Top Tweets for #tootak

توتک نامہ: المیے سے رزمیے تک کا بیانیہ اداریہ: بلوچ وائس فار جسٹس سردار علی محمد قلندرانی کا شمار ان شخصیات میں ہوتا ہے جنہیں بردباری، سنجیدگی، معاملہ فہمی اور دور اندیشی کا پیکر کہا جاسکتا ہے۔ سیاست کے میدان میں ان کے نظریات سے اختلاف ممکن ہے، مگر ان کی غیر متنازعہ شخصیت اور سماجی کردار سے اختلاف کی گنجائش نہیں۔ انہوں نے ہمیشہ اپنے علاقے میں خیر خواہی، بھائی چارگی اور روایتی ہم آہنگی کو پروان چڑھایا ہے۔ یہی وجہ ہے کہ ان کی ذاتی زندگی اور قبائلی کردار تنازعات سے پاک رہے۔ یہ کردار ایک ایسے رزمیہ ہیرو کی یاد دلاتا ہے جس کے گرد سماج اپنی اجتماعی تمثیل تعمیر کرتا ہے۔ لیکن سوال یہ ہے کہ ایسی غیر متنازعہ شخصیت کو ریاستی ادارے یا ان کے ڈیتھ اسکواڈز کیوں نشانہ بنارہے ہیں؟ اس کا جواب شاید یہی ہے کہ سردار علی محمد قلندرانی نے اپنے آپ کو ریاستی جبر اور اس کے پروردہ ہتھکنڈوں سے ہمیشہ دور رکھا۔ چاہے ان کا تعلق کسی وفاقی جماعت سے ہو یا مذہبی جماعت سے، مگر ان کی بنیادی شناخت "قوم دوست شخصیت" کی ہے۔ وہ قومی اور سرزمینی مفادات پر سمجھوتہ کرنے کو تیار نہیں، اسی لیے انہیں بار بار اذیت اور آزمائش سے گزار کر توڑنے کی کوشش کی جاتی ہے۔ یہاں یہ آزمائش یونانی المیے کی طرح ہے جہاں ہیرو اپنی صداقت پر قائم رہتا ہے اور تقدیر اسے بار بار کڑی کسوٹی پر پرکھتی ہے۔ 2011 میں جب توتک پر جارحیت کی گئی۔ اس دوران سردار علی محمد قلندرانی کے تین بیٹے میر عتیق قلندرانی، خلیل قلندرانی اور وسیم قلندرانی سمیت کئی قریبی رشتہ داروں کو جبری گمشدگی کا نشانہ بنایا گیا۔ اس کے بعد توتک میں ڈیتھ اسکواڈز کی باضابطہ تنصیب کی گئی، اذیت گاہیں اور قتل گاہیں قائم ہوئیں اور باسیوں کو ہجرت پر مجبور کیا گیا۔ بعد ازاں اجتماعی قبروں کی برآمدگی نے اس ساری بربریت کا پردہ چاک کردیا۔ یہ منظر نامہ ایک المیہ کی صورت میں سامنے آتا ہے، جہاں زمیں اپنی کوکھ میں وہ لاشیں چھپائے بیٹھی ہے جو رزمیہ تاریخ کے خاموش استعارے ہیں۔ ریاستی سرپرستی میں پروان چڑھنے والے ڈیتھ اسکواڈز نے نہ صرف توتک کی روایتی قبائلی ہم آہنگی کو پارہ پارہ کیا بلکہ ایسے افراد کو مسلح کیا جن کی نہ کوئی سماجی حیثیت تھی اور نہ قبائلی وقار۔ بندوق، گاڑیاں اور زر کی طاقت فراہم کرکے انہیں سردار علی محمد قلندرانی کے خیر خواہانہ کردار کے سامنے لا کھڑا کیا گیا۔ مگر یہ تمام سازشیں اپنے مقصد میں ناکام رہیں۔ یہ ناکامی ایک رزمیہ فتح تھی وہی منظر جہاں روشنی اندھیروں کو چیر کر نکلتی ہے اور استعارہ اپنی معنویت کو آشکار کرتا ہے۔ جب ریاستی جبر نے دوبارہ توتک پر قبضے کی کوشش کی تو سردار علی محمد قلندرانی سیسہ پلائی ہوئی دیوار بن کر سامنے آئے۔ انہوں نے ایک قبائلی جرگے کے ذریعے ڈیتھ اسکواڈز کے خلاف اعلانِ جنگ کیا۔ یہ اقدام ڈیتھ اسکواڈ کے کارندوں سے زیادہ ریاستی اداروں پر بھاری اور ناگوار گزرا۔ اسی طرح ڈاکٹر ماہ رنگ کی ماورائے قانون گرفتاری کے خلاف بی این پی کے دھرنے میں شرکت بھی انہی قوتوں کو کھٹکی جو بلوچ قوم کی مزاحمتی روح کو کچلنا چاہتی ہیں۔ آج ان قوتوں نے سردار قلندرانی کو جھکانے کے لیے ایک اور حربہ آزمایا ہے اس بار ان کے دست راست اور جانشین بیٹے میر یوسف قلندرانی کو جبری گمشدگی کا نشانہ بنایا گیا تاکہ والد کو سجدہ ریز کرنے پر مجبور کیا جا سکے مگر تاریخ نے بارہا ثابت کیا ہے کہ جبر اور طاقت کے ہتھکنڈے بالآخر خود جابروں کے لیے رسوائی کا سامان بنتے ہیں۔ یہی وہ المیہ طنز ہے جو ہمیشہ حاکم کے زوال اور محکوم کے حوصلے کو ایک تمثیلی رزمیے میں ڈھال دیتا ہے۔ توتک کی داستان صرف ایک شخص یا ایک قبیلے کی آزمائش نہیں یہ بلوچ سماج کے اجتماعی شعور اور مزاحمتی حوصلے کی علامت ہے۔ سردار علی محمد قلندرانی کا کردار اسی حقیقت کا غماز ہے کہ سرزمین سے جڑنے والے لوگ جبر کے سامنے ڈٹ تو سکتے ہیں لیکن جھک نہیں سکتے۔ یہ داستان دراصل ایک قومی رزمیہ ہے جس میں سرزمین، خون اور مزاحمت مل کر اساطیری بیانیہ تخلیق کرتے ہیں وہی بیانیہ جس میں انسان اپنی سرزمین کے ساتھ ہمیشگی کا استعارہ بن جاتا ہے۔