مطيٰري .

هُنا .. جهه غير الجِهات الأربَعه "

[مطيٰري . @22k_ll]

حداك الحلم عن طيش الشباب لصحوة الإدراك بعد عشرينك اللي من ربيع العمر مسروقه

بديت تحسب الأيام المقابيل وتعد اخطاك.
كثر ما كنت شاعر يحسب حسابات منطوقه

اسولف لك عن شعور الندم يا عقلي الشكّاك
تقول أنه ورى حدب الضلوع مضيّعٍ نوقه

[مطيٰري . @22k_ll]

أختر لوجهك لون من بين الألوان
إلا الرمادي .. لاتكون الرمادي

الإختلاف يكون ميزه .. اذا كان
مبني على . . التصرف اللارادي

-يامرضي أهواء البشر وأنت زعلان
توهمهم أنك مختلف وأنت غادي

صدقني حتى المختلف بعض الإحيان
لاحاول أنه يختلف ..صار عادي

[مطيٰري . @22k_ll]

ما ورى هذا الشعور الا مصيبه
اقنعي يانفس وانقادي وطيعي

دام كلن فالغلا ماخذ نصيبه
ليه يوم اشري رضاك تحلّ بيعي

[مطيٰري . @22k_ll]

حتى عيال الحرار إللي تعشق الصعود
مْاعاد تلقى على روس المبادي، وكر

لو وازع الدين فـالإنسان ينقص يزود
الشيمه ترد راعيها ويحكر حكر

أحدٍ ليَّا ضاقت الدنيا بكى بالسجود
واحد ليَّا ضاقت الدنيا بوجهه سكر

[مطيٰري . @22k_ll]

ابيع الكحيلا والملايين في مخباك
واحامي على اسمك والليالي تصلفقني

تغير علي طبعك ولا ادري وش اللي جاك
تعامل معي بالكذب وتقول صدقني

[مطيٰري . @22k_ll]

انا اقول كلمه يارفيق الرخا الشكاك
واللي مايقدر رفقتي لا يرافقني

تعوضت فيك بخبرة ماهم بشرواك
مع ان ماحدٍ منهم على الطيب يسبقني

ما عاد به مجامل واستلم والعلوم عفاك
انا كان اجامل والمجامل موهقني

ضهدني زماني وانت معطيني مقفاك
تسولف لي من الضل والشمس تحرقني

[مطيٰري . @22k_ll]

ياساعي بما فيه الكفاية متى ترتاح
مع أهل القلوب الحاسدة لاتدورني

لو الله عطاك شوي من نظرة اللماح
لقيت الشيم من كل جانب تسورني

لاشفت العباد اللي تحرك بدون أرواح
شكرت الله اللي بـ المبادي منورني

[مطيٰري . @22k_ll]

ليش استحال الكلام حلوف
أصدق، وتدعيني الكذاب

ان كان لك في هواي شفوف
مليان صدري عليك عتاب

و ان كان عينك ما هيب تشوف
صدقي،، فلا تصدق الاحباب

وان كان تبغى الوصال صدوف
سافر ولا تشرح الاسباب

[مطيٰري . @22k_ll]

ياصاحبي والبساط الأحمدي مدّدْ
اياك تبخل بوصل إلي فتح بابه
-
اللي ليا جاك كنّه جاك متردّدْ
تأكد إن الغلا والحب من جابه

[مطيٰري . @22k_ll]

تقهويت حبك يوم عاده يجيب الراس
وبعد مابرد خليت باقيّه لغيري

[مطيٰري . @22k_ll]

يامل قلب من غرابيل الليالي ماستراح
تلزه الأيام وأبطى من عناه يلزها

الحظ يبرك ويحبي والناس أكافحها كفاح
على مواريد الحياة تدزني وادزها

أحيان أحس إني جبل متصدي وجه الرياح
وأحيان أحس إني غصون كل ريح تهزها

أبتعلى بالهوى وأرف فالجو الجناح
وإن كان ماعزيت نفسي ماحد بيعزها

[مطيٰري . @22k_ll]

اتمانع عن طريق ماهوب ممنوع
واختلي لي خلوة ما هي ضيقه

مثل من هدته هدّه ، وفوّعه فوع
حر لكن قاضباته .. مسابيقة

[مطيٰري . @22k_ll]

صاير من احداث الايام هادي روع
قبل احمل طاقتی فوق ما اطيقه

كل ماجيت اطرح الراي في موضوع
أذكر ان الله كفيل بـ مخاليقه

من تصيبه لحظة إدراك من ذا لنوع
مستحيل يكمل آخر طواريقه

العوض في غيبة الفرد بالمجموع
ناسبت قلبي و تلت معاليقه

[مطيٰري . @22k_ll]

ويوم اللّٰه امّن خوف قلبك ورعبك
خليتني مابين ضيقات وظنون

والحين ابرحل وانت ابخص ب ذنبك
والجرح يتشافى مع الوقت ويهون

[مطيٰري . @22k_ll]

ضيعت اجمل وقت عمري ب جنبك
ضحيت يوم ان الحبايب يضحون

بس انت ما تستاهل ابقى ب قربك
اشك لك قلب واحساس وعيون

وقفت مثل السيف صامل ب حربك
في موقف حتى القرايب يصدون

[مطيٰري . @22k_ll]

ذا الليل واضح ليل مسرى وهوجاس
من صمته ومن حزنه ومن ظلامه

الصبر صار اثقل من الهم والياس
والنوم صار ابعد من الابتسامه

اكثر علامات الصلف والتعوماس
بانت وبقى علامتين او علامه

ماعاد لي مع اي مخلوق مجلاس
خصوصًا اللي ما يثمّن كلامه

[مطيٰري . @22k_ll]

على وجهك اللي نوره يقدّي السارين
ملامح فراق .. ونيةٍ مابعد بانت

تكبَّر ماكن الله عطا الناس مثلك زين
وأشوفك بعينٍ منْك .. ماكنها عانت

حقيقة غلاك أكبر من الظن والتخمين
تهون الجروح .. ونظرتي فيك ماهانت

مصير الزمن لا دار .. كانك من الحيين
يعلمك أنا وش كنت ، والناس وش كانت

[مطيٰري . @22k_ll]

والله لو تجلس على رمش عيني
ماعاد أشوفك مثل ما كنت أشوفك

احفظ لك اللي كان بينك وبيني
وكرامتي ما هي رهينة لظروفك

[مطيٰري . @22k_ll]

يارب ما للعبد دونك مداهيل
تضيق الأرض وتاسعه في رحابك

حاجاتنا بأمرك سهود وتساهيل
وركابنا اللي نوخت عند بابك

ياكودها كوداه عند الرياجيل
وهي ماتبلغ ذرةٍ في ترابك

يا ما اطيب اللي قال لك شي ماقيل
ويا ما اخبل اللي مايحط الرجا بك

[مزيد الوسمي @mzed_9]

يا مسلم الإسلام طبع وجبلّه
مايقتصر في اداء واجب وتكرار

اليا عرفت ان التشكيّ مذله
عرفت بإن الصبر شيمه ومقدار

وإن افضل ادْوا للصدور المغله
ترحيبة المقبل وتسليمة المار

قناعتك .. كنزٍ رفيعٍ محله
ماتاصله حتى خبيثات الأفكار

منت بـ على مصلحتك ادرى من الله
اللي ماهوب مخيّرك غير ما اختار