Technology 010

بعد استخدام مكثف لـ Grokbot وHermes بشكل يومي.. اقدر اعطي رأي الخاص عن الفرق بينهم بعد التجربة والتمحيص 🤖 أشوف أن المقارنة بينهم يمكن اختصارها في فكرة: وهي ليست مين أقوى واحد منهم؟ بل مين منهم يخدم طريقتك انت في العمل؟ تحملوني لان المقال طويل شوي. وفيه خلاصة فكري وتجربتي أقدمها لكم كنقل خبرة وتجربة 😉 طبعا هذا الطرح كان نتيجة تساؤل أحد الاخوة لما تكلمت عن تجربتي في مقال سابق عن Grokbot وأشار بأن Hermes ممكن يغنيك عنه. لذا كتبت هذه التغريدة الطويلة شوي للتفصيل في الموضوع والفرق بينهم. جربت الاثنين خلال الفترة الماضية بشكل مكثف جدا وربطتهم بكل شيء عندي فعليا مشاريعي أدواتي أعمالي مهامي ذاكرتي برامجي منصاتي يعني عصرت كل خصائصهم لأقصى حد ممكن، وكل واحد منهم ارى انه اصبح مخصص لطريقة مختلفة نوعا ما. في البداية كأي مستخدم يجربهم أول مرة، كنت أشوفهم متقاربين: تنشئ بوت، تعطيه دور، توصله بأدواتك، وتخليه ينفذ مهام متكررة. لكن بعد الاستخدام الفعلي والعميق ، الفرق بينهم اصبح لي اوضح. أشوف أن Grokbot بالنسبة لي أقرب إلى منتج جاهز. الفكرة أنك ما تحتاج تهتم كثيرا بما يحدث تحت الغطاء. تنشئ Bot، تعطيه مهمة واضحة، تربطه بالخدمات اللي يحتاجها، وبعدها تتعامل معه كأنه موظف صغير داخل النظام. أقوى الأشياء فيه أن كل بوت فعليا له مساحة مستقلة، وتقدر تتعامل مع عدة بوتات، تجمعهم في Group Chat، وتخلي كل واحد يؤدي وظيفة مختلفة. من المميزات اللي ميزته واعطته جانب قوة وفرقت معي كثير: الوصول من الجوال. أقدر أكلم البوت وأنا بعيد عن الكمبيوتر، أعطيه مهمة، أراجع النتيجة، أو أكمل محادثة بدأت من الجهاز. والمهم عندي أن تشغيله مو مربوط بجهازي الشخصي. يعني لو قفلت الكمبيوتر، البوت ما يختفي. وهذي نقطة ممكن تراها بسيطة في الكلام، لكنها كبيرة جدا في الاستخدام اليومي. لأن الـ Agent الحقيقي بالنسبة لي ما يفترض يكون “برنامج أفتحه على الكمبيوتر”، المفروض يكون موجود وقت ما أحتاجه. صحيح أني استطعت أن أصل إلى مرحلة أبعد، متقدمة نوعًا ما. ونزلت عنها بوست ، حيث استطعت ربطها بكل الأدوات والمنصات الموجودة على جهازي، واستطعت التحكم بها. لكن، ما كل شخص يستطيع تنفيذ ذلك. لكن نخلي المقارنة حسب المستخدم العادي على استخدامه الاساسي له. لكن مقابل سهولة Grokbot فيه شيء واضح تخسره: << التحكم >> وهذه نقطة متقدمة وتهم الشخص الخبير. 😎 أنت تستخدم النظام بالطريقة اللي صممها لك Grokbot. ما عندك حرية كبيرة في اختيار النموذج اللي يشغل كل Bot، ولا تشوف كل التفاصيل الداخلية بنفس الطريقة اللي تشوفها في أنظمة مفتوحة. وهذا أحيانا يكون شيء ممتاز ومريح. لأنك ما تحتاج تفكر: وش النموذج المناسب؟ وش الـ context؟ وش ملفات الـ agent؟ وش الـ MCP؟ وش الـ runtime؟ لكن كمطور، أحيانا هذا بالضبط الشيء اللي أبي أشوفه. وهذا جوهر الاختلاف مع Hermes. أنا أرى أن Hermes بالنسبة لي مو مجرد بديل مجاني لـ Grokbot. هذا وصف سطحي جدا. لأن Hermes أقرب إلى بيئة تبني داخلها نظام الوكلاء بنفسك. وهذا نقطة جوهرية جدا وفارقة بشكل كبير للبعض. أقدر أحدد النموذج. أقدر أشغل نموذج عبر API. أقدر أستخدم OpenRouter. أقدر أجرب نماذج مختلفة حسب وظيفة البوت. وأقدر حتى أربط بعض المهام بنماذج محلية. وأقدر أشغله مجانا أو على إشتراكاتي الحالية. وهذا الشيء مهم عندي تحديدا، لأني ما أشوف منطقي أشغل أقوى وأغلى نموذج على كل مهمة. بوت فرز البريد ما يحتاج نفس النموذج اللي يحلل مشروع برمجي. بوت البحث ما يحتاج نفس إعدادات بوت الكتابة. وبوت يتابع النماذج والاطلاقات ممكن يحتاج أدوات وسياق مختلف تماما. بالطبع Hermes يعطيني الحرية أبني هذا التقسيم. لكن الحرية هنا لها ضريبة. لأن Hermes يحتاج منك تكون أنت مهندس النظام. وهذي النقطة اللي أحيانا تضيع في المقارنات. لما نقول Hermes “أقوى في التحكم”، هذا ما يعني أنه أسهل. بالعكس. لازم تعرف وين البوت شغال، وش النموذج، وش الـ API، وش الأدوات، وش الملفات اللي يقرأها، وش السياق اللي يحمل معه، وكيف تخليه متاح طوال الوقت. وربما يجد البعض صعوبة في ذلك. لذا يبي شيء جاهز. أنا واجهت هذا فعليا لما بدأت أبني عدة بوتات عندي. بعض البوتات بسيطة وسريعة. لكن لما كبرت وظائفها، خصوصا بوتات البحث وتحليل النماذج، بدأت أشوف بطء في التنقل بينها وفي تحميل السياق. وهنا ظهرت مشكلة ما تشوفها عادة في المنتج المغلق: أنت مسؤول عن المعمارية. إذا حشيت كل شيء في Bot واحد، بيصير ثقيل. إذا أعطيته ملفات كثيرة، ممكن يزيد الـ context. إذا حملته أدوات كثيرة، ممكن يصير أبطأ. إذا اخترت نموذج ثقيل، وقت الاستجابة يتغير. وهذا بالنسبة لي ميزة وعيب في نفس الوقت. الميزة أني أقدر أصلحها. والعيب أني أنا اللي لازم أصلحها. وهناك فرق ثاني مهم جدا بين الاثنين: <<<التشغيل الدائم>>> في Grokbot هذه المشكلة تقريبا مخفية عن المستخدم. البوت شغال في بيئته السحابية. في Hermes لازم تقرر: هل أشغله على جهازي؟ على VPS؟ على سيرفر منزلي؟ على Cloud؟ إذا شغلته محليا، إغلاق الجهاز يعني توقفه. إذا تبيه 24/7، تحتاج بنية دائمة. أنا شخصيا أشوف أن تشغيل Hermes على VPS ثم التواصل معه عبر Telegram أو قنوات مشابهة هو أقرب طريقة تخليه يتصرف كبوت حقيقي بدل ما يكون مجرد Agent مربوط بكمبيوتر. لكن حتى مع هذا، يبقى Grokbot أفضل حاليا في تجربة الجوال نفسها. صح Hermes عنده قنوات تواصل ممتازة مثل Telegram وDiscord وغيرها، لكنها مو نفس إحساس وجود تطبيق جوال متكامل مصمم من البداية حول البوتات. وهذي واحدة من النقاط اللي أشوف Grokbot متقدم فيها بوضوح. كذلك فيه نقطة مهمة جدا كنت أظن في البداية أنها مرتبطة بقوة النموذج، ثم تغير رأيي: طبعا أحتجت أكملها في التغريدة التالية فروح ياوحش معاي 😄