وشهي تفيد احلامي المستثيره ؟
لولا الهقاوي عمرها ما استثارت
وبجولتي وسط الحياه المثيره
عرفت وش يحصل "لا لفّت ودارت "
و عرفت وش بعد الليالي المريره
لابدّ تبرد نارها .. عقب فارت
و أضرب بيمنى ما تعوّد .. قصيره
في وجه دنياي ان تردّت وبارت
احيا على مبدا .. واموت فـ مصيره
اخير من اللي داج وخطاه حارت
و فرط الثقه فالناس جرأه خطيره
اكبر خطا .. منه النشامى استجارت
اخطيت لا احرص .. في أمورٍ كثيره
لكن وش يفيد الندم .. دام صارت
-يزيد-
ليه تسأل .. عن اخباري ؟ ومن جاب طاري ؟
كيف حصّلت بين اهل الوشايه .. مسالك
لا تعذّر .. تراك اخطيت .. والذنب جاري
ذنب جرحٍ .. تمكّن داخلي من خلالك
ما أشوفك صراحه تستحقّ انتظاري ..
و صار مسلوب دافع رغبتي في وصالك
مكتفي .. وان ورَد من ذكرياتك طواري
ما تحرّكت اهلّي .. لو ذبحني دلالك ..
ليه تسأل ؟ وانا مابي أردّ اعتباري ..
خوفك المصطنع وضّح ترى عكس ذلك
بسّ وان قالها الله .. ما تشوف انكساري
يمكن تشوفه بحلم او يورّى فـ خيالك
تنعمي عين حسّادي إذا .. اشرق نهاري
و تنعمي عينك ان حلّ بخفوقي بدالك
-يزيد-
وشلون كنت اكتب قصيدي بدونك ؟
ياللي أرقّ من الورود النديّه
لبيّه .. من قبل العرب ياخذونك
لبيّه .. من بعد السنين الشقيّه
أنتي الفريده والبقيّات دونك
في حضرتك وش بقى للبقيّه ؟
ما يشبهونك في دلالك ولونك
فيك الخصال العذبه المخمليّه
يا كبر حظّ اللبس .. عانق متونك
آيات حسنك .. والشواهد جليّه
اخاف بانّ اصابعي يجرحونك
لامن بغيت المس خدودك بديّه
تَلفت عليك الخلق .. ما يلفتونك
الله وهبك الزين والنرجسيّه ..
سلهم ولا تناظر .. عيوني بـ عيونك
اتعبتني من قوّة الجاذبيّه
بعيني احساسٍ .. يطمّن ظنونك
ارتاح .. وارمي ما يغثّك عليّه
لا والذي صوّرك ما يشبهونك
لا في كثير ولا بعد في شويّه
بيتك فصدر الشاعر اللي يصونك
يوصف لك شعور.. فـ معاني ثريّه
لو قارنوك بهالبشر .. "يظلمونك"
"ملاااك .. يا ابو طلةٍ يوسفيّه"
-يزيد-
@iy2z77
مبروك صدور #ألبوم_بندر_2026
والشكر موصول لسمو الأمير عبدالله بن فيصل بن يزيد على الكلمات الأكثر من رائعة، مدرسة شعرية لها طابعها المتفرد الذي يلامسني بشكل خاص
@abdullahfy_ .
والشكر ايضًا للملحن المختلف @Wtrcomposer على التنوع الموسيقى والأجواء المختلفة.
لكن #لحظه غير فعلًا💔🔥