ليـل

وردة ٍ ما عاشت إلا في دلال

[ليـل @nnniight]

عندي من الصبر ما يكسر ظهور الجمال
و فيني من العز ما يسند مقام و قدر

احداث الأيام مقبوله على كل حال
إليّا اقبلت خير ، و إن قفّت قضاء و قدر

[جابر النشيرا @jaber_nshera]

لو بينك وبين بعض الناس عشرة عمر
ماتسلم من الظنون اللي يظنونها

الشجرة الطيّبه لو هي قليلة ثمر
اخير من شجرةٍ ماتثمر غصونها

يـ اصحابنا كان فيكم من يهمّه لـ امر
لاتفتقون ( الجروح ) ولا تخيطونها

تجاوزو كل شي الا الخطوط الحمر
مهما تكون الميانه لاتعدّونها

[ليـل @nnniight]

"سعد عبدٍ قبل يأتيه موته .. لقى منك العفو
واكتفى عن حياة الزيف برضاك و رضا والديه"
- علي الغياثين المري

[ليـل @nnniight]

"تطيح القلايد كلها .. من ذهب والماس
بعد قلدوك المنسب الطيب أجدادك"
- مبارك بن وافي

[ليـل @nnniight]

أنا أذكرك كلّ ساعه وأفقدك كلّ ليل
ولي نفسٍ ما الله وهبها عنك سلوانها

كمّ لي وأنا أكافح أشواقي بصبرٍ جميل
والبعد سلّال نفسي … وأكبر أحزانها
- بندر الدويش

[ليـل @nnniight]

"والله ما لـ الدنيا طعم عقبك ولا لـ العمر امان
عوّد واخذ بـ الخاطر المكسور ، وارضه واجبره

الصدر من عقبك قفر ولـ جيّتك شفق وضمان
ومن غيبتك .. كن وحشة الخفّاق وحشة مقبره

غيرك لا منْه اقبل علي .. قفّيت قفّاية زمان
ولا انت من تقبل عليه يموت ما اعطاك ظهره"

- علي ال فطور

[عبدالله السراهيد @Alsraheed]

اسر يـ الليل القصير اللي تفاصيلك طويلة
العوض في « ليلةٍ » ما تظلم الدنيا بختها

في رحاب الارض .. ساعاتٍ دقايقها ثقيلة
يتساوى عندي ؛ اللي فوقها بـ اللي تحتها

التظاهر بـ الفرح .. غير التظاهر بـ الفضيلة
اتركوني مثل مااعرف نفسي اعرف مصلحتها

ودي أبعد عن جدال وودي أقرب من جديلة
لين آجدد : في ( زوايا البال ) ذكرى راعيتها

والله ان كن الهبايب .. والنسانيس العليلة
ما تعرف تهب .. من كل الجهات الا جهتها

والعيون اللي ما شد انظارها .. برق المخيلة
ما تحب من الدروب الا الدروب اللي مشتها

غايةٍ .. ما عاد باقي من ؛ ( وسايلها ) وسيلة
ما بقى لي غير مجلاسي تحت ظل شجرتها

من يبي يخلي سبيل الشوق من يخلي سبيله
والمشاعر . . من يجاوبها على كثر اسألتها؟

كل ما هامت بـ وجهٍ مستحيل القى بديله
قالت أجمل مرحلة فالعمر كانت مرحلتها

وصلها اللي ؛ ماقدرت انسى لياليه القليله
ليت ربي قاسمٍ له طول .. من طول رقبتها

بين رغبات الحياة .. الممكنة والمستحيلة
العبر .. من يعرف اولها ، سلم من تاليتها

يوم اشوف اللي يهينون النفوس بـكل ليلة
أحمد الله كل ما انزلت العباد .. بـ منزلتها

مامعي لك حيل يا قلبي ولا لك معي حيلة
صبرك اهون من مشاويرٍ ماتحمد عاقبتها

لاانت ميت من هوان ولاانت ميت من فشيلة
ما لك الا موتةٍ وحدة .. متى ما جتك متها

[ليـل @nnniight]

"تراني عايش في غيبتك بين الأمل واليأس
أعلق فيك أمور ٍ ما تعلق .. غير فـ الغالي"
- مطرف بن شارع

[سعود @sud1iii]

ليت الليال القادمة والقدامى
ترفق على الوافين وتهدّي شوي

وليت الظروف اللي تمر النشامى
تمر ناسٍ لا نشاما ولا شي

[ليـل @nnniight]

"إن زعَل خلّى حياتك .. حياة ٍ شارده
وإن ضحك مالك بغيره ضحك ولّا عبس"
- ناصر مناحي

[ليـل @nnniight]

فدا وجهك اللي فيه قبّلة وفرجة كرب
وفدا وجنةٍ من فوقها الليل متهادي💘

[ليـل @nnniight]

"ان بغينا اللعب نزحف مع جو لعوب
وإن هبطنا سوق طيب ٍ ..خذينا ندّره"

[ليـل @nnniight]

الحدّيث الزين يرخي لك الراس العنيد
تفتح قلوب البشر كلمةٍ في حلها

والتغاضي يمسك الود بالحبل الجوّيد
النفوس مَن التغاضي يجفف غلها

والكلام أحيان فيّ بعض الأشياء ما يفيد
بعض الأشياء والله إن السكَوت أفضلها

البقى لاهنت للخيّر والفعل الحميد
شجرةٍ لاتم عمرك .. يظلك ظلها

[ليـل @nnniight]

"مشاريه الغلا مثل الحفاوه في لقى الغالين
وعتاب اللي يحب اقسى من الفرقا وطاريها"
- محسن بن مترك

[ليـل @nnniight]

يا سراب ٍ ماتت أحلامي على رجوى غديره
- محمد العذبه

[ليـل @nnniight]

"عذوبة مرحباك اللي تجيني كنّها .. ماجور
هي اللي كلّ ما أباعد تحرصني على الرجعه"
- حمد الحول

[ليـل @nnniight]

"ترى الكلمة الزينة لها بالصدر مثقال
تجي بالصدور المجدبة مثل وسمّيه"
- سعود مهدي

[ليـل @nnniight]

"رهيف المشاعر منه حتى الجروح بذوق
تقول يتطعم .. في كلامه وفي شربه"
- ناصر مناحي

[ليـل @nnniight]

"رقيق الحديث اللي على الكبد كنّه ماء
تباشر به نفوس ٍ.. من الوقت منلاعه"

[ليـل @nnniight]

هذي عين ولا يا أدعج العين طلقة فرد ؟

[ليـل @nnniight]

ضميري فتر حيله .. وقلبي قضى نحبه
– منيف الجراش