زوجوني رجال أعمى، وقالوا لي:
أنتِ مو جميلة وهذا أعمى وما راح يشوفك وبتعيشين معه بسعادة.
رضيت بنصيبي وتزوجته، ووقفت معه وشجعته يسوي عملية عشان يرجع له بصره.
كان دايم يقول لي: أنا أحبك ولو بسوي العملية فبسويها عشان أشوفك.
وفعلاً، وقفت معه بكل مراحل علاجه كنت ممرضته وزوجته وسنده، أسهر على راحته، أعطيه أدويته بوقتها، وأروح معه للمواعيد وأنتظر بالساعات لين يجي دوره.
وبعد فترة نجحت العملية وجاء اليوم اللي شال فيه الشاش وشافني لأول مرة. كنت واقفة قدامه وقلبي يرجف، أنتظر منه كلمة حب أو نظرة تطمّن قلبي، لكنه ظل ساكت يتأمل ملامحي، وبعدها ضحك ضحكة باردة وقال:
أهلي كان عندهم حق بس ليه ما قالوا لي إن الحقيقة أصعب من كذا؟.
من بعدها تغير تماماً، صار يتجنبني ويرفض حتى أقرب منه، وكأن كل اللي سويته عشانه ما له أي قيمة. وبعد كم يوم قال لي: البسي، بنروح لأهلك.
فرحت وحسبت إنه بيراجع نفسه، لكن أول ما جلس عند أهلي قال لأبوي:
أنا جيت اليوم أشكركم وأرجع لكم الأمانة.
وأشار علي وقال: أنا كنت أعمى والحين صرت أشوف، وشفت اللي كنتوا مخبينه عني لو كنت أدري إن شكلها كذا ما كان تزوجتها من الأساس.
أبوي عصب وقال له: احترم نفسك هذي بنتنا اللي وقفت معك يوم كنت ما تشوف.
لكنه رد بكل وقاحة:
هي وقفت معي لأنها تدري إنها ما راح تلقى أحد يتزوجها وكانت تنتظرني أفتح عيوني والحين أنا مستحيل أعيش معها.
ومشى وطلقني قدام أهلي وتركني وسط صدمة ما قدرت أستوعبها.
لكن اللي كسرني أكثر كان كلام أمي، قامت تصارخ فيني وتقول: مو قلنا لك ارضي بنصيبك؟ ليه خليتيه يسوي العملية؟ الحين شافك وطلقك وش بيقولون الناس عنا؟ فضحتينا وضيعتي نفسك وضيعتي سمعتنا.
حتى أبوي ما قدر يوقفها وأنا كنت أسمع كلامهم وقلبي ينكسر ما توقعت إن أهلي يلوموني على شيء ما كان بيدي.
ما قدرت أتحمل أكثر أخذت شنطتي وطلعت من البيت وانا أبكي ما ادري وين اروح ولا وش ينتظرني لكن كنت متأكدة من شيء واحد: إني ما عاد اقدر اجلس بمكان انكسرت فيه من اقرب الناس لي.
وقفت بالشارع وطالعت بيت اهلي للمرة الأخيرة البيت اللي المفروض يكون اماني وسندي صار اكثر مكان وجعني.
طلعت من زواجي مكسورة ومن بيت أهلي مطرودة.. وكل ذنبي إني وقفت مع إنسان لين استعاد نظره، لكنه أول ما شافني قرر يتخلى عني.