طقوس بعد منتصف الليل قهوة وحلا وعبدالله بن زويبن/
تراه مايجزع لك الا من أجزعك
قال المثل من لايزعلك مارضاك
واللي معك في كل شيٍ يشجعك
تراه مبدولٍ على الدبك دباك
من باب المواساة أحيان تعري أحزانك قدام شخص مهموم بمعنى شف اللي قدامك كـ أعتراف ان الحزن يهد الحيل لكن ما يموت الأدمي
قال عبدالله بن شايق رحمة الله
ودّي أشرح لك ظروفي وأتكلم
بس أخاف تشيّبك قصة حياتي
من لا يشوفك شي شوفه ولا شي
تراه ماهو من ذهب وانت من طين
مخلوق مثلك وابن ادم وهو حي
يعز نفسه عن ليام المقفين
لو انه اعلى منك بالمنصب شوي
كرامة الانسان تسوى ملايين
—بخيت السناني
عزي لمن حده زمانه على اقصاه
يجدى وينخى مير محدٍ نظر فيه
وقت الرخا ياكثر من قال نفداه
بالمال ولا الجاه بالروح نفديه
وقت الشدايد كلٍ يقول فرقاه
مالي وماله ثم روح مخليه
خلوه في فقرٍ وهمٍ وماساه
اطيبهم أطيبهم بهرجه يهديه
أيْس وقال العبد لا بد مثواه
في وسط قبرٍ بـ ابيض الخام نطويه
ماضيَّعني وذوَّقني الموت قبل أموت
الا عقلي المتحرّص وقلبي الطايش
أشوف الحياة جْنازةٍ في بطن تابوت
لكنّي رغم كل الصعوبات "متعايش"
ترا ما أصعب من الموت واللي خلاف الموت
إلّا الفترة اللي "لا أنت ميّت ولا عايش"
لو ان هموم صدري مساجين
لا اشرّع ضلوعي على مصرعيها
ما مرّ بي .. لو مرّ بـ المستريحين
(راحت تشيل عقولها .. في يديها )
الوقت ساومني على راحتي .. لين
قررت اثمّن "راحتي" واشتريها