Top Tweets for #DOUBLING

நேற்று (16.03.2026) இரவு நாடாளுமன்றத்தில் நான் நிகழ்த்திய உரையில், திருச்சி – சென்னை தேசிய நெடுஞ்சாலையில் பொன்மலை ஜி கார்னர் பகுதியில் ரயில்வே நிலத்தில் உயர்மட்ட சுழற் பாலம் (Elevated Rotary) அமைக்க தடையின்மை சான்று (NOC) வழங்கியதற்காக மாண்புமிகு ரயில்வே அமைச்சர் திரு. அஸ்வினி வைஷ்ணவ் அவர்களுக்கும் ரயில்வே அமைச்சகத்திற்கும் நன்றி தெரிவித்தேன். கடந்த 16 ஆண்டுகளாக நிலுவையில் இருந்த பிரச்சினைக்கு இது தீர்வாக அமைந்துள்ளது. பல நூற்றுக்கணக்கான உயிர்களை காவு வாங்கிய பிளாக் ஸ்பாட் (Black Spot) ஆக விளங்கிய ஜி கார்னர் பகுதியில் இந்த உயர்மட்ட சுழற் பாலம் அமைக்கப்படுவதன் மூலம் போக்குவரத்து நெரிசல் குறைந்து, விபத்துகள் தடுக்கப்பட்டு, பொதுமக்களின் உயிர்கள் பாதுகாக்கப்படும். மேலும், திருச்சி – தாம்பரம் சிறப்பு ரயிலை நிரந்தர ரயிலாக மாற்றியதற்கும், திருவெறும்பூர் ரயில் நிலையத்தில் திருச்சி – தாம்பரம் ரயிலும் சோழன் எக்ஸ்பிரஸ் ரயிலும் நிறுத்தம் வழங்கியதற்கும், அதேபோல் புதுக்கோட்டை ரயில் நிலையத்தில் இராமேஸ்வரம் – பனாரஸ் மற்றும் இராமேஸ்வரம் – அயோத்தி ரயில்களுக்கு நிறுத்தம் வழங்கியதற்கும் ரயில்வே அமைச்சகத்திற்கு நன்றி தெரிவித்தேன். அதே நேரத்தில், திருச்சி நாடாளுமன்றத் தொகுதியில் நீண்டகாலமாக நிலுவையில் உள்ள ரயில்வே மேம்பாலங்கள் (ROB) அமைப்பது தொடர்பான கோரிக்கைகளையும் வலியுறுத்தினேன். குறிப்பாக திருச்சி – காரைக்குடி ரயில் பாதையில் கீரனூர் (LC 355), உடையான்பட்டி (LC 332), திருச்சி – திண்டுக்கல் பாதையில் இனாம்குளத்தூர் (LC 265) மற்றும் திருச்சி – சென்னை பாதையில் ஸ்ரீரங்கம் (LC 244) ஆகிய இடங்களில் ரயில்வே மேம்பாலங்களை விரைவாக முன்னெடுக்க வேண்டிய அவசியத்தை எடுத்துரைத்தேன். இத்திட்டங்களில் சில நீண்ட காலமாக விரிவான திட்ட அறிக்கை (DPR) கட்டத்திலேயே நிலுவையில் உள்ளதால், அவற்றை விரைவாக செயல்படுத்த வேண்டும் என்றும் கேட்டுக்கொண்டேன். அதே சமயம், இந்த அவையின் கவனத்திற்கு கொண்டு வர வேண்டிய முக்கியமான விஷயம் ஒன்றையும் எடுத்துரைத்தேன். எனது மாநிலமான தமிழ்நாட்டிற்கு ரயில்வே திட்டங்கள் உரிய அளவில் ஒதுக்கப்படவில்லை என்பதையும், ஒதுக்கப்படும் பல திட்டங்களுக்கு தேவையான அளவில் நிதி வழங்கப்படுவதில்லை என்பதையும் குறிப்பிட்டேன். மேலும், நிதி ஒதுக்கப்பட்ட திட்டங்களுக்குக் கூட தேவையான அனுமதிகள் வழங்குவதில் தாமதம் ஏற்படுத்தப்பட்டதால் அவை நீண்ட காலமாக செயல்படுத்தப்படாமல் உள்ளன என்பதையும் சுட்டிக்காட்டினேன். தற்போதைய நிதியாண்டில் (2025-26) மட்டும், பாதை இரட்டைப்படுத்தும் (Track Doubling) திட்டங்களுக்கு விரிவான திட்ட அறிக்கை (DPR) அனுமதி நிலுவையில் இருப்பதால் தமிழ்நாடு சுமார் ₹300 கோடி நிதி ஒதுக்கீட்டை இழந்துள்ளது என்பதையும் தெரிவித்தேன். குறிப்பாக, காட்பாடி – விழுப்புரம், சேலம் – கரூர் – திண்டுக்கல், ஈரோடு – கரூர் ஆகிய பாதைகளின் பாதை இரட்டைப்படுத்தும் திட்டங்கள் 2019 ஆம் ஆண்டிலேயே அங்கீகரிக்கப்பட்டிருந்தாலும், கடந்த ஏழு ஆண்டுகளாக அவை விரிவான திட்ட அறிக்கை (DPR) நிலையிலேயே நிலுவையில் உள்ளன என்பதையும் வலியுறுத்தினேன். அறிவிக்கப்பட்ட திட்டங்களுக்கு உரிய நிதி ஒதுக்கீடு, திட்டங்களை காலக்கெடுவிற்குள் செயல்படுத்துதல், கூட்டாட்சி தத்துவத்தை மதித்தல் மற்றும் அரசியல் பாரபட்சத்தை தவிர்த்தல் ஆகியவை மிகவும் அவசியமானவை. இவை தான் “ஒன்றுபட்ட இந்தியா – இந்தியத் தாய்” என்ற உயர்ந்த கருத்தை நிலைநிறுத்தும். ரயில்வே திட்டங்களில் தமிழ்நாட்டிற்கு உரிய பங்கை ஒன்றிய அரசு வழங்கிட வேண்டும் மற்றும் தமிழ்நாட்டிற்கு உரிய திட்டங்களும் அதை நிறைவேற்றிட போதிய நிதியையும் ஒன்றிய அரசு வழங்கிட வேண்டும் என்று மக்களவையில் வலியுறுத்தினேன். அன்புடன் துரை வைகோ திருச்சி நாடாளுமன்ற உறுப்பினர் முதன்மைச் செயலாளர் மறுமலர்ச்சி திமுக 17.03.2026 #MDMK #Vaiko #trichymp #DuraiVaiko #ParliamentSpeech