⁷⁹

انا لـ وجه الله تركت امنياتي

[⁷⁹ @FaY_79E]

قد بغيت أصادم الوقت لكن ماقويت.
هب ياوقتٍ تباهى بظلم الابريا.

[معكاز شعر @M3kkaz]

السمعة الطيبة والصيت حظ ونصيب
والمرجلة بنت والفعل المشرف مهر

كم واحدٍ لو يطيب له الزمن ما يطيب
وكم واحدٍ لو يشين الوقت صيته ظهر

وكم واحدٍ لو يموت إسمه لايمكن يغيب
وكم واحدٍ حي ،، كنه ميتٍ له دهر

ولا كل من قال انا صاحبك يبقى صحيب
ترى العلاقات بعض أحيان زمّة زهر .

[ًًً @uniqueallv]

يارب وجهني طريق الصالحين
بدايته ونهايته ، سترة نجاه

رفعت نفسي عن دروب التافهين
اللي ولا دربٍ يشد الانتباه

اما حياة الطيبين الغانمين
ولا حياةٍ ماوراها من غناه

اللي حسبته من قروم الطيبين
الوقت ماقصر وبين لي خفاه

يزين طبع الناس ، ولا مايزين
كلٍ على حسب العمل يلقى جزاه

[عتّاب @i_n230]

انا اشهد انّا صبرنا مثل صبر الجمال
و انا اشهد انّا وقفنا في نهار الوقوف

لكن طال الوقوف و باقي الوضع طال
و سلومنا ما تشجعنا نمد الكفوف

وجيهنا ما تدرق عن وجيه الرجال
ولا نذكر يمرنا اللازم ما كنّا نشوف

-
وجيهنا للجنوب و نلتفت للشمال
مثل المدور ليا كثرت عليه الوصوف

الزند ونيان و الافكار فيها انشغال
و الجهد مبذول للواجب عساه مخلوف

[راشـد @_RH89_]

يا عيوني ساعديني على ذرف الدموع
القلوب اللي تكابر يْموت أحساسها

دمعةً وحده تهايق على حد الطلوع
لا تْعود فالمحاني ويكبر راسها

ودي أذرفها ولو تنمزع حدب الضلوع
واتحرر من وجعها ومن وسواسها

آه من زلة سنافي ومن طعنة فروع
وآه من دنياً شربنا الوجع من كاسها

والله أن كبدي من المر و الجاير تزوع
أغصبها للمجامل ويقوى باسها

إن تداعوا للمهونه فـ انا عنها جزوع
وإن تداعوا للكرامه فـ انا نبراسها

النفوس تبين بين التسامي والخضوع
حط ميزان المواقف وتعرف ساسها

-

[نـفـود @_Nfoodd_]

التغابي فن و إن دل .. دل إنـك ذهيـن
عش غبي والناس تلعب على مكشوفها

النفوس جنود من جند رب العالميـن
نفسٍ نـوقـف عليهـا و نفس نطـوفها

المصافـح بـالأحاسيس ماهو باليديـن
البشر تستخـدم إحساسها .. بكفوفها

ارضْ نفسك أولـى مـن الناس أجمعين
إن تبعت الناس بتموت وانت تحوفها !

[عنفوان رجل @Kln333]

شالعٍ قلبي غزالٍ وسط نجد مرفّه
مترفٍ يلعب بعرشه في وطن محبوبه

الحياء والوصف الأعظم والستر والعفّه
و الجمال الباذخ النادر و حسن أسلوبه

قوةٍ كنها جيوشٍ فالوغا مصطفّه
من طلايعها الجحافل تنثني مغلوبه

جاعله ربـي بكفّه و البنات بكفّه
ومايضاهي حسنه الطاغي ولا رعبوبه

[راشـد @_RH89_]

