُ شعوری تربیت کنگ راج ءِ لوٹانی ھواری ءَ مئے زمہ واری اِنت کہ آئی ءَ گل وھد ءِ ھمراھی ءَ سرجم کنان اِنت۔ بساک ھما پروگرام ءَ نودربراں سر کنگ ءَ اِنت کہ آ وھد ءُ بلوچ نودربر سیاست ءِ لوٹ اِنت ءُ گل ءِ پلیٹ فارم ءِ سرءَ بلوچ ورنا کار کنگ ءَ جاڑیگ اَنت۔ دیمتر ءَ تْران کنان ءَ سنگتاں گوْشت کہ تونسہ بلوچستان ءِ ھما ھند اِنت کہ اُود ءَ نوْد ءَ گیش درسد آبادی بلوچ اَنت۔ بلوچستان ءِ گیشتر ھند ءُ دمگ سرکاری ڈالچاریانی سوب ءَ سیاسی علم ءُ شعور ءِ پڑ ءَ نزور انت ءُ ھستیں وانگی نظام ءِ سوب ءَ مھلوک بلوچ گوستانک ءُ بلوچ سیاست ءَ چہ گِستہ ءَ اَنت۔ بلوچستان ءِ گیشتر ھند ءُ دمگ زمینی بنیات ءَ چہ گلزمین ءَ سندگ بوتگ اَنت ءُ دومی نیمگ ءَ چہ بلوچ سیاست ءَ دور کنگ بوتگ اَنت۔ سنگتاں تْران کنان ءَ گوشت کہ تونسہ ھنکین ءِ سنگت دْرست کالج تبک ءِ نودربر اَنت ءُ اے پہ بلوچ نودربر سیاست ءَ جوانیں گامگیجے۔ اے پہ نودربر سیاست ءِ ھاترءَ اژدری انت کہ مارا کالج ءُ اسکول تبک ءِ نودربراں سیاسی علم ءُ شعور ءِ سر کنگ بندات کنگی اِنت۔ پہ بلوچ نودربر سیاست ءِ ھاترءَ الّم اِنت کہ گل ءِ پہ ھرچ تبک ءِ نودربرانی ھاتر ءَ یکجاھی ءُ آھانی وانگی، سیاسی ءُ شعوری تربیت یک مہکمیں رنگے ءَ برجم دارگی اِنت۔ جتائیں بُنگپانی سرءَ دلجمی ءَ تْران ءَ پد آؤکیں گامگیج ءِ بُنگپ ءَ تونسہ بُنزہ ھلاس کنگ بوت ءُ بساک تونسہ ھنکین جوڈ کنگ بوت۔ نوک گچین بوتگیں ھنکینی کابینہ ءَ مظہر بلوچ ھنکینی کارمستر، اصغر بلوچ ھنکینی کُمک کار مستر، سراج بلوچ ھنکینی کارگُشاد، سجاد بلوچ ھنکینی کُمک کار گُشاد ءُ عمر بلوچ ھنکینی ھالرسانی کارگُشاد گچین کنگ بوتگ اَنت۔ گُڈسر ءَ نوک گچین بیتگیں سنگت سوگند دیگ بیتگ اَنت آہی ءَ پد ھنکینی لس دیوان ھلاس کنگ بیتگ۔ بنجاہی جارکش بلوچ اسٹوڈنٹس ایکشن کمیٹی 🔗 https://t.co/75qlJD8bSq