ماغويـت الا بحبك وبلحون القصيد
المتاع الي تمنّيـت والدنيا متااع
فإن ذكرتيني بعد ماتركتيني وحيد
خافي الله وأنسي البعد وآخير انطباع
لاتقولين - حَمّر عِين - قلبه من حديد
الحديد يذوب عند اللي عيونه وساع :/
-مزيد الوسمي
عجزت لا أعين مع الناس إندماج
حتى و أنا لا شغله ؟.. ولا مشغله
يلج في راسي .. مثل" لجة حراج "
الضاهر اني واصل .. آخر مرحله
خلوني أعيّن من ( الواقع ) خراج
عشان آخلّي الشعر .. و آخلّي هله
عانيت واجد !.. من تقلاب المزاج
و المشكله : مانيب أعرف المشكله
و انتي ! اللي كلك عذاب و عذوبه
ما استرحتي لين قلبي مشيتي به
ادري انك فاتنه / غرشوب / رعبوبه
و ماتدرين اني فوق اللي هقيتي به؟
فعلي سبّاق لكلامي لو ماحكو به
قلبي ولساني اللي يعدّونك حبيبه"
لا ! الا "مليكه" و لا ! "قصيدةٍ مكتوبة"
على لسان مساعد ولا ابو شيبه .. ( :
قبل سنه بـ الضبط في مثل ذا اليوم
ذكرى حزينه في حياة المفارق
من فارق اللي مثلها فارق الـنـوم
غيداً حلاها عن حلا الغيد فارق
من دونها حالت تقاليد و سلوم
والعزوه اللي ياسمون المطارق
جدانها اللي تضرب القوم بـ القوم
يوم البيارق في نحور البيارق ..
..
تدور في راسي " قصيده عظيمه "
مواعدك فيها على غيبت الشمس
يا اللي على شانك قطعت الخريمه
لو لا الغلا ماجيت متشفق و حمس
مانيب جايٍ لك على ( شداد ريمه )
جايك على اللي لا اشتغل يشتغل لمس
انا ؟.. ليا هاب الضعيف " صتيمه "
عندي فعل ماعندي مراوغ و رمس
يا فاتنه !.. عندي كرامه و شيمه
تمنعني اخلي السوالف معك همس
اللي يقول الحب " دقه قديمه "
ما شافني و الحب ماجيته الا أمس
ترى اللي خلا محجري : وبل غيمه
هو نفسه الي يبهج الخاطر العمس
ترقبيني !.. لين اجي ( يا نديمه )
على الوعد يا خمس ولا قبل خمس
طاري الشوق لا طال الفراق يتجدد
يا عشيرٍ ما جاد الحظ بك يوم جابك
كم لي احن لـ الماضي معك و اتصدد
لا تذكرت خيبة هقوتي – في رحابك
ما اقدر اعاتبك بعد الجفى و اتودد
وانت مع سكة المقفين تشعب ركابك
لهفتي يوم اجي مع شارعك و اتردد
كنها موتت احلامي على سور بابك