Top Tweets for #ReleseBycleaders

گوادر میں کیا ہوا؟ انسانی ذہن بھی عجیب شے ہے۔ جن یادوں کو سینے سے لگانا چاہو، وہ دھند میں گم ہو جاتی ہیں، اور جنہیں دفنانا چاہو، وہ ہر رات قبر سے نکل کر سامنے آ کھڑی ہوتی ہیں۔ گوادر کی راجی مُچی بھی میری یادوں میں ایسا ہی ایک زخم ہے کہ جس پر وقت کبھی مرہم نہیں رکھ پایا۔ ہم گوادر کے لوگ سمندر کے پالے ہوئے پرزند ہیں۔ ہماری صبحیں جال سمیٹتے اور شامیں انہیں سمندر کے سپرد کرتے گزرتی ہیں۔ اپنی چھوٹی سی کشتی “یکدار” پر بیٹھے ہم نے بھی کبھی ترقی کے خواب دیکھے تھے۔ ہمیں یقین دلایا گیا تھا کہ گوادر بدلے گا، ہماری زندگیاں بدلیں گی، ہمارے بچوں کا مستقبل بدلے گا۔ لیکن بدلنے والی چیز صرف یہ تھی کہ ہمارے اپنے گھر، ہماری زمینیں اور ہمارا سکون ہم سے چھن گیا۔ جب ڈاکٹر ماہ رنگ بلوچ اور بی وائی سی نے احتجاج کا اعلان کیا تو شاید پہلی بار محسوس ہوا کہ خاموشی کو آواز مل گئی ہے۔ ہم ہر شام سمندر میں جال ڈالنے نکلتے ہیں تاکہ اگلی صبح رزق لے کر لوٹیں، مگر اس شام ہم نے سمندر کا رخ نہیں کیا۔ اس روز ہمارا رزق مچھلیاں نہیں، بلکہ اپنے حق کے لیے کھڑا ہونا تھا۔ موبائل نیٹورکس انٹرنیٹ اور دیگر مواصلاتی ذرائع پہلے ہی بند کیے جا چکے تھے۔ اب ایک ہی آواز باقی تھی، مساجد کے لاؤڈ اسپیکروں کی، جن سے لوگوں کو راجی مُچی میں شرکت کی دعوت دی جا رہی تھی۔ 27 جولائی — پہلا حملہ صبح ہم سید ظہور شاہ ہاشمی چوک کی طرف روانہ ہوئے۔ گلی سے نکلے تو یوں محسوس ہوا جیسے پورا گوادر گھروں سے نکل آیا ہو۔ پدی زر کی سڑک انسانوں سے بھری ہوئی تھی۔ بوڑھے، نوجوان، عورتیں، بچے۔۔۔ ہر طرف چہروں کا ایک نہ ختم ہونے والا سلسلہ تھا۔ ایسا لگ رہا تھا کہ سمندر کے کنارے ایک اور سمندر اُتر آیا ہے، مگر اس بار پانی کا نہیں، انسانوں کا کہ جسکی لہروں میں حق کی للقار تھی، امید کی کرنیں تھیں، اپنے ہی سرزمین پر چین سے سانس لینے کے خواب تھے۔ سڑک پر جگہ جگہ گھڑے کھود دیے گئے تھے، رکاوٹیں کھڑی کر دی گئی تھیں، لیکن لوگوں کے قدم نہیں رکے۔ ہر لمحہ ایک نیا قافلہ آ رہا تھا۔ دوپہر کے قریب ہم کسی طرح سید ظہور شاہ ہاشمی چوک پہنچے۔ بی وائی سی کی قیادت ابھی نہیں پہنچی تھی کہ اچانک سامنے فوجی گاڑیاں نمودار ہوئیں۔ چند لمحوں میں ایف سی اور آرمی کی کئی گاڑیاں چوک کے سامنے آ کھڑی ہوئیں۔ لوگ نعرے لگا رہے تھے۔ “تم ماروگے ، ہم نکلیں گے” مظلوم کی یہ للقار، جزبہِ مزاحمت، حاکمِ وقت کو گران گزری، اور عیں تاریخی روایت کے مطابق ظالم اپنے بے بسی کا اظہار تشدد کی صورت میں کرنے لگا۔ پھر اچانک فضا بدل گئی۔ آنسو گیس کے شیل فضا میں بلند ہوئے، اور ان کے فوراً بعد گولیوں کی آوازیں گونجنے لگیں۔ پہلے پہل ہمیں لگا شاید صرف منتشر کرنے کی کوشش کی جا رہی ہے، لیکن اگلے ہی لمحے میرے برابر کھڑا ایک نوجوان لڑکھڑایا اور میرے قدموں میں آ گرا۔ میں چند لمحوں تک ساکت کھڑا اسے دیکھتا رہا۔ اس کے سینے میں دو گولیاں پیوست تھیں۔ خون سڑک پر بہہ رہا تھا۔ چند قدم کے فاصلے پر ایک اور شخص بازو میں گولی لگنے کے بعد تڑپ رہا تھا۔ اس کی ٹوٹی ہوئی سانسوں کی آواز آج بھی میرے کانوں میں زندہ ہے۔ ہر طرف بھگدڑ تھی۔ عورتوں کی چیخیں، بچوں کا رونا، لوگوں کی دوڑتی ہوئی آہٹیں۔۔۔ میں اسے اٹھانا چاہتا تھا، مگر پیچھے سے آتے ہوئے لوگوں کے ہجوم نے مجھے بھی اپنے ساتھ بہا دیا۔ جب شیلنگ کچھ دیر کے لیے رکی تو زخمیوں کو ہسپتال منتقل کیا گیا، لیکن وہاں بھی فوج نے قبضہ کر لیا تھا۔ نہ کسی کو زخمیوں سے ملنے دیا گیا، نہ ان کی حالت کے بارے میں کوئی اطلاع دی گئی۔ مگر خوف کے باوجود لوگ واپس آئے۔ جو منتشر ہوئے تھے، وہ دوبارہ جمع ہو گئے۔ بی وائی سی کے رہنما بھی پہنچ چکے تھے۔ اسٹیج بنایا گیا، کیمپ قائم ہوا، نعرے اُسی جوش و جزبہِ مزاحمت کے کیساتھ بلند ہوئے؛ “گوادر نہ رؤت، تئی واب شُتگ” اور ڈاکٹر ماہ رنگ نے لوگوں سے خطاب شروع کیا۔ انہوں نے کہا: “آج ہم گوادر کے مہمان ہیں” یہ جملہ ختم ہوا ہی تھا کہ لوگ خاموشی سے اپنے گھروں کی طرف چل پڑے۔ کوئی پانی لینے جا رہا تھا، کوئی کھانا، کوئی چٹائیاں اور کوئی برتن۔۔۔ اس لمحے گوادر نے ثابت کیا کہ احتجاج صرف نعروں سے نہیں، بلکہ ایک دوسرے کا سہارا بن کر بھی کیا جاتا ہے۔ رات تقریباً آٹھ بجے اچانک شور بلند ہوا: “پکڑو! پکڑو!” لوگوں نے ایک مشکوک شخص کو پکڑ لیا۔ اس کے قبضے سے واکی ٹاکی، دو موبائل فون اور ایک پستول برآمد ہوا۔ بعد میں اس کی ویڈیو بھی سامنے آئی، جس میں اس نے اپنے بارے میں اعترافات کیے کہ ریاستی انٹلیجنس اداروں نے ڈاکٹر ماہ رنگ کو “قتل” کرنے کی ٹاسک دی ہے۔