Top Tweets for #BAKWATA

VIDEO: Baraza Kuu la Waislamu Tanzania (BAKWATA) kwa kushirikiana na taasisi mbalimbali za Kiislamu nchini, limelaani vikali vitendo vya uhalifu vilivyotokea wakati na baada ya uchaguzi mkuu uliofanyika Oktoba 29, 2025, na kuisihi serikali kufanya uchunguzi wa kina kubaini chanzo na vinara wa machafuko hayo. Katika tamko lililotolewa siku ya Alhamisi, viongozi wa taasisi hizo wamesema tukio hilo limeacha majonzi makubwa kutokana na vifo vya watu wasio na hatia, ulemavu wa kudumu, na uharibifu wa mali na miundombinu ya umma na binafsi. Viongozi hao wameeleza kuwa kabla ya uchaguzi mkuu, walifanya jitihada kubwa kuhimiza utunzaji wa amani, wakisisitiza kuwa kudai haki ni jambo la msingi, lakini lisifanywe kwa njia zinazohatarisha usalama wa taifa. BAKWATA imeiomba serikali kuwa na jicho la huruma kwa familia zilizopoteza ndugu zao, waliojeruhiwa au kuathirika kwa njia yoyote katika machafuko hayo, huku ikiitaka pia kuchukua hatua dhidi ya wale ‘waliowachochea vijana kujiingiza kwenye vurugu’. Aidha, tamko hilo limehimiza serikali kuzingatia suluhu na maridhiano pale inapobidi, kwa maslahi mapana ya taifa. Hata hivyo, viongozi hao wameonya kuwa maridhiano yasitumike kama zawadi kwa watu waliotenda uhalifu, wakisema vitendo vya namna hiyo havipaswi kufumbiwa macho. Aidha viongozi wa Kiislamu hao wamempongeza Dkt. Samia Suluhu Hassan kwa ushindi wa kishindo wa uchaguzi wa Rais wa Jamhuri ya Muungano wa Tanzania kwa miaka mitano ijayo huku wakimtakia heri katika utekelezaji wa majukumu yake.

VIDEO: Baraza Kuu la Waislamu Tanzania (BAKWATA) na taasisi mbalimbali za Kiislamu nchini wamesisitiza kuwa haki ni mchakato unaohitaji mazingira ya amani, hivyo vitendo vya uhalifu na vurugu vilivyoshuhudiwa wakati na baada ya uchaguzi wa Oktoba 29, 2025 vimeua kabisa misingi ya haki na utu nchini. Tamko hilo lililosomwa na Sheikh Issa Othman Issa, Mjumbe wa Baraza la Ulamaa na Imam Mkuu wa Msikiti wa Maamur kwa niaba ya Mufti Mkuu wa Tanzania, limesema kuwa vurugu hizo zimesababisha vifo vya watu wasio na hatia, ulemavu na uharibifu mkubwa wa mali- ukweli unaowaumiza na kuwaathiri Watanzania wote. Kwa mujibu wa tamko hilo, viongozi wa Kiislamu wamesema walifanya kazi kubwa kabla ya uchaguzi kuhimiza utunzaji wa amani, kwa sababu walielewa kwamba kudai haki ni halali, lakini ni lazima kudaiwa kwa misingi isiyohatarisha utulivu wa taifa. Viongozi hao wamesema kuwa machafuko yaliyotokea hayapaswi kurudiwa kamwe, na ni jukumu la serikali kufanya uchunguzi wa kina kubaini watu waliowachochea vijana kujiingiza katika uhalifu huo uliosababisha maafa.