يا وجودي كل ما هب نسناس الشمال
وجد من حده زمانه على الي ما يبيه

ويا وجودي كل ما اضحيت ثم مال الظلال
لاغفت عيني ولا ذقت شي مشتهيه

وجد من قفى وهو في رجا كلمه تعال
والتفت من عقب ما اقفى ولا احد لد فيه

وياعذابي لا دنا الليل من روس الجبال
وانقضى يوم من العمر ماعاد ارتجيه

وانتي ابعد من سمى الحلم ووصالك محال
يابعد من هل دمعي ضحى الفرقى عليه

ياغناتي لا تحسبين دمعي يوم سال
ضعف ولا خوف ولا كذا ولا كذيه

والله اني من رجال يضدون الرجال
لكن الحظ الردي ساق دمعي كلبيه

والله اني كل مادار حوليك الجدال
قمت كن الموت يشر على قبري بيديه

والله ان قد لي وانا اصد لا جالك مجال
صدت الي لا تضايق تذكر قبر اخيه

ومن سألني قلت مدري واذا عاد السؤال
قلت له تكفى سؤالك ترى ماهو وجيه

وش تبيني اقول عن من ترى ذبحي حلال
والخطاء منها علي صرت احبه واهتويه

عذرها لو ماتعذر مثل واضرب مثال
واحد ما يعرف الحر الاشقر يشتويه

وان رجعنا للتواصيف لله الكمال
لانتهى ليل المزايين جاتك تبتديه

كنها غفل مع البدو طاويها الحيال
ما يميز وصفها الا نبيه من نبيه

واهني الي وصلها وذاق من الزلال
رشفه مع غفله الناس من فيها بفيه

وعزتي للي سواتي عشق ما لا يطال
ويوم طاله ضيع الحلم بين امه وابيه

ياول احلام الطفوله على حد الخيال
الرجا بالي حمى البيت من حمله بريه

حال دونك سيف عنتر وتاسع حول حال
باثر حول حال دونك وانا ادعي هيه هيه

هيه يالي غرك الحسن واطغاك الجمال
والله ان اموت ما شفت لاوصافك شبيه

لو يسام الحسن والتيه بجنيه وريال
ما بقى في سوق غيرك ريال ولا جنيه

كيف اهدك للمقادير وانتي راس مال
راس مال ومال والمال ما يعطى السفيه

حافظك حفظي لعيني ورمشي لك جلال
وانتي تشحين بالماء وانا شفي مويه

شايف ظلمك وساكت وطال الليل طال
لاتركتي طعن قلبي وانا ما قلت ليه

لو بقى للهيل صبر على فوح الدلال
ما بقى للقلب صبر على شي يجيه

كنت احسب ان الغلا زال واثره لا يزال
في الحشى ما كنه الا دخيل في الوجيه

ساقني حبك على الموت وسنيني هزال
والظروف اقسى من الظلم للعرض النزيه

وانتي تسوقين عقلي على حد الهبال
تحسبين ان من بغى شي يقدر يشتريه

ولا انا ياوجد حالي وجود ما يقال
وجد من ضحى بغاليه لرضى والديه

ويا وجودي ياول العمر قبل البس عقال
وجد من باع اخر العمر في رغبه ذويه

ويا وجودي كل ماهب صوتك من شمال
وجد من حده زمانه على الي ما يبيه

[NA @iih6w]

