بحكم عملي في الأمن السيبراني للأنظمة الصناعية ( اللي تشغّل الماء والكهرباء والطاقة والمصانع ) أشوف شي ما ينتبه له كثير من الناس:
الفرق بين تسريب بيانات وبين العبث بمحطة مياه هو الفرق بين خسارة أموال وخسارة أرواح.
في عالم البيانات، أسوأ شي يصير أن بياناتك تنسرق أو ملفاتك تنشفّر. لكن هنا الأثر ملموس: ضغط ماء ينخفض فتدخل مياه ملوثة للأنابيب، جرعة كلور تتغير، مضخة توقف، كهرباء تنطفي عن مستشفى.
والهاكر في أغلب الحالات ما يدري أصلاً وش اللي يعبث فيه. يشوف شاشة فيها أرقام وأزرار، يغيّر قيمة ويصوّرها ويتباهى فيها بقناته. ما يدري إن هذي القيمة بالذات هي اللي تمنع انفجار أو تسمم.
ولذلك أتمنى إن اللي يستهدف هذي الأنظمة يُعامل يوم من الأيام معاملة الإرهابي.
لأن الفعل نفسه لا يختلف كثير حيث أن الهدف مدني ما له قيمة عسكرية، والغاية فقط ترويع الناس وإيصال رسالة سياسية، والضحية المحتملة إنسان عادي ما له علاقة بالموضوع من أصله.
الفرق الوحيد إن واحد يستخدم متفجرات، والثاني يستخدم كيبورد وغالبًا الـAI عشان يفهم وش جالس يسوي.