Top Tweets for #PPPForPakistan

آرٹیکل 243 سے اٹھارویں ترمیم __ اور پیپلز پارٹی ( تحریر : احمد گھمن ) پاکستان کی سیاسی فضا میں ایک بار پھر آئینی ترمیمات اور وفاقی و صوبائی اختیارات کی بحث نے گرما گرمی پیدا کر دی ہے۔ ایسے میں پیپلز پارٹی نے اپنا مؤقف نہایت واضح انداز میں پیش کر کے یہ ثابت کر دیا ہے کہ وہ نہ صرف آئین کی محافظ جماعت ہے بلکہ وفاقِ پاکستان کی علامت بھی ہے۔ ذرائع کے مطابق پیپلز پارٹی نے آرٹیکل 243 میں مجوزہ ترمیم کی حمایت کا فیصلہ کیا ہے، تاہم ساتھ ہی یہ واضح کیا ہے کہ آئینی عدالتوں کے قیام پر مزید مشاورت ضروری ہے۔ پارٹی کا کہنا ہے کہ یہ شق چارٹر آف ڈیموکریسی (سی او ڈی) کا بھی حصہ رہی ہے، اس لیے اب وقت ہے کہ سیاسی جماعتیں بیٹھ کر نہ صرف آئینی عدالتوں بلکہ سی او ڈی کے باقی نکات پر بھی اتفاقِ رائے پیدا کریں۔ پیپلز پارٹی نے ایک اہم مطالبہ بھی رکھا ہے کہ ججز کے تبادلے یا تعیناتی کے فیصلوں میں متعلقہ عدالتوں کے چیف جسٹسز کو ووٹنگ ممبر بنایا جائے تاکہ عدلیہ کے اندر شفافیت اور ادارہ جاتی توازن قائم رہے۔ یہ مؤقف پیپلز پارٹی کے اس دیرینہ بیانیے کا تسلسل ہے کہ طاقت کسی ایک ہاتھ میں نہیں بلکہ ادارہ جاتی مشاورت میں ہونی چاہیے۔ چیئرمین بلاول بھٹو زرداری نے دوٹوک الفاظ میں کہا ہے کہ "این ایف سی ایوارڈ کو آئین میں تحفظ حاصل ہے صوبوں کا حصہ بڑھ تو سکتا ہے، کم نہیں۔ یہ جملہ دراصل ایک پیغام ہے اُن تمام قوتوں کیلئے جو صوبائی مالیاتی خودمختاری پر انگلیاں اٹھاتی ہیں۔ پیپلز پارٹی نے واضح کر دیا ہے کہ جب تک وہ پارلیمان میں ہے، این ایف سی ایوارڈ کا دفاع اس کا آئینی فریضہ رہے گا۔ یہ بیانیہ سندھ، بلوچستان، اور خیبر پختونخوا کے ان حلقوں میں گونج رہا ہے جہاں صوبائی حقوق کو وفاقی اختیارات کے توازن کے طور پر دیکھا جاتا ہے۔ یہی وہ مؤقف ہے جس نے پیپلز پارٹی کو ہمیشہ ایک فیڈرل ویژن کی حامل جماعت کے طور پر نمایاں رکھا۔ پیپلز پارٹی کا کہنا ہے کہ جو لوگ اٹھارویں ترمیم پر انگلیاں اٹھاتے ہیں، وہ ذرا قومی ادارہ برائے امراض اور امراضِ قلب کے فرق کو دیکھ لیں! یہ طنز نہیں بلکہ ایک حقیقت ہے صوبائی سطح پر صحت، تعلیم اور فلاحی اداروں میں جو بہتری آئی، وہ اٹھارویں ترمیم کی بدولت ہے۔ پارٹی قیادت کے مطابق یہ تاثر سراسر غلط ہے کہ اٹھارویں ترمیم یا این ایف سی نے وفاق کو نقصان پہنچایا۔ اصل ناکامی وفاقی اداروں، خصوصاً ایف بی آر کی ہے جو اپنی نااہلی کو چھپانے کیلئے صوبوں کے حقوق پر وار کر رہے ہیں۔ بلاول بھٹو زرداری نے حالیہ بیان میں یہ بھی کہا کہ اگر ایف بی آر اپنی کارکردگی بہتر نہیں کر سکتا تو صوبوں کو موردِ الزام ٹھہرانا زیادتی ہے۔ یہ پیغام نہ صرف بیوروکریسی کیلئے تنبیہ ہے بلکہ ایک واضح سیاسی اعلان بھی کہ اٹھارویں ترمیم پیپلز پارٹی کی ریڈ لائن ہے اس پر کوئی سمجھوتہ ممکن نہیں۔ سیاسی تجزیہ نگاروں کے مطابق پیپلز پارٹی نے حالیہ دنوں میں ایک مرتبہ پھر وفاقی وحدت، آئینی بالادستی، اور صوبائی خودمختاری کو اپنی سیاست کا محور بنایا ہے۔ جہاں دیگر جماعتیں وقتی بیانیوں میں الجھی ہوئی ہیں، وہاں بلاول بھٹو زرداری نے دوبارہ وہی چارٹر آف ڈیموکریسی والا راستہ اپنانے کا اشارہ دیا ہے۔ یہ مؤقف ایک طرف جمہوری اداروں کو مضبوط بنانے کی بات کرتا ہے، تو دوسری طرف غیر سیاسی مداخلت کے خاتمے کی راہ بھی ہموار کرتا ہے۔ مختصر یہ کہ پیپلز پارٹی نے اپنی سیاست کو ایک بار پھر جمہوری تسلسل، صوبائی حقوق، اور آئینی اصلاحات کے گرد منظم کرنا شروع کر دیا ہے اور یہی وہ راستہ ہے جو مستقبل کی سیاسی بساط پر بلاول بھٹو کو مرکزی کردار کے طور پر ابھار سکتا ہے۔