انت حبّك ما لقيته على جال الطريق
ما تجيبه غير دعوّة حجيجٍ في منى
جيت من بطن السحايب كما الغيث الدفيق
تنجي اللي طول عمره حياته في عنا
منهو اللي يكسب رضاك يوم انك تضيق
ويتجرع كل لوعات حزنك غير انا
ايه احبّك واشهدني وسط حبّك غريق
وحالفٍ ما اخون حبّك ليا يوم الفنا .
غلاك أكبر من الواقع من الشرح ومن التعبير
ليا شفت المشاعر ما توصف قدرك أعذرها
على طاري غلاك الله يمسي طلّتك بالخير
يا حلو الليلة اللي في ملامح وجهك أسهرها
(( أحبك )) والمحبة ما لها غير الوصل تبرير
تمعن كلمة أحبك على أذنك يوم أكررها
عسى الدنيا تبسم لك وتصبح فرحتك روتين
و عساني كل ما اشتاق لـ لقاك القاك قدامي
من اول ما لمحتك لك شعور بداخلي للحين
يوديني البحر و يردني من البحر ضامي
احبك والذي خالق ضلوعي من سلاله طين
محبه فارقه ما تشبه الا بصمه ابهامي