َ

﴿ وَاذْكُر ربّكَ إِذَا نَسِيتَ ﴾

[َ @7b_i]

انا عن اللي جاي ما عندي علوم
ومستقبلي ما أعرفه الا بـ ذكره

واثق تمامآ بأن كل شي مقسوم
مثل ما اثق في حمد ربي وشكره

وفـمطاول الايام مانيب ملزوم
ب اعيش يومي بس واحب و أكره

لـ احدٍ يهرّجنا فـبكرة من اليوم
حنا عيال اليوم .. يا عيال ، بكره

[َ @7b_i]

طويت السنين وخاطري ذا السنه يادوب
وانا الشاطر اللي غلطته .. غلطة الشاطر

كثر ما سرح قلبي بحلمٍ ماهو مكتوب
كثر ما تعدته الليالي .. وهو ناطر

ماعاد احتمل زلة رفيق وخطا محبوب
ولا افرح لغيم .. ولا اتشفّق على ماطر

ماغير اتسلى بالهجيني ، وبالمسحوب
عسى فالقصايد ما يفرّج على الخاطر

[َ @7b_i]

اللهم إنا نجعلك في نحورهم ، ونعوذ بك من شرورهم اللهم احرسنا بعينك التي لا تنام واكتفنا بكتفك الذي لا يضام اللهم إنا نستودعك بلادنا وأمننا فاصرف عنا شر الأشرار وكيد الفجار وسائر بلاد المسلمين

[َ @7b_i]

الأيام تعرف خصمها زين وتشوم
حتى لو إنها بالقرار إتعسّف

إن مرّتك بيض الليالي على يوم
تأكد إن سود الليال إتأسف

[َ @7b_i]

التغابي فن و إن دل ، دل أنك ذهيِن
عش غبي و الناس تلعب على مكشوفها

النفوُس جنود من جند رب العَالمين
نفسٍ نوقف عليها ونفس نطوفها

المصَافح بالأحاسيس ماهو باليديِن
البشر تستَخدم إحساسها ، بكفوُفها

أرض نفسك أولى من الناس أجمعين
إن تبعت الناس بتموت و أنت تحوفها

[َ @7b_i]

على احبابنا اللي تحت وجه الثرى غافين
سلام الله .. وحمده وتبجيله وشكره

غفوا تحت الارض وعادهم ماغفوا فالعين
لو فراقهم .. تحمد به العين ما تكره

تغيب الوجيه .. وباقي اصحابها حيّين
على الواقع الملموس بين أمسه وبكره

[َ @7b_i]

الله يقدّرني أرفا واحتمل وادمح واداري
التغاضي .. يرفع الرجّال والحكمه تزيده

اللهم ..، لين في طبعي ، ولومي ، وإعتذاري
وغلظه وشدّه على حفظ المبادي والعقيده

ودّي انطح سيف خذلان الزمان بصدر عاري
ولا يراودني مجرد شك فـ خصالي الحميده

[َ @7b_i]

في زحام المغريات وليلها المتمادي
من ترك لله شيءٍ عاضه أبرك منه

يالله أعصم من محابيل الحرام فؤادي
عصمةٍ تاخذني بيمناي لين الجنة

ياعظيم الملك وأنت المستعان الهادي
باب جودك جعل مانيب محجوبٍ عنه

كل ظنٍ في سواك من الخلايق غادي
وأنت عبدك عند ظنه لا أحسن بك ظنه

[َ @7b_i]

إن ضاقت أيامك وتحتاج تغيير
لاتظهر الأوجاع والحزن خبه

العمر ضحكة ضيّعتها المقادير
وماعاش غير اللي رضا بحكم ربه

دايم تظاهر للجميع إنك بخير
أقل حاجة ، لو عشان الأحبه

[َ @7b_i]

