Top Tweets for #releaseBYCleaders

ہم نے جب بھی پُرامن طریقے سے جدوجہد کرنے کی کوشش کی، ہماری آوازوں اور سیاسی رہنماؤں کو دبانے کی کوشش کی گئی۔ ہم نے جب بھی انصاف کے حصول کے لیے عدالتوں کا دروازہ کھٹکھٹایا، ہمیں ناانصافی اور جبر کے سوا کچھ نہیں ملا۔ ہم نے جب بھی اپنی آواز دنیا تک پہنچانے کی کوشش کی، ہماری آوازوں کو خاموش کرنے کی کوشش کی گئی۔ اب اگر ہمارے ساتھ کوئی کھڑا ہے تو وہ بلوچ قوم ہے، جس کے حوصلے، ہمت اور دلیری یہ ثابت کرتی ہے کہ ریاست ہم پر ظلم کے پہاڑ کیوں نہ توڑ دے، ہمیں ہر حال میں اپنے حقوق کے لیے جدوجہد جاری رکھنی ہوگی۔ آج یہ ظلم اور جبر کی داستان صرف ایک فرد یا خاندان تک محدود نہیں بلکہ آج ہر بلوچ اسی ناانصافی اور جبر کے سائے تلے زندگی گزار رہا ہے۔ اظہارِ رائے کی آزادی کا حق، پُرامن طریقے سے زندگی گزارنے کا حق، حتیٰ کہ یہاں جینے اور سانس لینے کا حق بھی ہم سے چھینا جا رہا ہے۔ اب اس نظام میں ایک بنیادی سوال پیدا ہوتا ہے کہ بلوچ قوم کرے تو کیا کرے؟ پُرامن سیاست، منصفانہ ٹرائل اور پُرامن احتجاج کا حق نہ صرف عالمی اصولوں کا حصہ ہے بلکہ ریاست کے اپنے قوانین میں بھی تسلیم شدہ ہے۔ مگر ہم نے جب بھی پُرامن طریقے سے اپنے حقوق کے لیے جدوجہد اور مزاحمت کا راستہ اختیار کیا، ہمیں تشدد، لاٹھی چارج اور گرفتاریوں کا سامنا کرنا پڑا۔ میں ایک بات واضح کرنا چاہتی ہوں کہ ڈاکٹر ماہ رنگ بلوچ اور شاہ جی صبغت اللہ کو عمر قید کی سزا سنانا، وہ بھی بغیر کسی واضح اور ٹھوس ثبوت و شواہد کے، بلوچ قوم کے لیے ایک واضح پیغام ہے کہ ریاستی عدالتی نظام میں بلوچ عوام کے لیے انصاف کی کوئی گُنجائش نہیں ہے۔ مگر ہم یہ مقدمہ بلوچ عوام کے سامنے رکھتے ہیں کہ اب انصاف کی یہ جنگ بلوچ عوام اور قوم کو لڑنی ہوگی۔ ہمیں متحد ہو کر اس جبر کے خلاف پُرامن طریقے سے مزاحمت جاری رکھنی ہوگی۔ ہمیں اپنی پُرامن جدوجہد کو مضبوط کرنا ہوگا تاکہ راولپنڈی اور اسلام آباد میں بیٹھے حکمرانوں کو معلوم ہو کہ ظلم، تشدد اور جبر کے باوجود ہم متحد ہو کر اپنے حقوق کے لیے کھڑے ہیں۔ کل جو سب کی آواز تھے، کل جو ہر متاثرہ خاندان کے شانہ بشانہ کھڑے رہے، کل جنہوں نے دن رات ایک کر کے بلوچ عوام کے لیے جدوجہد کی، آج وہ ہماری جدوجہد اور ہماری آوازوں کے منتظر ہیں۔ کل جس نے کہا تھا کہ: “میں رہوں یا نہ رہوں، یہ تحریک آپ کی امانت ہے۔” تو آئیں، ہم انہیں جیل میں یہ احساس دلائیں کہ آپ کی امانت ہم نے اپنے سینوں سے لگا کر محفوظ رکھی ہوئی ہے اور آخری دم تک اس تحریک کو انصاف، آزادی اور بنیادی انسانی حقوق کے لیے پُرامن جدوجہد کے ذریعے جاری رکھیں گے۔ بلوچ عوام کو یہ یاد رکھنا چاہیے کہ مزاحمت ہی وہ راستہ ہے جس کے ذریعے ہم اپنی بنیادی انسانی حقوق کی جدوجہد جاری رکھ سکتے ہیں۔ ریاست کو یہ جاننا چاہیے کہ آپ جتنا زیادہ ہم پر جبر کریں گے، ہم اتنا ہی مضبوط ہو کر ابھریں گے۔ آپ جتنا ہمیں دبانے کی کوشش کریں گے، ہم اتنی ہی ثابت قدمی کے ساتھ پُرامن مزاحمت کریں گے۔ آپ جتنے لوگوں کو قید کریں گے، اتنے ہی لوگ اپنے حقوق کے لیے آگے آتے رہیں گے، یہاں تک کہ ظلم کی طاقت ہمارے حوصلوں کے سامنے کمزور پڑ جائے گی۔ #ReleaseBYCLeaders