لو يقدر الورد يسرق قلب من شمّه
ماتقدر الشمس تسرق بارد ظلالي

اخترت درب الظما عن صافي الجمّه
والفت صبري عليه وَ طال ترحالي

ماكل من يسري بيسري على همّه
يا ما سريت الظلام وخاطري سالي

والبارحه النفس مخنوقه ومنغمّه
و سرّاني الحزن للي مر في بالي

اشوف صورته بالجوال واضمّه
وَ اودعه وَ امسح اللي له بجوالي

سمّ الجفا مرجله ولا ردا سمّه
انا عزمت وجزمت وشفته اشوا لي

اليا متى وَ المشاعر فيه مهتمّه
سويت كل شي لكن ويش سوّا لي

ما عاد اعرف اتكلم مع بني عمّه
لا سولفوا كن صورة وجهه قبالي

اصدّ والناس حول الناس ملتمّه
وَ اتشطّر بعيد عنهم واجلس لحالي

كنّي يتيم فقد من ليلتين امّه
ولا كريم استحى من جيبه الخالي

اغص في عبرتي واضيّع اليمّه
و اسج رجلي من الضيقه على فالي

ما للخيانه عذر في ذمتي ذمّه
العذر ما ينقبل في خيانة الغالي

من اول اشوف السّامي على القمّه
و الجاي من عمري و مستقبل آمالي

و الحين ما عاد يفرق مدحه و ذمّه
مثل ابتسامة رضى في وجيه عذالي

يهمّني الحب ب الحب ما همّه
ياليت ماني كذا وخصالي اخصالي

ابعدت شرهة دموعي عن طرف كمّه
وعلقتها في طرف جفني من هبالي

اواسي الجرح و اداريه والمّه
و اقول ل الدمع لاتبكي على حالي

لو يستحي حزني البارح على دمّه
ما كان جابه على غفله على بالي

[رشيدي Ք @alrashiidi9]

شارد الذهن حتى في صلاة الجماعه
قصر العبد وأعذار المقصر هزيله

ربي اغفر خطا نفسي وزدني مناعه
ابن امتك وولد عبدك ونفسي عليله

نفسٍ أودعتها اللي ما تحفظ الوداعه
راحت أخف من ريشه وجتني ثقيله

كم لي ألومها وتقول سمعاً وطاعة
وتنصفق كل مابار الخليل بخليله

كن روحي هوت في بير من دون قاعه
ودي أطيح لكن طيحتي مستحيله

حارت الرجل في دربٍ فقدت اتساعه
لا رجوعي نبيل ولا وصولي فضيله

تابعٍ لي وهم لكن يازين اتباعه
بارقه مقفي عني ولازلت أخيله

سيدة قلبي .. الدنيا مافيها طماعه
عقب وجهٍ صباحات العمر تنتمي له

رجعي لي شغف قلبي معك واندفاعه
واخذي أكثر شعور القلب واخذي قليله

أكبر الضايعين المقتنع في ضياعه
وانتي بعينك النجلاء يضيع الدليله

قالوا اصبر ترى نصر الفتى صبر ساعه
قلت صبري طويل وسالفتنا طويله

ودي أهيم في قفرٍ تعاوى سباعه
عام كامل ولا صبري على الشوق ليله

كيف يصبر من قيود الغلا في ذراعه
وجمرتك في يده والثانيه في شليله

لاشعوري كلام ولا قصيدي بضاعه
ولا كلامي عتب ولامعي فيك حيله

ان ذبحتي سليل أشهر بيوت الشجاعه
قولي انك ذبحتيه بسمار وجديله

لا تقولين مات من الجفا والقطاعه
وتنحسب موتته منك على أهون وسيله

انثري دمع لو مره بليلة وداعه
ويكفي إن النهايات الجميله جميله

لا تهبين له ياللي طويتي شراعه
اذكري ماضي أشواقه وشوفي حصيله

أولوياته اللي عن يقين وقناعه
كانت الدين وانتي والوطن والقبيله

[راشـد @_RH89_]

ذي مرابي عنود الصيد بنت القريحه
جعلها للسحاب اللي يسيل أوديتها

ودي آسّفه نصايح مدّعين النصيحه
وأسمع اللي تغنّي للنسيم أغنيتها

كم لي أجر ساقي بين قومه وطيحه
كل ماهبّ ذعذاع الهوى من جهتها

بشّروا من تحرّا طيحتي في مطيحه
ولبّسوا من تحرّا رجعتي بنجرتها

جادلٍ ماتقول الكلمة الّا فصيحه
كن مافي لغات العالم الّا لغتها

يوم تمشي على قاعٍ وروده شحيحه
ينبت الورد فوق الخطوة اللي مشتها

مالي الا الجروح المالحه ، يا مليحه
ولا لك الا البيوت اللي ماتظلم بختها

مات قلب الحسود المغرض الله يبيحه
وعاش خير العيون الناعسة وبركتها

ألعبي في معاليق القلوب الجريحه
وأبشري بالقصيد اللي يجيب آخرتها

وعيشي بسدّ وجهي راضيه مستريحه
لين توصل معاك القصة لخاتمتها

وأتركينا نغنّي فوق الأرض الفسيحه
بكره الموت يأخذنا وندفن تحتها

-

[سـين ➰ @7bb_q8]

