يرجهن الثاير من الملح ماهود عنادي
ولا تلحقت السنين اللي مضت مني حسوفه
غير وجهٍ عاد من بعد الصخب والطيش هادي
راود عيون الطواري واستلبيت النكوفه
كم مضالي والسفر مسعاي والغربه بلادي
وكل دربٍ فيه لي جره موردني حتوفه
يا مرابي سالف الأيام تسقيك الغوادي
من نفيض الوسم همالٍ ترزّم لك قنوفه
يا رجاء رد الجميل من الزمن وين انت غادي
كفي المجرود في اطراف الهوا ضاع معروفه
ما عذلت النفس يوم اغتر في بعض المبادي
الضمير الحي نوب يمره الغي ويطوفه
ولا على الباقي خلاف ليا دفن جمري رمادي
في ليال البرد يغني عن حرير السلك صوفه
وانت يا مبلغ طموحاتي وشفي واجتهادي
والله اني عاذر احساسك على قل الكلوفه
باقيٍ لي فيك ميلاف ومواعيد وعيادي
وناصية مهْرٍ على أطلالك يبي يبطي وقوفه
وغصن قمريٍ يجاذب وْرقها في البال حادي
و طاريٍ مرّار لا ضاق برحَابْك مدّ شوفه
في رجا اللي تلتمس من جيتي عذر ابتعادي
جعل شيٍ ردني عنك مساعيه مخلوفه
مد كفك ، سل من غمد السهر بيض الهنادي
كم لوجه الصفح وردون الحيا تطوي كفوفه
والله اني شفتك بعين الرضا ولا انت عادي
مكنتك من السنين الماضيه لحظه مروفه
ورحت غالي والرضا ريض وعد وانا مفادي
والمفادي ما يمل محايل النفس العيوفه
يا تقاسيم المعازف على بحر الخليل
عن هوا غيرك من الغيد نفسي عازفه
طارقٍ بابك شفاوي ولايذ بك دخيل
آزف صبري وبيض الليالي آزفه
سافري بي عمر واكثر ولميني جديل
موقن ان الحظ ساعة صبر ومجازفه
واكتبني بين الاحداق للعاشق دليل
واعزفيني صوت نايٍ تجلّى عازفه
المشاعر كل ما هب نسانسك تميل
عارضه ومسوعبه في حماك ورازفه
وان ضمدتي جرح الايام وآثرتي الرحيل
من يضمد جرح قلبٍ طبيبه نازفه
على خطاويك يا المقفي ، يحن النديم
حنين عودٍ على ماراح له من سلف
من سجّة الذكريات لـ عاذيات النسيم
غيبوبةٍ ، ما تصدقها لو انْك اتحلف
من ذاق طعم الليال الخاليه من قديم
لقيت في رف عالم ذكرياته — ملف
أطرق ما كن في الدنيا نعيم إلا عذابه
هو معيي يسمح من الكبرياء وأنا معيي
جعل حبٍ منزله بين الحنايا ينحكا به
في عمار ولا يروح ضحيه لغيّه وغيي
— علي ال صبيـح
فقدك الندىّ واول طريقي وصّدر الدار
ياوجهٍ؛ لو تْملّ الصور منه . . ما أملّه
معك كنّي أخذ في فضى ليلتي مشوار
واجاذبك صبحٍ؛ يفهَق العمر عن حِلّه
عكفّك الجفاف إن مرت الناس والزوار
شجر واديٍ كم مرّه الغيم ما بلّه؟
تساقط يباس وشرهته ماعليها غبار
اداري دقاقه، واتطّلع على جلّه
إليا رمى الليل قرص الشمس في كوته
وأخفى معالم دروب اليابسه عنا
وعلّق على سترته دره وياقوته
اللي على حروة الوجهه يدلنا
سبح خيال الهواوي في ملكوته
وسج القدم كل ضايق صدر ومعنا
نسري مع الليل مسرى من طلب قوته
وإن بانت الشمس نرجع مثل ماكنا
مشاعري من ثلاث سنين مكبوته
فاقد حبيب الذهب والكحل والحنا
غروٍ خطاويه فوق الأرض منحوته
مع دربه تشيّد الآثار وتبنّا
تنصت له الأرض لامنه رفع صوته
ويميل غصن الهوى طربان لاغنا
حبال صبري بعد فرقاه مفلوته
من شافني يدري إن الوضع فيه إنا
قلبي غدا قنبله ماهي بموقوته
والله لو تثور تاكل واحدٍ منـا