ماقدرت أرثيك يادمث الجناب
اكتب البيت اللي يوجع واشطبه

والله لا معجم لغة .. ولا كتاب
فقدك اكبر من رفوف المكتبه

ما زهاك إلا الدعاء المستجاب
اللي ترتاح الضماير بـ سببه

وإن رثاك المزن من غر السحاب
ما معي غير القصيد ارثيك به

[َ @7b_i]

لولا الامل بالله كلتنا المقادير
اللي معالم غيبها خافيتنا

شِدّاتنا يالله بفضلك تياسير
وارزاقنا من مدتك كافيتنا

ماعاد عشنا ايامنا في رجا خير
لولاك ، ياللي رحمتك ضافيتنا

نرعى الليالي ، والليالي مدابير
ياما خذت منا ، ومن عافيتنا

[َ @7b_i]

يارب وأنا عبدك الخطّاي
أخطي وأتوب ولا لهيت أخطي

أقبلت لك كلي رجا بدعاي
أسألك وأنت الواهب المعطي

يوم القيامة لا اقصرت حسناي
تكفا علي بالعفو لا تبطي

[َ @7b_i]

لا تعيش العمر كله في شتات
أسترجع اللي راح منك وأجمعه

اللي ماينفع نفسه بعز وثبات
والله مايلقى اللي بعمره ينفعه

[سلطان الحوالي @sultan_alhawali]

مشكلتي أن الله خلق قلبي قوي
يضيق لكن ما يبيّن ضيقته

ولاني أبكي غير من فرقا خوي
مانيب من يبكي على عِشيقته

ولا أنت غالي و من ابن و آل و ذوي
لكن هذا قلبي ، و ذي طريقته

اللي يجي يا مرحباً أوي أوي
و اللي يروح يروح في حريقته :)

[َ @7b_i]

أنا يرضيني إنك تكسب بفعل الصحيح رضاك
ولا يرضيني انك تفعله من شأن ترضيني

على كثر الشكوك اللي تطولك من كلام عْداك
طرا مشواري اللي فالبداية كاد ينهيني

حزين إن الستاير واقفة ما تشكر الشبّاك
على صفق الهبايب.. وقفة الشبّاك تعنيني

[َ @7b_i]

خل السكوت يسود كل المواضيع
أنا أكبر من اللوم .. ومن التشكّي

[َ @7b_i]

الزمن رمحه على عقول الكْرام مسنَّن
والحياة أفراحها للناس حظ، وقسمة

لا تعجَّب لا لقيت الطيبين مجنَّن
الظروف تنادي الرجال وكلٍ بـ أسمه

[َ @7b_i]

خلك مثل ما قيل للعزم تباع
ما فيه صعب إلا وربك يحلها

[✵ @_probllem]

السلام ورحمة الله على الناس أجمعين
بعد ما ربي هداني على قول السلام

من صفات المسلم انه يحب المسلمين
وأنه يجاهد على الطاعه وترك الحرام

أرسل الله النبيين بالحق المبين
واستقامت حجة الله على كل الأنام

جعلني محبوب عندك يارب العالمين
البشر تعشق وتكره واتبدل في عام

فيه ناسٍ مرّت البال وهم الأكرمين
وفيه ناسٍ مرت القلب مافيهم أكرام

ما تعبت من المسافه ولا طوي السنين
كل يوم أشيل حلمي وأنا خلف الامام

ما اصعب من الدمع لا طاح بين السجدتين
وما اسهل من الذنب لاصرت تعطيه أهتمام

بين قلب ما يودك وراس ما يبين
أصنع بيدّيك مجدٍ يرقيك الغمام

من تبع درب الملذه ونهج الفاشلين
عاش في سجن التعوّد وحب الانتقام

تمضي الدنيا والانسان من ماء وطين
وان رحل منها ما كلف سوا طينه وخام

[َ @7b_i]

خاطري ماهوب طيّب ولا مرتاح بال
والعرب ماعاد لي شفّ في منطوقها

اتظاهر بالسعاده و اقول الحال عال
ولا انا ضايق و الاخلاق طايح سوقها