-

العمر مره و الدقايق تسرق أطراف السنين
يا حظ منهو بالجناب الزين ، غيره يَذكره

أما توالف صاحبك .. ولفه تغيض العاذلين
ولا على مفرق طرق ، ترمي رداه و تهجره

أعادي بنادم و اضرّه ليش؟ واحنا مُسلمين
ان ما اجتمعنا بالحياه .. بنجتمع بـ المقبره

لا زال قلبي فيه من طيبة ، طبوع الاولين
و لا زالت عيوني لما شاله ضميري منظره

فيني غموض تحيّر ألغازه ، عيون الناظرين
مع اني اوضح من رداة الخاطر اللي اكسره

أحب لون الليل و أحب القصايد والحنين
و على كثر سوالف عيوني … أعاف الثرثره

مالي و مال الأدمي حيله بمكتوب الجبين
كل و له ما الله تعالى - بالمقادير إذخره

يارب اجعلني بصف الحامدين الشاكرين
على الرضى و العفو والرحمه و امان المغفره

عساني لا طريت فـ بال احد يطريني بـ هالحاجتين
" ضحكه توّسع خاطره ... أو وقفه تشدّ ظهره "

[قاف @Qaf_96]

"انت من هبت هبوبك وغنا العندليب
وإستقرن في حناياي وامسن واصبحن

لا تخلي لي من الطيش قدام المشيب
كل ما شفت المشاعر على العقل إنتحن

قبل تغويك الملامه ويذهبك النصيب
دوب في راسي من الحب حب ما إنطحن"

[فلآح @o200_f]

سولفي لي يا غلاي وبددي وحشة سهادي
ودي اقطف من شفايف حضرتك جمله مفيده

يا غزالٍ في عيونه للقصيد ألفين وادي
كل نظره من عيونك تبتدي فيها قصيده

يا ضيا وجهٍ كسى نوره على خايع بلادي
شوفتك ميلاد عمري واللقى فرصه سعيده

كل جرحٍ في غيابك كان يسكن في فؤادي
راح من لمسة كفوفك يوم ذوبتي جليده

قربي لين الحنين اللي كبر يلقى مرادي
يا غنيمة خافقي يا نبض قلبي يا رصيده

أمتمادي في دلالك والغلا للحين بادي
كل ما زدت التغلي زدت أنا حب وعقيده (:

[فراج بن عبيد الغصن @fraj2253]

صدري ارويه من عقب الضماء يالنصوب
كل نفسً تطالب حسب مشهاتها

حالتي حاله ونار الليالي شبوب
الليالي محد سوابي اسواتها

كل ما ذعذع الغربي بوقت الغروب
ترجع الذاكرة تفتح ملفاتها

كيف بلقى من الواقع وسيلة هروب
واقضي العمر فـ أحلآمي ولذاتها

انا مشكلتي آني تايهً ف الدروب
ومن بداياتها عارف نهاياتها

ومشكلة قلبي الله يصلحه ما يتوب
من هوى العيطموس ومن حركاتها

بين دق القوم وبين دق الكعوب
روحي تفضل احكاها على سكاتها

عرضت كل غالي قبلها للهبوب
واعرضتلي بـ مبسمها ووجناتها

اييهه يا قيض نجد ويا براد الجنوب
جل ربً قسم من بينكم ذاتها

مابعد خفت من وجهه الزمان الشحوب
كثر مانيب خايف حد نظراتها

فراج بن عبيد

[᷂معّدي @iin72__]

راسي اللي ينطح الصعب ويفض الجموع
ليّنته اللي زهى الكف رسم انقوشها

غروةٍ تستيسر القلب وتخطف السموع
كل ما لدّت كلتني سيوف رموشها

إن حكت يصغي لها القلب وأسماعي تجوع
وإن مشت كن الضلوع الرهاف تحوشها

ما تسولف غير في أهل القنا وأهل الدروع
وفي مواقف طيب أهلها وندر بوشها

-محسن بن مترك

[رشيدي Ք @alrashiidi9]

