في ليلة جاها من الله شتاوين
من وقعها كلٍ جلس في محلّه
فيها العزوبي حاله اشين من الشين
وفيها الهواوي ما يبي شوف خلّه
ما ادفى عظامه حضن مريوشه العين
لو بين اياديها خذا الليل كله🚶🏻♂️
اتهرّب : كل ما اقبل علي ليلٍ مليح
فيه لـ الشرقي هبايب ولـ القمرا سنا
كن قلبي يسري الليل فوق بساط ريح
وده يصادف دقايق من أيام الهنا
ما يموت العاشق إلّا بعذل المستريح
لا عجَز يشرح من العشق لذات العنا
يوم ما كنّ البسيطه لها : جوٍ فسيح
ويوم في عيني جبال السراوات : دْهنا
ان بغيت اكفّن الحب واهديه الضريح
والله أن اصبح وهو تاركٍ خلفه ضنا
ما قدرت آعرف قلبي سخي ولّا شحيح
من كثر ما حال دون ( المحبه ) وانثنى
يا صحيح الود ما عاد في حالي صحيح
ادرِك اللي مدِركه بعد فرقاك الونى
ويش اداوي من جروحي وانا كلي جريح
لا غفى جرحٍ هنا ، صاح جرحٍ من هنا
لا توقفني ليا جيت محتاج ( المطيح )
المطيح احيان يحتاجه ( الميّت وانا )
انا من اول خوي اللي على دربي
واليوم نفسي قد ادنى شي يجرحها
حتى شماغي ليا من ذعذع الغربي
اقول ما ذعذع الا جاي يطرحها
ولا شعور الفرح ما عاد يثّر بي
تمرني لحظته ولا اقدر افرحها
اخر لامل فيك ياللي كنت تشعر بي
تعال رجّع علاقتنا لـ مطرحها
انا بديت اتلاشى واخسر حربي
فهمت ولا تبيني باقي اشرحها ؟
شفني تعذرت واقبل عذري وقربي
وجرحت نفسي وانا ما ودي اجرحها
- عويد النجود