اتركوني عن ضجيج المجتمع لحالي
لي سنه ما ذقت طعم الراحه النفسيه

اطرد الفرحه وادور راحتي من تالي
كني اطرد لي على مد النظر وسميه

منعزل في دايرة حزني وضيقة بالي
علموني كيف اعيش احلامي الورديه

السعاده ما تعبر عن جميع احوالي
إن تبسمت ابتسم من باب الانسانيه

شاعرٍ لانيب لاداله ولاني سالي
اطلب اللّٰه بالهدايه وبصلاح النيه

متمسك بالشعر وبغترتي وعقالي
ماني اللى حاذف الغتره مع الطاقيه

إن كتبت من القصيد وزان لي موالي
ما غبطت الطير فالروحه ولا فالجيه

يا طموحي فالحياه و يا بصيص امالي
ان ماحققتك كذااا بالقوووه الجبريه

ماني مخليك ف فالك وانا ف فالي
العرب قد قالو ايام التعب منسيه

ماخلقت اطرد ورا مقفي لو انه غااالي
السنين تدور وايااام العمر مقفيه

[راشـد @_RH89_]

حبيب الفواد إللي جعل فـ الفواد فتوق
من المستحيل جروحه .. تخيّب ظنونه

ماهو لازم يرّجع علي ، قلبي المسروق
بـ آعيش الغرام الموجع .. إللي يقولونه

طعون الزمان علاجها ، طعنة الغرنوق
مثل ما النحل نستخلص الطب بطعونه

أدين لـ جمال أوصافه و شخصه المرموق
بعدهم عرفت إن فرصة العمر : مضمونه

سيادة سموه تشمل العقل و المعلوق
ماغير الكرامه بس .. ماهي بـ مرهونه

من خيانة المحبوب .. و خيانة المنطوق
على ذا الدلع .. و الزين من يقدر يخونه

ما أسولف معاه إلا و أنا تحت ضغط الشوق
ترا الكلمه إللي من ورا الشوق . . موزونه

كثر ماني أسترسل معه خارج الصندوق
أعرف الكلام إللي بـ صدره .. من عيونه

-

[نايف السراهيد @al_shamk111]

يوم بانت .. غيمة الشعر مع عرض الغيوم
اعتذرت من المشاغل .. ودرجت قدمي

عن ضجيج الدار .. ودي بمطلاع الرجوم
لين جاشي .. يبرد .. شوي ولا يحتمي

الحياه .. ظروفها ما تعرف الا الهجوم
كنها .. تبغى تساوي وجودي وعدمي !

مير .. انا لا زال راسي .. عن الهزله يشوم
مثل يوم إني فرقت الظلام .. بـ معصمي

شاعرٍ مثلي يسده من .. ( الايام يوم )
يذكرونه يوم صمخ .. القصيد الملحمي

كل فرصه .. تبهج القلب وتسد اللزوم
دونها جهزت رمحي .. وعرضت سهمي

ما انتظرت اللي تجيني بعد حب الخشوم
ما ازين من اللي تبيّن .. ليا حان الرمي

الكرامه ترفع الرجل .. فـ عيون العموم
ما حفظها غير قرمٍ .. جسور وصيرمي

كل ماضاقت به الارض .. واضمته الهموم
يرتوي .. من ( عزة النفس ) لا منه ضمي

الحياء والصدق .. في وجهه الطيب يدوم
ما تقطع .. مثل وبل السحاب الموسمي

ان فرح وازن شعوره على حسب السلوم
وإن زعل ماهو .. بـ خبلٍ يطيش وينعمي

مثل ماادحم كل ميقاف بالجنب الدحوم
القصيد .. اثمنه قبل يطلع من فمي

جعلني ما اكون ظالم .. ولا اعاون ظلوم
لو بكلمه من لساني .. ونقطه بـ قلمي

[منيره المطيري @Mutairiwe]

علّم اللي مايميّز في صديقه من عدوّه
قبل توجِعْه الليال اللي تصحي كل غافي

الزمن جرحه يخلّي واعي الفكر يْتأوّه
لو معاليقه نظاف وقلبه مْع الوقت صافي

والبحر مهما تظاهر في صفاوته وهدوّه
لا لْتطم موجه يدبّ الخوف بِصدور المرافي

والجبل مهما تِعَصْف الريح به يزداد قوّه
لو شكى صدره منِ طْعون العواصف والسّوافي